Isaiah 29

Ilonggo (Maayong Balita nga Biblia (2012))

← Chapter 28 Jump to: Chapter 30 →

1Ang altar sang Dios, ang Jerusalem mismo, tapos gid! Ang siudad sa diin si David nagpatindog sang iya kampo tapos gid! Paligara ang isa ukon duha ka tuig, upod sa iya mga piesta kag mga pagkinasadya,

2kag dayon ang Dios magalaglag sang siudad nga ginatawag “ang altar sang Dios.” May mga hinibi kag mga panalambiton, kag ang bug-os nga siudad manginkaangay sang isa ka altar nga nabulit sang dugo.

3Ang Dios magasalakay sang siudad, magalibot kag magakibon sini.

4Ang Jerusalem manginkaangay sang isa ka maligno nga nagatinguha sa paghambal halin sa idalom sang duta, ang isa ka hungaw nga tingog halin sa yab-ok.

5O Jerusalem, ang tanan nga mga dumoluong nga nagasalakay sa imo manginkaangay sang yab-ok nga ginapalid sang hangin, kag ang ila makahaladlok nga mga hangaway ginaapok kaangay sang dagami. Sa hinali kag sa wala ginapaabot,

6ang Ginoo sang mga hangaway magaluwas sa imo paagi sa mabaskog nga mga daguob kag mga linog. Magapadala sia sing mga bagyo kag nagaharahara nga kalayo,

7dayon ang tanan nga mga hangaway sang mga kapungsoran nga nagasalakay sang siudad nga nahamtangan sang altar sang Dios, ang tanan nila nga mga hinganiban kag mga galamiton—ang tanan nga mga butang—madula kaangay sang isa ka damgo, kaangay sang mga butang nga nagaabot sa panghunahuna sa kagab-ihon.

8Ang tanan nga mga kapungsoran nga nagatililipon sa pagsalakay sa Jerusalem manginkaangay sang isa ka ginagutom nga tawo nga nagadamgo nga nagakaon sia kag nagabugtaw nga gutom, ukon kaangay sang isa ka tawo nga nagahimumogto sa kauhaw nga nagadamgo nga nagainom sia pero sa iya pagbugtaw mamala ang iya tutonlan.

9Sigi magpakatig-a kamo! Sigi magpadayon kamo sa pagkabulag! Magpahuboghubog kamo nga wala sing bino! Magdulingduling nga wala makainom bisan isa ka tulo!

10Ang Ginoo ang nagapatuyo sa inyo agod matulogan kamo sing mahamuok. Ang mga propeta amo ang mga mata sang mga tawo, pero ginbutabutahan sila sang Dios.

11Ang kahulogan sang tagsa ka palanan-awon sang propeta indi pag-ipahayag sa inyo, manginkaangay ini sang isa ka linukot nga tulon-an nga naselyohan. Kon dalhon mo ini sa isa nga kahibalo magbasa, kag pangabayon mo sia sa pagbasa sini, magasabat sia nga indi sia tungod kay naselyohan ini.

12Kon ihatag mo ini sa isa nga indi kahibalo magbasa, kag pangabayon mo sia sa pagbasa sini, magasabat sia nga indi sia makahibalo magbasa.

13Ang Ginoo nagsiling, “Ini nga mga tawo nagasiling nga nagasimba sila sa akon, pero ang ila mga pulong wala sing kahulogan, kag ang ila mga tagipusoon wala sa akon. Ang ila relihiyon wala sing pulos kundi mga kasugoan kag mga pagsulondan sang mga tawo nga ila nasaulo.

14Gani, kibuton ko ini nga mga tawo sa wala ginapaabot nga silot nga nagadinasundason lang. Ang mga maalam manginbuangbuang, kag ang ila mga kaabtik manginwalay pulos.”

15Tapos gid yadtong mga nagalikom sang ila mga plano sa Ginoo! Nagapadihot sila sa tago lamang, kag nagahunahuna sila nga wala sing isa nga makakita ukon makahibalo sang ila ginahimo.

16Ginapabaliskad nila ang tanan nga mga butang. Diin bala ang labing importante, ang maninihon ukon ang lunang? Makasiling bala ang ginhimo sang tawo sa naghimo sa iya, “Wala mo ako paghimua”? Ukon makasiling bala sia sa iya, “Wala ikaw makahibalo sang imo ginahimo”?

17Subong sang ginasiling, sa indi madugay ang kagulangan mangintalamnan kag ang talamnan manginkagulangan.

18Kon mag-abot ina nga adlaw, ang bungol makabati kon ang isa ka libro basahon sing mabaskog, kag ang bulag nga nagkabuhi anay sa kadudulman makakita.

19Ang imol kag mapainuboson nga mga tawo makaagom liwat sang kalipay nga ginahatag sang Ginoo, ang balaan nga Dios sang Israel.

20Amo ini ang katapusan sadtong nagapigos sa iban kag nagatamay sa Dios. Ang tagsa ka makasasala laglagon.

21Ang Dios magalaglag sang mga nagapasipala sa iban, sadtong mga nagapugong agod indi masilutan ang mga kriminal, kag ang mga nagabutig agod indi mahatagan sing husto nga paghukom ang matarong nga mga tawo.

22Gani karon ang Ginoo, ang Dios sang Israel nga nagluwas kay Abraham sa mga kabudlayan nagasiling, “O mga tawo ko, indi na kamo mahuy-an, kag indi na kamo magpanghilawhilaw sa kahuya.

23Kon makita ninyo ang mga anak nga akon ihatag sa inyo, dayon makilala ninyo nga ako amo ang balaan nga Dios sang Israel. Pasidunggan ninyo ako kag maghangad kamo sa akon.

24Ang mga buangbuang magatuon sa paghangop, kag ang pirme lang nagakumod magakalipay kon tudloan.”

← Chapter 28 Jump to: Chapter 30 →