Isaiah 56

Ilonggo (Maayong Balita nga Biblia (2012))

← Chapter 55 Jump to: Chapter 57 →

1Ang Ginoo nagasiling sa iya mga tawo, “Sa indi madugay luwason ko kamo. Gani himua ang matarong kag nagakaigo.

2Pagabendisyunan ko ang mga nagapakabalaan sang Adlaw nga Inugpahuway, kag wala nagalapas sini. Pagabendisyunan ko ang mga wala nagahimo sing malaut.”

3Ang isa ka dumoluong nga nagbuylog sa mga tawo sang Ginoo indi magsiling, “Ang Ginoo indi magtugot sa akon sa pagsimba upod sa iya mga tawo.” Ang isa ka tawo nga ginkapon tungod kay indi sia makaangkon sang mga anak, indi gid magsiling nga indi sia manginkatapo sang mga tawo sang Dios.

4Ang Ginoo nagasiling sa sini nga mga tawo, “Kon inyo ako pasidunggan paagi sa pagpakabalaan sang Adlaw nga Inugpahuway, kag maghimo sang luyag ko, kag magtuman sing matutom sang akon kasugtanan,

5dayon ang inyo mga ngalan pagadumdomon sa akon Templo kag sa akon mga tawo sing sobra pa kon may mga anak kamo nga lalaki kag mga anak nga babayi. Indi gid kamo malimtan.”

6Kag ang Ginoo nagasiling sa mga dumoluong nga nanginkatapo sang iya mga tawo, nga nagahigugma kag nagaalagad sa iya, nga nagapakabalaan sang Adlaw nga Inugpahuway kag nagatuman sing matutom sang iya kasugtanan:

7“Dalhon ko kamo sa Sion, ang akon balaan nga bukid, hatagan ko kamo sing kalipay sa akon balay nga palangamuyoan, kag akon batunon ang mga dulot nga inyo ginahalad sa akon altar. Ang akon Templo pagatawgon nga balay nga palangamuyoan sang mga tawo sang tanan nga mga kapungsoran.”

8Ang Ginoo nga Gamhanan, nga nagdala pauli sang iya mga tawo nga Israelinhon halin sa pagkabihag, nagsaad nga sia magadala sang iban nga mga katawhan sa pagbuylog sa ila.

9Ang Ginoo nagasiling sa iban nga mga pungsod sa pagpalapit subong sang mapintas nga mga sapat kag sa pagkaon sang iya mga tawo.

10Nagasiling sia, “Ang tanan nga mga pangulo nga amo kuntani ang magapaandam sang akon mga tawo, mga bulag! Wala sila sing nahibal-an. Pareho sila sang manugbantay nga mga ido nga wala nagataghol, nagaligidligid lamang sila kag nagadamgo. Luyag lamang sila magtulog!

11Pareho lamang sila sang mga ido nga dalok nga wala nagakabusog. Mga pangulo sila nga wala sang paghangop. Ang tagsatagsa sa ila nagahimo sang iya luyag, kag nagapangita sang iya kaugalingon nga kaayuhan.

12Ini nga mga palahubog nagasiling, ‘Mangita kita sing bino kag magpaayaw-ayaw sing inom! Ang buas mas maayo pa sang sa karon nga adlaw!’”

← Chapter 55 Jump to: Chapter 57 →