Isaiah 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Amo ini ang mensahe halin sa Dios nahanungod sang Babilonia nga nabaton ni Isaias nga anak ni Amoz.

2Sa putokputokan sang mahawan nga bakulod, ibayaw ang bandera sa inaway! Magmando ka sa mga soldado kag magbayaw sang imo kamot subong nga tanda sa pagsalakay sang mga pwerta sang bugalon nga siudad.

3Ang Ginoo nagtawag sang iya maisog kag gamhanan nga mga hangaway sa pagpakig-away para sa Ginoo sa pagsilot sa mga naakigan niya.

4Pamatii ang ginahod sa mga kabukiran—ang ginual sang madamo nga mga tawo, ang kinagubot sang mga kapungsoran kag mga ginharian nga nagatililipon. Ang Ginoo sang mga hangaway nagaaman sang iya mga soldado para sa inaway.

5Nagaabot sila halin sa mga kapungsoran sa malayo nga bahin sang duta. Sa iya kaakig ang Ginoo nagaabot sa paglaglag sang bug-os nga pungsod.

6Maghaya kamo sa kasakit! Ang adlaw sang Ginoo malapit na, ang adlaw nga ang Dios nga Makagagahom magadala sang kalaglagan.

7Ang tagsa ka abaga sang tawo magahuyhoy, kag ang tagsatagsa madulaan sing kaisog.

8Sila tanan magakurog sa kahadlok kag magaantos sang kasakit, subong sang isa ka manugbata nga ginasakitan. Magatinulokay sila nga may kakugmat, kag ang ila mga guya mapuno sing kahuya.

9Ang adlaw sang Ginoo magaabot—ang mapintas nga adlaw sang iya kaakig kag kasingkal. Ang duta mangin-isa ka desierto kag ang tagsa ka makasasala laglagon.

10Ang tagsa ka bituon kag ang tagsa ka grupo sang mga kabituonan indi na magsiga. Ang adlaw magadulom sa iya pagbutlak, kag ang bulan indi na maghatag sang iya kapawa.

11Ang Ginoo nagasiling, “Magadala ako sang kalalat-an sa duta kag silutan ko ang tanan nga malaut nga mga tawo tungod sang ila mga sala. Pauboson ko ang tagsa ka bugalon kag silutan ko ang tagsatagsa nga matinaastaason kag mapintas.

12Ang mabilin nga mga buhi mas malaka pa sang sa puraw nga bulawan.

13Pakurogon ko ang mga kalangitan, kag uyogon ko ang duta gikan sa iya nahamtangan sa sadtong adlaw kon ako, ang Ginoo sang mga hangaway, magpakita sang akon kaakig.

14“Ang mga dumoluong nga nagaestar sa Babilonia magapalagyo pauli sa ila kaugalingon nga mga duta, nga nagaalaplaag kaangay sang usa nga nagapalagyo sa mga mangangayam, kaangay sang mga karnero nga wala sing manugbantay.

15Ang bisan sin-o nga madakpan bun-on agod mapatay.

16Ang ila mga lapsag pagalampusan tubtob mapatay, ang ila mga balay pagakawatan kag ang ila mga asawa pagalugoson samtang nagatan-aw sila nga wala sing mahimo.”

17Ang Ginoo nagasiling, “Sudyoton ko ang mga taga-Midia sa pagsalakay sang Babilonia. Wala sila nagasapak sang pilak ukon sang bulawan.

18Pamatyon nila ang pamatan-on nga mga lalaki sang ila mga pana. Indi sila magkaluoy sa mga lapsag kag mga kabataan.

19Ang Babilonia amo ang labing matahom nga ginharian sa tanan amo ini ang bugal sang iya mga pumoluyo. Pero ako, ang Ginoo, magalaglag sang Babilonia subong sang akon ginhimo sa Sodoma kag Gomorra!

20Wala na sing may magaestar didto liwat. Wala na sing lagawan nga Arabiahanon nga magapatindog sang iya tolda didto, kag wala sing manugbantay sang mga karnero nga magapahalab sang iya panong didto.

21Mangin-isa ini ka lugar sa diin magaestar ang mga sapat sa desierto, kag ang mga bukaw magahimo sang ila mga pugad. Ang mga ostrit magaestar didto, kag ang talunon nga mga kanding magalumpatlumpat sa mga ginub-an.

22Ang mga inuwang sang mga lobo kag talunon nga mga ido magalanog sa mga tore kag mga palasyo. Ang tion sang Babilonia nag-abot na! Madali na lang ang iya mga adlaw matapos.”

← Chapter 12 Jump to: Chapter 14 →