Isaiah 65

Ilonggo (Maayong Balita nga Biblia (2012))

← Chapter 64 Jump to: Chapter 66 →

1Ang Ginoo nagsiling, “Handa ako sa pagsabat sang mga pangamuyo sang akon mga tawo, pero wala sila magpangamuyo. Magapakita na ako sa ila, pero wala sila magtinguha sa pagpangita sa akon. Ang pungsod wala magpangamuyo sa akon, bisan nga handa ako sa pagsabat sa ila nga magasiling, ‘Yari ako, kag buligan ko kamo.’

2Handa ako sa gihapon sa pagbaton sini nga mga tawo nga nagapagusto lang sa paghimo sing sala kag sa ila kaugalingon nga pagginawi.

3Wala sila mahuya sa pagpaakig sa akon sing dayon. Nagadulot sila sing mga halad nga di-matinlo sa mga hardin nga ginasimbahan, kag nagasunog sang insyenso sa mga altar sang mga di-diosnon.

4Kon gab-i nagakadto sila sa mga kweba kag mga lulobngan sa pagpamangkot sa mga espiritu sang mga patay. Ini nga mga tawo nagakaon sing baboy, kag nagahigop sang sabaw sang karne nga gindulot subong mga halad nga di-matinlo.

5Kag dayon ginasingganan nila ang iban, ‘Palayo kamo, indi kami pagtanduga kay tama sa amon ka balaan!’ Indi ako makaagwanta sa mga tawo kaangay sini—ang akon kaakig sa ila kaangay sang nagadabdab nga kalayo nga indi mapalong.

6“Napat-od ko na ang ila silot kag ang akon paghukom nasulat na. Indi ko pagpabay-an ang ila ginhimo, pero silutan ko sila

7sang ila mga sala, kag sang mga sala sang ila mga katigulangan. Nagsunog sila sang mga insyenso sa mga altar sang mga di-diosnon sa bakulod, kag naghambal sing malaut batok sa akon. Gani silutan ko sila sang nagakabagay sa ila mga ginhimo sang una.”

8Ang Ginoo nagasiling, “Wala sing may nagapierde sang maayo nga mga ubas, sa baylo ginahimo nila ini nga bino. Indi ko man paglaglagon ang tanan ko nga mga tawo, luwason ko ang mga nagaalagad sa akon.

9Bendisyunan ko ang mga Israelinhon nga gikan sa tribo ni Juda, kag ang ila mga kaliwat magapanag-iya sang akon duta sa mga kabukiran. Ang akon pinili nga mga tawo nga nagaalagad sa akon magaestar didto.

10Magasimba sila sa akon kag magapahalab sang ila mga karnero kag mga baka sa Kapatagan sang Saron sa nakatundan, kag sa Kapatagan sang Kalalat-an sa sidlangan.

11“Pero lain man ang himuon ko sa inyo nga nagasikway sa akon, nga wala nagasapak sa Sion, ang akon balaan nga bukid, kag nagasimba sa Gad kag Mini, ang mga dios sang maayo nga swerte kag kapalaran.

12Mangin-inyo kapalaran nga mapatay sa makasiligni nga kamatayon, tungod kay wala kamo magsabat sang akon pagtawag sa inyo, ukon magpamati sang paghambal ko. Ginpili ninyo ang pagkadi-matinumanon sa akon kag ang paghimo sang malaut.

13Gani ako, ang Ginoo nga Gamhanan, nagasiling sa inyo nga ang mga nagasimba kag nagatuman sa akon may madamo nga kalan-on kag ilimnon, pero pagagutomon kamo kag pagauhawon. Magamalipayon sila, pero kamo pakahuy-an.

14Magakanta sila sa kalipay, pero kamo magahibi nga buong ang tagipusoon.

15Ang akon pinili nga mga tawo magagamit sang inyo ngalan subong pagpakamalaut. Ako, ang Ginoo nga Gamhanan, magapatay sa inyo. Pero magahatag ako sang bag-o nga ngalan sa ila nga nagatuman sa akon.

16Ang bisan sin-o sa duta nga magpangayo sang bendisyon, magapangayo nga bendisyunan sang Dios nga matutom. Ang bisan sin-o nga nagasumpa, magasumpa sa ngalan sang Dios nga matutom. Ang mga kalalat-an nga nagligad na magataliwan kag malimtan.”

17Ang Ginoo nagasiling, “Magatuga ako sing bag-o nga duta kag bag-o nga mga langit. Ang nagliligad nga mga hitabo malipatan sing bug-os.

18Magkalipay kamo kag magkasadya sa walay katubtoban sa akon gintuga. Ang bag-o nga Jerusalem nga akon ginhimo mapuno sang kasadya, kag ang iya mga pumoluyo magakalipay.

19Ako mismo mapun-an sing kalipay, tungod sa Jerusalem kag sang iya mga pumoluyo. Wala na sing hinibi didto, wala sing nagapangayo sing tabang.

20Ang mga kabataan indi mapatay samtang lapsag pa sila, kag ang tagsatagsa magakabuhi sing malawig. Ang mga nagakabuhi sing 100 ka tuig kabigon nga pamatan-on pa. Ang mga mapatay nga indi pa makalambot sa 100 ka tuig ang ila edad, nagakahulogan nga ginsilutan ko sila.

21Ang mga tawo magaestar sa mga balay nga ila ginpatindog, kag indi ang iban ang magapulos sini. Magatanom sila sing mga ubas, kag magainom sang bino, indi ini pag-imnon sang iban. Subong sang mga kahoy, ang akon mga tawo magakabuhi sing malawig. Mapuslan gid nila ang mga butang nga ila ginpangabudlayan.

23Ang ila mga obra magamadinalag-on, kag ang ila mga kabataan indi makasugata sang mga kapahamakan. Bendisyunan ko sila kag ang ila mga kaliwatan sa walay katubtoban.

24Bisan wala pa sila makatapos sang ila pangamuyo sa akon, sabton ko sila.

25Ang mga lobo kag ang mga kordero magahalab sing tingob, kag ang mga leon magahalab sing dagami kaangay sang baka. Ang mga man-og indi na makahalit. Sa Sion, ang akon balaan nga bukid, wala na sing may makahalalit ukon malaut.”

← Chapter 64 Jump to: Chapter 66 →