Isaiah 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Amo ini ang mensahe nahanungod sa Ehipto. Ang Ginoo magaabot sa Ehipto, nga nagasakay sa madasig nga panganod. Ang mga diosdios sang mga Ehiptohanon magakurog sa atubang niya, kag ang mga tawo sang Ehipto madulaan sing kaisog.

2Ang Ginoo nagasiling, “Tugahon ko ang isa ka rebulosyon sa Ehipto, kag ang mga mag-ulotod magailinaway, kag ang kaingod batok sa iya kaingod. Ang mga siudad magailinaway sa isa kag isa, kag ang mga hari magailinaway kag magaalagaway sing gahom.

3Pagagub-on ko ang mga plano sang mga Ehiptohanon kag kuhaan ko sila sing kaisog. Magapangayo sila bulig sa ila mga diosdios, kag magakadto sila sa mga tawo nga nagakonsulta sang mga patay sa pagpamangkot kag magapangayo sing laygay sa mga espiritu sang mga patay.

4Itugyan ko ang mga Ehiptohanon sa isa ka mabangis nga pangulo, sa isa ka mapintas nga hari nga magagahom sa ila. Ako, ang Ginoo sang mga hangaway, naghambal sini.”

5Ang tubig sa Nilo magahubas, kag ang suba magaamat-amat mala.

6Ang mga ginailigan sang suba magalang-og samtang nagaamat-amat ini hubas. Ang mga tabun-ak kag mga bagaas malaya,

7kag ang tanan nga mga tanom sa mga pangpang sang Nilo malaya, mapalid kag mawala.

8Ang tagsatagsa nga ang iya pangita amo ang pagpangisda sa Nilo magapanghayhay kag magahibi; ang ila mga taga kag ang ila mga pukot manginwalay pulos.

9Ang mga nagahimo sing lino nga panapton magapangasubo,

10ang mga manughabol kag ang mga sampaton nga manug-obra maluyahan kag madulaan sing paglaom.

11Ang mga pangulo sang siudad sang Zoan mga buangbuang! Ang maalam nga mga tawo sang Ehipto nagalaygay sing binuang! Sa ano bala sila makapangahas sa pagsiling sa hari nga sila magabulos sa mga mangin-alamon kag mga hari sang una?

12O hari sang Ehipto, diin na yadtong imo maalam nga mga manuglaygay? Ayhan makasugid sila sa imo kon ano ang plano sang Ginoo sang mga hangaway para sa Ehipto.

13Ang mga pangulo sang Zoan kag Memfis mga buangbuang. Kuntani sila ang magatuytoy sa pungsod, sa baylo ginpatalang nila ini.

14Ginbuot sang Ginoo nga ang ila laygay makapasalangisag sa tawo. Tungod sini ang tanan nga ginahimo sang Ehipto sayop, kag nagadulingduling kaangay sang isa ka hubog nga nakadanlog sa iya suka.

15Wala sing isa sa Ehipto, manggaranon ukon imol, dungganon ukon di-dungganon nga makahatag sing bulig.

16Ang tion magaabot nga ang mga tawo sang Ehipto manginmaluya subong sang mga babayi. Magakurog sila sa kahadlok kon makita nila nga ang Ginoo sang mga hangaway nagbayaw sang iya kamot sa pagsilot sa ila.

17Ang mga tawo sang Ehipto magakahadlok sa Juda sa tagsa ka tion nga madumdoman nila ang ila madangatan nga gin-aman sang Ginoo sang mga hangaway para sa ila.

18Kon mag-abot ina nga tion, ang linggwahe nga Hebreo amo ang gamiton sa lima ka mga siudad sang Ehipto. Ang mga tawo didto magasumpa sa ngalan sang Ginoo sang mga hangaway. Ang isa sining mga siudad pagatawgon nga “Siudad sang Adlaw.”

19Kon mag-abot ina nga tion, may altar para sa Ginoo sa duta sang Ehipto, kag may isa ka haligi nga bato nga ginhalad sa iya sa dulonan sang Ehipto.

20Ini mangintanda nga yara ang Ginoo sang mga hangaway sa duta sang Ehipto. Kon ang mga tawo didto ginapigos kag magpangayo sing bulig sa Ginoo, magapadala sia sing isa nga magatabang sa ila.

21Ang Ginoo magapahayag sang iya kaugalingon sa mga tawo sang Ehipto, kag dayon magakilala sila kag magasimba sa iya kag magadala sila sing mga halad kag mga dulot sa iya. Magapanumpa sila sa iya kag magatuman sang ila mga ginsaad.

22Ang Ginoo magasilot sang mga Ehiptohanon, pero ayuhon man niya sila. Magadangop sila sa iya, kag pamatian niya ang ila mga pangamuyo kag ayuhon sila.

23Kon mag-abot ina nga tion may malapad nga dalan halin sa Ehipto pakadto sa Asiria. Ang mga tawo sining duha ka mga pungsod magapakadto pakari sa sini nga dalan, kag ining duha ka mga pungsod magasimba sing tingob.

24Kon mag-abot ina nga tion, ang Israel mangintupong sa Ehipto kag Asiria kag ang bug-os nga kalibutan magabaton sing mga kaayuhan paagi sa sining tatlo ka mga pungsod.

25Ang Ginoo sang mga hangaway magabendisyon sa ila kag magasiling, “Bendisyunan ko ikaw, Ehipto nga akon mga katawhan; ikaw Asiria nga akon gintuga; kag ikaw Israel nga akon pinili nga mga tawo.”

← Chapter 18 Jump to: Chapter 20 →