Isaiah 53

Ilonggo (Maayong Balita nga Biblia (2012))

← Chapter 52 Jump to: Chapter 54 →

1Ang mga tawo nagasabat, “Sin-o bala ang nagpati sang amon karon ginabalita? Sin-o bala ang nakakita sang gahom sang Ginoo?

2Kabubot-on sang Ginoo nga ang iya alagad magatubo kaangay sang isa ka tanom nga nagapanggamot sa mamala nga duta. Wala sia sing tindog ukon kaambong nga matalupangdan naton sia. Wala gid sing katahom sa iya, nga paghandumon naton sia.

3Gintamay naton sia kag ginsikway, ginbatas niya ang mga pag-antos kag mga kasakit. Wala gani sing isa nga luyag magtulok sa iya, wala naton sia ginsapak subong nga daw wala gid sia sing pulos.

4“Pero ginbatas niya ang mga pag-antos nga para kuntani sa aton, ang mga kasakit nga kita kuntani ang mapas-an. Pero naghunahuna kita nga ang iya mga pag-antos silot nga ginpadala sang Dios.

5Pero ginpilas sia tungod sang aton mga sala, ginhanot sia tungod sang mga kalautan nga aton ginhimo. Ang silot nga iya gin-antos naghilway sa aton, gin-ayo kita tungod sang mga bunal nga iya naagom.

6Tanan kita kaangay sang mga karnero nga nagtalang, ang tagsatagsa sa aton naglakat sa iya kaugalingon nga dalan. Pero ang silot ginpatupa sang Ginoo sa iya, ang silot nga bagay sa aton tanan.

7“Ginpintasan sia, pero ginbatas niya ini sing mapainuboson, wala gid sia magreklamo. Kaangay sang isa ka kordero nga ilihawon, kaangay sang isa ka karnero nga pagaguntingan, wala gid sia magreklamo.

8Gindakop sia kag ginhukman kag gindala agod patyon, wala sing nabalaka sang iya dinangatan. Ginpatay sia tungod sang mga sala sang iya mga tawo.

9Ginbutang sia sa lulobngan upod sa mga kriminal, ginlubong sia upod sa mga manggaranon, bisan nga wala sia sing sala nga nahimo, ukon nakahambal sia sing butig.”

10Ang Ginoo nagasiling, “Ako ang nagbuot nga sia magaantos, ang iya kamatayon isa ka halad sa pagdala sang kapatawaran. Gani makakita sia sang iya mga kaliwat; magakabuhi sia sing malawig, kag paagi sa iya ang akon plano magamadinalag-on.

11Sa tapos ang kabuhi sang pag-antos, makaangkon sia liwat sang kalipay, makahibalo sia nga ang iya mga pag-antos indi nanginwalay pulos. Sia ang akon matarong nga alagad nga sa iya nahamuot ako, pas-anon niya ang silot sang madamo, kag tungod sa iya patawaron ko sila.

12Gani hatagan ko sia sing lugar sang kadungganan isa ka lugar upod sa bantog kag gamhanan nga mga tawo. Ginhatag niya ang iya kabuhi sing kinabubot-on, kag nagpakigbahin sa inagihan sang mga kriminal. Nagtal-os sia sa mga makasasala, kag nag-antos sang silot nga bagay sa ila.”

← Chapter 52 Jump to: Chapter 54 →