Isaiah 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Pamati kamo samtang nagakanta ako sini nga ambahanon, isa ka ambahanon sang akon abyan nahanungod sang iya talamnan sang ubas: Ang akon abyan may isa ka talamnan sang ubas sa isa ka mapatubason gid nga bakulod.

2Nagkutkot sia sa duta, kag ginkuhaan niya ini sang mga bato; nagtanom sia sing labing maayo nga mga ubas. Nagpatindog sia sing isa ka tore nga balantayan, nagkutkot sia sing buho nga pulogaan sang ubas. Naghulat sia sa pagluto sang mga ubas, pero ang tagsa ka ubas maaslom.

3Gani karon ang akon abyan nagasiling, “Kamo ang mga pumoluyo sa Jerusalem kag Juda, pamatbati ninyo ako kag ang akon talamnan sang ubas.

4May yara pa bala nga wala ko mahimo sa akon talamnan sang ubas? Karon ngaa nagpamunga ini sing bika, sa baylo sang matam-is nga ubas?

5“Amo ini ang himuon ko sa akon talamnan sang ubas: Kuhaan ko ini sing kudal palibot, rumpagon ko ang iya pader nga nagaapin sini, kag pabay-an ko sa pagsulod ang mga sapat nga talunon sa pagkaon kag sa pagtasak sini.

6Pabay-an ko na lang ini nga tuboan sang mga hilamon. Indi ko na pag-utdan sing mga sanga ang mga ubas ukon lambunan, kundi pabay-an ko nga magtubo ang mga sapinit kag mga talungon sa pagtabon sini. Punggan ko man ang mga panganod agod indi mag-ulan.”

7Ang Israel amo ang talamnan sang ubas sang Ginoo sang mga hangaway, ang mga tawo sang Juda amo ang mga ubas nga iya gintanom. Nagpaabot sia nga himuon nila ang maayo, pero sa baylo nagpamatay sila. Nagpaabot sia nga himuon nila ang matarong, pero ang ila mga ginpatay nagasinggit tungod sang ila pagpamigos.

8Tapos gid kamo! May balay kag uma na kamo, pero nagadugang pa kamo sing mga balay kag mga ulomhan. Sa indi madugay wala na sing lugar para sa iban, kag sa ulihi kamo na lang ang magaestar sa duta.

9Nabatian ko ang Ginoo sang mga hangaway nga nagasiling, “Ining dalagku kag matahom nga mga balay pabay-an na lang nga magkalaguba.

10Ang duha ka ektariya nga natamnan sang ubas magapatubas sang lima lamang ka galon nga bino. Ang baynte ka sako nga binhi magapatubas sang duha lamang ka sako.”

11Tapos gid kamo! Nagamata kamo sing aga pa kag nagasugod sa pag-inom, kag nagapulaw sa gab-i sa pagpahuboghubog.

12Sa inyo mga punsyon may mga arpa, mga tamborin, kag may mga plawta kamo kag bino. Pero indi kamo makahangop sang ginahimo sang Ginoo.

13Gani pagadalhon kamo subong mga priso. Ang inyo mga pangulo magakalamatay sa gutom, kag ang mga imol mapatay sa kauhaw.

14Ang kalibutan sang mga patay daw maano na gid sa pagpaabot sa ila, kag nagaabri sing daku gid sang iya baba. Nagahalunhon ini sang mga dungganon nga mga pumoluyo sang Jerusalem upod sa nagakinagula kag madamo nga mga tawo nga imol.

15Ang tagsatagsa mahuy-an, kag ang tanan nga mga bugalon pauboson.

16Pero ang Ginoo sang mga hangaway nagapakita sang iya pagkagamhanan paagi sa paghimo sang matarong, kag nagapahayag sang iya pagkabalaan paagi sa paghukom sang iya mga tawo.

17Sa mga ginub-an sang mga siudad, ang mga kordero magahalab sang hilamon kag ang mga tinday nga kanding makakita sing halalban.

18Tapos gid kamo! Indi kamo makapalagyo sa inyo mga sala.

19Nagasiling kamo, “Padalia ang Ginoo sa paghimo sang iya ginasiling nga himuon, agod makita naton ini. Ipatuman sa balaan nga Dios sang Israel ang iya mga tinutuyo, agod mahibaluan naton ang iya hunahuna.”

20Tapos gid kamo! Ginatawag ninyo ang malaut nga maayo kag ang maayo nga malaut. Ginahimo ninyo ang kadudulman nga kapawa kag ang kapawa nga kadudulman. Ginahimo ninyo ang mapait nga matam-is kag ang matam-is nga mapait.

21Tapos gid kamo! Nagahunahuna kamo nga maalam kamo kag tama kaabtik.

22Tapos gid kamo! Mga isganan sa imnanay sing bino! Maisog kag wala mahadlok magtimpla sang makahulobog nga ilimnon!

23Pero ginabuy-an ninyo ang mga tawo nga nakasala kon hamhaman kamo, kag kamo ang nagasablag sa wala makasala nga mga tawo agod indi sila mahatagan sang matarong nga paghukom.

24Gani karon, subong nga ang dagami kag laya nga hilamon madali maduktan kag maupos sang kalayo, ang inyo mga gamot madunot kag ang inyo mga bulak malaya kag mapalid, tungod kay ginsikway ninyo ang gintudlo sa aton sang Ginoo sang mga hangaway, ang balaan nga Dios sang Israel.

25Ang Ginoo naakig sa iya mga tawo kag nagbayaw sang iya kamot sa pagsilot sa ila. Ang mga kabukiran matay-og, kag ang mga bangkay sang mga nagkalamatay magalalapta sa mga kalsada kaangay sang mga basura. Pero ang kaakig sang Ginoo indi pa mag-untat, kundi ang iya kamot ibayaw niya gihapon sa pagsilot sa ila.

26Ang Ginoo magahatag sing patimaan sa pagtawag sang isa ka pungsod sa malayo. Magapanihol sia sa ila nga magpalapit halin sa malayo nga mga lugar sang duta. Kag sa gilayon nagaabot sila sa labing madali!

27Wala sing isa sa ila nga ginakapoy kag wala sing isa sa ila nga nagakadusmo. Wala sila ginatuyo ukon nagatulog. Wala sing paha nga mapalos ukon higot sang sandalyas nga mabugto.

28Ang ila mga baslay mataliwis, kag ang ila mga pana nabingat na. Ang mga kuko sang ila mga kabayo matig-a kaangay sang batong bantiling kag ang pagtiyog sang mga rueda sang ila karwahi sa inaway kaangay sang buhawi.

29Ang mga soldado nagangurob kaangay sang mga leon nga nakapatay sang isa ka sapat kag nagataban sini palayo agod wala sing isa nga makakuha sini sa ila.

30Kon mag-abot ina nga adlaw, magangurob sila batok sa Israel pareho sang kagahod sang dagat. Tan-awa ini nga pungsod! Ang makita mo amo ang kadudulman kag pag-antos! Ang kapawa ginlamon sang kadudulman.

← Chapter 4 Jump to: Chapter 6 →