Isaiah 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Amo ini ang mensahe nahanungod sa Damasco. Ang Ginoo nagsiling, “Ang Damasco indi na mangin-isa ka siudad, mangintinumpokan na lamang ini sang mga ginub-an.

2Ang mga siudad sang Siria pagabayaan sing dayon. Manginhalalban ini sang mga karnero kag mga baka, kag wala sing isa nga magatabog sa ila.

3Ang Israel wala sing pamakod, kag ang Damasco madulaan sing kahilwayan. Ang nabilin nga mga Siriahanon nga buhi mahuy-an kaangay sang mga tawo sang Israel. Ako, ang Ginoo sang mga hangaway naghambal sini.”

4Ang Ginoo nagsiling, “Magaabot ang adlaw nga mauntat ang pagkagamhanan sang Israel, kag ang iya manggad pagabayluhan sang kaimulon.

5Ang Israel manginkaangay sang talamnan nga ang mga uhay nagarab kag natipon, subong kamingaw sang talamnan sa Kapatagan sang Refaim sa tapos ini magaraban.

6Pila lamang ka bilog nga mga tawo ang mabilin nga buhi, kag ang Israel manginkaangay sa isa ka kahoy nga olivo nga gindugos ang iya bunga luas lamang sa duha ukon tatlo nga nabilin sa putokputokan nga sanga ukon apat ukon lima sa naidalom nga mga sanga. Ako, ang Ginoong Dios sang Israel, naghambal sini.”

7Kon mag-abot ina nga adlaw, ang mga tawo magadangop sa ila Manunuga, ang balaan nga Dios sang Israel sa pagpangayo sing tabang.

8Indi na sila magsalig sa mga altar nga ginhimo sang ila mga kamot, ukon magsalig sa ila kaugalingon nga mga binuhatan—ang mga simbulo sang diosa nga si Asera kag mga altar nga ginasunogan sang mga insyenso.

9Kon mag-abot ina nga adlaw, ang napamakuran nga mga siudad pagabayaan kag malaglag kaangay sang mga siudad sang mga Hevhanon kag mga Amornon nga ginbayaan nila sa ila pagpalagyo sa mga tawo sang Israel.

10O Israel, ginkalimtan mo ang Dios nga nagluwas sa imo, kag nag-apin sa imo kaangay sang daku nga bato. Sa baylo, naghimo ikaw sang mga hardin nga ginasimbahan agod pasidunggan ang dumoluong nga dios.

11Pero bisan ini nagatubo kag nagapamulak sa amo gid nga adlaw sang imo pagtanom sini, wala ikaw sing patubas nga makuha. Ang imo lamang makuha amo ang kabudlayan kag kasakitan nga wala sing bulong.

12Ang gamhanan nga mga pungsod nagakinagula nga ang ila kagahod kaangay sang hagunos sang dagat, kaangay sang pagdaguhob sang dalagku nga mga balod.

13Ang mga pungsod nagasalakay subong sang nagasagana nga mga balod, pero ang Dios nagasabdong sa ila kag nagapalagyo sila, nga napalid kaangay sang yab-ok sa higad sang bukid, pareho sang dagami nga ginadala sang buhawi.

14Sa kagab-ihon nagadala sila sing kahadlok pero pagkaaga wala na sila. Amo ini ang maabutan sang tagsatagsa nga nagaagaw sang mga pagkabutang sa aton duta.

← Chapter 16 Jump to: Chapter 18 →