Isaiah 54

Ilonggo (Maayong Balita nga Biblia (2012))

← Chapter 53 Jump to: Chapter 55 →

1O Jerusalem, kaangay ka sang isa ka baw-as nga babayi. Pero karon makakanta ka kag makahugyaw. Karon makaangkon ikaw sang mas madamo pa nga mga kabataan sang sa isa ka babayi nga wala gid mabayai sang iya bana!

2Pasangkara ang tolda nga imo ginaestaran, palabaa ang iya mga banting kag papag-una ang iya mga palpal!

3Pasangkara ang imo mga dulonan sa tanan nga mga kilid, ang imo mga pumoluyo magabawi sang duta nga ginapanag-iyahan karon sang iban nga mga pungsod. Ang mga siudad nga ginbayaan karon mapuno sang mga tawo.

4Indi ka magkahadlok, indi ka na mahuy-an liwat, indi ka na pagpakanuboon. Malimtan mo ang imo pagluib subong sang isa ka bataon nga asawa, kag ang imo kahuloy-an subong sang isa ka balo.

5Ang imo Manunuga manginkaangay sang isa ka bana sa imo, ang Ginoo sang mga hangaway amo ang iya ngalan. Ang balaan nga Dios sang Israel magaluwas sa imo, sia ang magagahom sa bug-os nga kalibutan.

6O Israel, kaangay ikaw sang isa ka bataon nga asawa, ginbayaan sang iya bana, kag nagaantos sang kasakit. Pero ang Ginoo nagatawag sa imo nga magbalik sa iya kag nagasiling:

7“Sa isa ka malip-ot nga tion ginbayaan ko ikaw, sa daku ko nga paghigugma kuhaon ko ikaw liwat.

8Sa malip-ot nga tion nagpalagyo ako nga may kaakig, pero karon pagahigugmaon ko ikaw sa wala sing katapusan.” Amo ini ang ginasiling sang Ginoo nga nagaluwas sa imo.

9“Nagsaad ako sang tion ni Noe nga indi na ako magpadala liwat sing anaw sa duta. Karon nagasaad ako nga indi na magkaakig sa imo liwat, ukon magsilot sa imo.

10Ang mga kabukiran kag ang mga kabakuloran magakatiphag, pero ang akon paghigugma sa imo wala sing katapusan, pagatipigan ko sa walay katubtoban ang akon saad sang paghidait.” Amo ini ang ginasiling sang Ginoo nga nagahigugma sa imo.

11Ang Ginoo nagasiling, “O Jerusalem, siudad nga nagaantos, kag wala na sing sarang mahimo, wala sing isa nga magalipay sa imo. Gamiton ko ang malahalon nga mga bato sa pagpahamtang liwat sang imo mga sadsaran.

12Gamiton ko ang mga rubi sa pagpatindog sang imo mga tore, ang mga bato nga nagainggat kaangay sang kalayo sa imo mga pwerta, ang malahalon nga mga bato sa pader sa imo palibot.

13“Ako gid ang magatudlo sang imo mga pumoluyo, kag hatagan sila sing kauswagan kag paghidait.

14Ang pagkamatarong magapalig-on sa imo. Mahilway ka sa mga pagpigos kag mga katalagman.

15Kon may magsalakay sa imo, ginahimo niya ini nga wala sang akon pahanugot, ang bisan sin-o nga magpakig-away batok sa imo mapukan.

16“Ako ang nagtuga sang panday nga nagaobra sang salsalon, nga nagadabok sang kalayo kag nagasalsal sang mga hinganiban. Ako man ang nagtuga sang soldado, nga nagagamit sang mga hinganiban sa pagpamatay.

17Pero wala sing hinganiban nga ginhimo nga makahalit sa imo, may isabat ikaw sa tanan nga nagasumbong sa imo. Pagaapinan ko ang akon mga alagad, kag padag-on ko sila.” Ang Ginoo amo ang naghambal sini.

← Chapter 53 Jump to: Chapter 55 →