Isaiah 61

Ilonggo (Maayong Balita nga Biblia (2012))

← Chapter 60 Jump to: Chapter 62 →

1Ang Ginoo nga Gamhanan nagpuno sa akon sang iya Espiritu. Ginpili kag ginpadala niya ako sa pagdala sang maayong balita sa mga imol, sa pag-ayo sang buong nga mga tagipusoon, sa pagsugid sang kahilwayan sa mga ginbihag, kag sa mga binilanggo.

2Ginpadala niya ako sa pagpahibalo nga ang tion nag-abot na nga ang Ginoo magaluwas sang iya mga tawo, kag magalutos sang ila mga kaaway. Ginpadala niya ako sa paglipay sa tanan nga nagapangasubo,

3sa paghatag sa mga nagalalaw sa Sion sang kalipay kag kasadya sa baylo sang kasubo, isa ka kanta sa pagdayaw sa baylo sang kalisod. Manginkaangay sila sang mga kahoy nga ang Ginoo mismo amo ang nagtanom. Ang tagsatagsa magahimo sing matarong, kag ang Dios pagadayawon tungod sang iya ginhimo.

4Patindugon nila liwat ang mga siudad nga dugay na nagkalaguba.

5Akon mga katawhan, ang mga dumoluong magaalagad sa inyo. Magaatipan sila sang inyo mga panong, magauma sang inyo duta kag magaatipan sang inyo mga talamnan sang ubas.

6Pero pagakilalahon kamo subong mga pari sang Ginoo, mga alagad sang aton Dios. Magaambit kamo sa manggad sang mga kapungsoran, kag magakalipay kamo nga inyo ini.

7Ang pagpakahuya kag pagpakanubo sa inyo tapos na. Magaestar kamo sa inyo kaugalingon nga duta, kag ang inyo manggad magadoble, ang inyo kalipay magapadayon sa walay katapusan.

8Ang Ginoo nagasiling, “Ginahigugma ko ang katarungan, kag ginadumtan ang pagpamigos kag ang pagpakasala. Hatagan ko gihapon sing balos ang akon mga tawo, kag magahimo ako sa ila sing kasugtanan nga walay katapusan.

9Manginbantog sila sa mga kapungsoran, ang tagsatagsa nga makakita sa ila makahibalo nga sila mga tawo nga akon ginbendisyunan.”

10Ang Jerusalem nagahugyaw tungod sang ginhimo sang Ginoo. Ang Dios nagpabayu sa iya sing kaluwasan kag pagdaog. Kaangay sia sang nobya nga nakailis na para sa kasal.

11Pat-od gid nga ang Ginoo nga Gamhanan magaluwas sang iya mga tawo subong nga ang mga binhi magatubo, kag ang tanan nga mga kapungsoran magadayaw sa iya.

← Chapter 60 Jump to: Chapter 62 →