Isaiah 36

Ilonggo (Maayong Balita nga Biblia (2012))

← Chapter 35 Jump to: Chapter 37 →

1Sang ika-14 ka tuig nga si Ezequias amo ang hari sang Juda, si Senaquerib nga hari sang Asiria nagsalakay kag nag-agaw sang mga siudad sang Juda nga napamakuran.

2Dayon ginsugo niya ang iya pangulo nga opisyal sa pagkadto sa Jerusalem halin sa Lakis upod sa madamo nga mga hangaway sa pagpaampo kay Haring Ezequias. Ang opisyal nagtindog sa dalan sa diin ang mga manughabol nagaobra, sa tupad sang kanal nga ginaagyan sang tubig halin sa naibabaw nga punong.

3Tatlo ka mga taga-Juda ang naggwa sa pagsugata sa iya: ang opisyal nga nagadumala sang palasyo, si Eliaquim nga anak ni Helkias; si Sebna nga sekretaryo sang korte; kag ang opisyal nga nagasulat sang mga maragtas nga si Joa nga anak ni Asaf.

4Ang opisyal nga taga-Asiria nagsiling sa ila nga ang hari luyag makahibalo kon ano ang ginasaligan ni Haring Ezequias.

5Nagsiling sia, “Nagahunahuna bala kamo nga madaog ninyo sa sugid ang gahom kag ikasarang sang mga hangaway? Sin-o bala ang ginasaligan ninyo nga magabulig sa inyo sa pagbato sa Asiria?

6Nagapaabot kamo sa Ehipto nga magabulig sa inyo, pero pareho lamang ina nga nagagamit sang tabun-ak subong baston. Mabali ini kag mapilas ang inyo kamot. Pareho sini ang hari sang Ehipto kon magsalig sa iya ang bisan sin-o.”

7Nagpadayon ang opisyal sa pagsiling, “Ukon nagasiling bala kamo nga nagasalig kamo sa Ginoo nga inyo Dios? Indi bala ang iya mga altar sa mataas nga bakulod ginpangguba ni Ezequias, kag dayon ginsingganan niya ang mga tawo sang Juda kag Jerusalem sa pagsimba sa isa lamang ka altar?

8Magahimo ako sing kasugtanan sa inyo sa ngalan sang hari. Hatagan ko kamo sing 2,000 ka mga kabayo kon may mga tawo kamo nga amo sini kadamo sa pagsakay sa ila.

9Indi kamo gani makatupong sa labing kubos nga opisyal sang Asiria, pero nagapaabot kamo sa mga Ehiptohanon sa pagpadala sa inyo sing mga karwahi sa inaway kag mga soldado nga nagasakay sa kabayo.

10Nagahunahuna bala kamo nga ginsalakay ko ang inyo pungsod kag ginlaglag ini nga wala ako pagbuligi sang Ginoo? Ang Ginoo mismo nagsiling sa akon sa pagsalakay sang inyo pungsod kag sa paglaglag sini.”

11Dayon sanday Eliaquim, Sebna, kag Joa nagsiling sa opisyal, “Hambal ka sa amon sa Aramico kay makahangop man kami. Indi ka maghambal sa amon sa Hebreo kay ang tanan nga mga tawo sa pader nagapamati.”

12Nagsabat sia, “Nagahunahuna bala kamo nga ginpadala ako sang hari sa paghambal sini nga mga butang sa inyo kag sa hari lamang? Indi, kundi ginpadala ako sa paghambal man sa mga tawo nga nagapungko sa pader, nga magakaon sang ila kaugalingon nga ipot kag magainom sang ila kaugalingon nga ihi subong man sa inyo.”

13Dayon nagtindog ang opisyal kag nagsinggit sa Hebreo, “Pamati kamo sang ginasiling sa inyo sang hari sang Asiria.

14Nagapaandam sia sa inyo nga indi kamo magpadaladala sa kay Ezequias kay indi sia makatabang sa inyo.

15Kag indi kamo magpati sa iya nga magsalig kamo sa Ginoo. Indi kamo maghunahuna nga ang Ginoo magaluwas sa inyo kag indi niya pag-itugot sa mga hangaway sang Asiria sa pag-agaw sang inyo siudad.

16Indi kamo magpamati kay Ezequias! Ang hari sang Asiria nagamando sa inyo sa paggwa sa siudad kag mag-ampo. Pahanugotan kamo tanan sa pagkaon sang mga ubas, kag mga higos halin sa inyo kaugalingon nga mga tanom, kag sa pag-inom sing tubig halin sa inyo kaugalingon nga mga bubon,

17tubtob ang hari magdala sa inyo sa isa ka duta kaangay sang inyo kaugalingon, sa diin may mga talamnan sang ubas nga magahatag sing bino, kag mga uyas nga mangin-inyo kalan-on.

18Indi kamo magpadaladala kay Ezequias sa paghunahuna nga ang Ginoo magatabang sa inyo. Naluwas bala sang mga dios sang iban nga mga pungsod ang ila kaugalingon nga duta gikan sa hari sang Asiria?

19Diin na bala karon ang mga dios sang Hamat kag Arpad? Diin na bala ang mga dios sang Sefarvaim? May isa bala nga nagluwas sang Samaria?

20San-o bala ginluwas sang mga dios sini tanan nga mga pungsod ang ila duta gikan sa amon hari? Karon ngaa nga nakapanghunahuna kamo nga ang Ginoo makaluwas sa Jerusalem?”

21Ang mga tawo naghipos suno sa ginsiling ni Haring Ezequias sa ila, kag wala gid sila magsabat.

22Dayon gingisi nanday Eliaquim, Sebna, kag Joa ang ila mga bayu sa kasubo kag naglakat sa pagsugid sa hari sang ginsiling sang opisyal nga Asiriahanon.

← Chapter 35 Jump to: Chapter 37 →