Isaiah 50

Ilonggo (Maayong Balita nga Biblia (2012))

← Chapter 49 Jump to: Chapter 51 →

1Ang Ginoo nagasiling, “Nagahunahuna bala kamo nga ginpalakat ko ang akon mga tawo, subong sang isa ka tawo nga nagabulag sa iya asawa? Diin na ang papeles sang pagbulagay? Nagahunahuna bala kamo nga ginbaligya ko kamo agod bihagon kaangay sang isa ka tawo nga nagabaligya sang iya mga kabataan nga mangin-ulipon? Indi, ginbihag kamo tungod sang inyo mga sala, gindala kamo palayo tungod sang inyo mga kalautan.

2“Ngaa ang akon mga tawo wala makasabat sang pagkadto ko sa pagluwas sa ila? Ngaa wala sila magsabat sang pagtawag ko sa ila? Indi bala ako makasarang sa pagluwas sa ila? Sarang ko mapamala ang dagat sa isa lamang ka pagmando, kag mahimo ko nga desierto ang mga suba, ang mga isda sa sini magakalamatay tungod nga wala na sing tubig.

3Sarang ko mapadulom ang langit, nga daw nagalalaw sa mga patay.”

4Ang Ginoo nga Gamhanan nagtudlo sa akon kon ano ang akon ihambal, agod mapabakod ko ang ginakapoy. Sa tagsa ka aga ginahatagan niya ako sing handom sa pagpamati sang iya igatudlo sa akon.

5Ang Ginoo nga Gamhanan naghatag sa akon sing paghangop, kag wala ako magsupak ukon magpalayo sa iya.

6Ginataya ko ang akon likod sa ila nga nagahanot sa akon. Ginpabay-an ko lang sila sang pagpakahuya nila sa akon, sang pagbutong nila sang akon bungot kag pagdupla sang akon guya.

7Pero ang ila mga pagpakahuya indi makahalit sa akon, tungod kay ang Ginoo nga Gamhanan nagabulig sa akon. Ginpalig-on ko ang akon kaugalingon agod mabatas ko sila. Nahibaluan ko nga indi ako mahuy-an,

8kay ang Dios malapit sa akon, kag pamatud-an niya nga wala ako sing sala. May yara bala nga mangahas sa pagpasaka sang mga panumbongon batok sa akon? Kitaay lang kita sa hukmanan! Ipasaka sa korte ang iya panumbongon!

9Ang Ginoo nga Gamhanan gid amo ang nagaapin sa akon, sin-o bala ang makapamatuod nga nakasala ako? Ang tanan nga nagasumbong sa akon madula, mawala sila kaangay sang panapton nga ginkaon sang mga sapatsapat!

10Tanan kamo nga nagapasidungog sa Ginoo kag nagatuman sang ginahambal sang iya alagad, ang dalan nga inyo ginaagyan ayhan tama kadulom, pero magsalig kamo sa Ginoo, maglaom kamo sa inyo Dios.

11Tanan kamo nga nagapadihot sa paglaglag sa iban malaglag sa inyo kaugalingon nga mga padihot. Ang Ginoo gid amo ang magabuot nga mahanabo ini, madangatan ninyo ang masubo nga mga pag-antos.

← Chapter 49 Jump to: Chapter 51 →