Isaiah 44

Ilonggo (Maayong Balita nga Biblia (2012))

← Chapter 43 Jump to: Chapter 45 →

1Ang Ginoo nagasiling, “Karon magpamati ka, O Israel, nga akon alagad, pinili ko nga mga tawo, mga kaliwat ni Jacob.

2Ako amo ang Ginoo nga nagtuga sa imo, halin sa tion nga natawo ka ginbuligan ko ikaw. Indi ka magkahadlok, ikaw ang akon alagad, pinili ko nga mga tawo nga akon ginahigugma.

3“Hatagan ko sing tubig ang mamala nga duta, kag pailigon ko ang sapa sa desierto. Ihatag ko ang akon Espiritu sa imo mga kaanakan, kag ang akon mga kaayuhan sa inyo mga kaliwat.

4Magatubo sila subong sang natubigan nga mga hilamon, kaangay sang mga kahoy nga sawse sa tupad sang mga sapa nga nagailig ang tubig.

5“Ang tagsatagsa ka tawo magasiling, ‘Ako iya sang Ginoo.’ Magaabot sila sa pagbuylog sa mga tawo sang Israel. Ang kada-isa sa ila magabutang sang ngalan sang Ginoo sa iya butkon, kag magatawag sang iya kaugalingon nga isa sang mga tawo sang Dios.”

6Ang Ginoo, nga nagagahom kag nagaapin sa Israel, ang Ginoo sang mga hangaway nagasiling: “Ako amo ang nahauna, ang katapusan, kag ako lamang ang Dios, wala sing iban nga dios kundi ako.

7May yara bala nga makahimo sang akon ginhimo, kag makatagna sang tanan nga mahanabo halin sa ginsugoran tubtob sa katapusan nga panahon?

8Indi kamo magkahadlok, mga tawo ko! Kahibalo kamo nga halin sang una nga panahon tubtob karon ginpahibalo ko na ang tanan nga mahanabo, kag kamo akon mga saksi. May iban pa bala nga dios? May gamhanan pa bala nga dios nga wala ko mahibaloi?”

9Ang tanan nga nagahimo sang mga diosdios wala sing pulos, kag ang mga dios nga ila ginapakamahal indi mapuslan. Ang mga nagasimba sini nga mga dios mga bulag kag wala sing kaalam, kag mahuy-an sila.

10Wala sing pulos ang paghimo sang isa ka imahen nga tinunaw agod simbahon subong isa ka dios!

11Ang bisan sin-o nga nagasimba sini mahuy-an. Ang nagahimo sini mga tawo lamang. Papalapita sila kag patinduga sa hukmanan, magakahadlok sila kag mahuy-an.

12Ang manugsalsal nagabaga sang isa ka metal kag sa iya makusog nga butkon ginakurtihan niya ini paagi sa pagpapa sini sang martilyo. Sa iya pag-obra ginagutom sia, ginauhaw, kag ginakapoy.

13Ang panday nagatakos sang kahoy. Ginakuritan niya ini kag ginakurtihan sang iya mga gamit. Ginahimo niya ini sa dagway sang gwapo nga tawo, agod ibutang sa iya balay.

14Ayhan magapulod sia sang isa ka kahoy nga sedro, ukon pilion niya ang kahoy nga terebinto ukon kahoy nga sipres halin sa kagulangan. Ukon ayhan magatanom sia sang isa ka kahoy nga pino kag magapaabot sang ulan sa pagpatubo sini.

15Ang tawo nagagamit sing bahin sini nga igatong, kag ang isa ka bahin sini ginahimo nga isa ka diosdios. Ang isa ka bahin sini ginagatong niya sa kalayo sa pagpainit-init sang iya kaugalingon kag sa pagluto sang kalan-on. Ang isa ka bahin pa gid sini ginahimo niya nga isa ka dios kag ginasimba ini.

16Ang iban nga kahoy ginagatong niya sa kalayo, nagaasal sia sang karne, ginakaon ini, kag nagakabusog. Nagapainit-init sia sang iya kaugalingon kag nagasiling, “Kanami sang kainit! Kanami sang kalayo!”

17Ang nabilin sang kahoy ginahimo niya nga diosdios. Nagaluhod sia kag nagasimba sini. Nagapangamuyo sia sa sini nga nagasiling, “Ikaw ang akon dios, luwasa ako!”

18Ini nga mga tawo buang gid, wala sila makahibalo sang ila ginahimo. Gintakpan nila ang ila mga mata kag panghunahuna sa kamatuoran.

19Ang nagahimo sini nga mga diosdios wala sing kaalam kag ihibalo sa pagsiling, “Ang iban nga bahin sini nga kahoy gingatong ko. Nagluto ako sing kalan-on sa iya mga baga kag nag-asal sing karne kag ginkaon ko. Kag ang nabilin nga kahoy ginhimo ko nga isa ka diosdios. Karon yari ako nagaluhod sa isa ka utod nga kahoy!”

20Daw pareho lang ini nga nagakaon sing abo. Ang iya binuang nga mga hunahuna nagpatalang sa iya, kag indi na sia matabangan. Wala sia makahibalo nga ang diosdios nga iya ginauyatan indi gid matuod nga dios.

21Ang Ginoo nagasiling, “O Israel, dumdoma ini nga mga butang, dumdoma nga ikaw akon alagad. Gintuga ko ikaw agod mangin-akon alagad, kag indi ko gid ikaw pagkalimtan.

22Ginpanas ko ang imo mga sala kaangay sang gal-om. Balik ka sa akon, kay ako amo ang nagaluwas sa imo.”

23Maghinugyaw sa kalipay, mga kalangitan! Mga kadadalman sang duta, magsinggit! Maghinugyaw sa kalipay, mga kabukiran, kag tagsa ka kahoy sa kagulangan! Ang Ginoo nagluwas sang iya mga tawo nga Israel kag gani nagpakita sia sang iya pagkagamhanan.

24“Ako ang Ginoo, ang imo Manunuga kag Manluluwas. Ako ang Ginoo, ang nagtuga sang tanan nga mga butang. Ako lamang ang naghumlad sang mga kalangitan; sang pagtuga ko sang kalibutan, wala sing isa nga nagbulig sa akon.

25Ginpabuang ko ang mga manughimalad kag ginpaslaw ko ang mga pagpakot sang mga tawo nga nagatuon sang mga kabituonan. Ginasumpong ko ang mga hambal sang maalam nga mga tawo kag ginapakita ko nga ang ila kaalam kabuangan.

26Pero kon ang akon alagad magtagna, kon ipadala ko ang isa ka mensahero sa pagpahayag sang akon mga plano, ginatuman ko ini nga mga plano kag mga tagna. Ginasingganan ko ang Jerusalem nga ang mga tawo magaestar didto liwat, kag ang mga siudad sang Juda pagapatindugon liwat. Ini nga mga siudad magabangon gikan sa pagkalaglag.

27Sa akon pagmando nagamala ang mga kadagatan.

28Ginasingganan ko si Ciro, ‘Ikaw ang magagahom para sa akon, pagahimuon mo ang akon luyag nga himuon: magamando ka nga patindugon liwat ang Jerusalem, kag ipahamtang ang mga sadsaran sang Templo.’”

← Chapter 43 Jump to: Chapter 45 →