Isaiah 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Ang harianon nga linahi ni David kaangay sang isa ka kahoy nga ginpulod, pero subong sang pagpanalingsing sang puno sang kahoy nga ginpulod, subong man magabangon ang bag-o nga hari gikan sa mga kaliwat ni David.

2Ang Espiritu sang Ginoo magahatag sa iya sing kaalam, sang ihibalo kag sang abilidad sa paggahom sa iya mga tawo. Makilala niya ang kabubot-on sang Ginoo kag magapasidungog sia sa iya,

3kag may kalipay sia sa pagtuman sa iya. Indi sia maghukom paagi sa iya makita ukon paagi sa sugidsugid lang.

4Pagahukman niya ang mga imol sing nagakaigo, kag apinan niya ang kinamatarong sang mga mapainuboson. Sa iya mando ang katawhan pagasilutan, kag ang malaut nga mga tawo magakalamatay.

5Magagahom sia sa iya mga tawo sa katarungan kag kamatuoran.

6Ang mga lobo kag mga kordero magaupdanay nga may kalinong, kag ang mga leopardo magaluko upod sa mga tinday sang mga kanding. Ang mga tinday sang baka kag ang mga tutoy sang leon magakaon sing tingob, kag ang magamay nga mga kabataan amo ang magatatap sa ila.

7Ang mga baka kag mga uso magasalo sa pagkaon, kag ang ila mga tinday kag mga tutoy magaluko sing tingob nga may kalinong. Ang mga leon magahalab sang dagami, kaangay sang mga baka.

8Bisan ang lapsag indi maano kon maghampang sia malapit sa dalitan nga man-og.

9Sa Sion, ang balaan nga bukid sang Dios, wala sing butang nga makahalit ukon malaut. Ang duta mapuno sang pagkilala sa Ginoo subong sang mga kadagatan nga puno sang tubig.

10Ang adlaw magaabot nga ang bag-o nga hari halin sa kaliwat ni David mangintanda sa mga kapungsoran. Magatipon sila sing tingob sa iya harianon nga siudad kag magapasidungog sa iya.

11Kon ina nga adlaw magaabot, ang Ginoo magagamit liwat sang iya gahom kag dalhon niya pauli ang iya mga tawo nga nabilin sa Asiria, sa Ehipto, sa mga duta sang Patros, sang Etiopia, sang Elam, sang Babilonia, sang Hamat, sa mga baybayon kag sa mga kapuloan sang dagat.

12Ang Ginoo magabayaw sang isa ka bandera sa pagpakita sa mga kapungsoran nga ginatipon niya liwat ang naglalapta nga mga tawo sang Israel kag Juda, kag pabalikon sila gikan sa apat ka pamusod sang duta.

13Ang ginharian sang Israel indi na magkahisa sa Juda, kag ang Juda indi na manginkaaway sang Israel.

14Magatingob sila sa pagsalakay sang mga Filistinhon sa nakatundan kag magpang-agaw sang mga pagkabutang sang mga tawo nga nagaestar sa sidlangan. Lutoson nila ang mga tawo sang Edom kag Moab, kag ang mga tawo sang Ammon magatuman sa ila.

15Ang Ginoo magapamala sang gulfo sang dagat sang Ehipto, kag magapadala sia sang mainit nga hangin sa pagpamala sang Eufrates, kag magabilin lamang sang pito ka magamay nga mga sapa, agod nga ang bisan sin-o makatabok.

16May malapad nga kalsada halin sa Asiria para sa iya mga tawo nga Israelinhon nga nabilin didto, subong nga may malapad nga kalsada nga gin-agyan sang ila mga katigulangan sang paghalin nila sa Ehipto.

← Chapter 10 Jump to: Chapter 12 →