Leviticus 1

Luganda (BIBU1) (BIBULIYA ENTUKUVU)

Jump to: Chapter 2 →

1Omukama yayita Musa n'ayogera naye ng'ayima mu Weema ey'Ensisinkano n'agamba nti:

2“Yogera eri Abayisirayeli obagambe nti: “ ‘Bwe mubangamu mu mmwe aweereza Omukama ekitone, ekitone kyammwe bwe kibanga kivudde mu bisolo by'awaka, kivanga mu ggana oba mu kisibo.

3“ ‘Ekitone ky'ekitambiro ekyokye bwe kibanga kivudde mu ggana, kibeeranga kya nnume ento eteriiko kamogo. Akireetanga ku mulyango gwa Weema ey'Ensisikano Omukama alyoke akisiime

4Assanga omukono ku mutwe gw'ekitone ky'ekitambiro ekyokye, kirisiimibwa ku lulwe, kiryoke kiweerezebwe okuddaabiriza ku lulwe.

5Olwo ente ennume ento aggittiranga mu maaso g'Omukama, batabani ba Aroni, bakabona, ne baweereza omusaayi gwayo nga bagumansira ku mwaliiro oguli ku mulyango gwa Weema ey'Ensisinkano okugwetoolooza.

6Ekitone eky'ekitambiro ekyokye akibaagangako eddiba n'akitemaatema ebifi.

7Batabani ba Aroni, bakabona, ne bakuma omuliro mu mwaliiro, ne bassa enku ku muliro.

8Olwo bakabona batabani ba Aroni bassanga ebitundu ebitemeddwatemeddwa, omutwe n'amasavu ku nku eziri ku mwaliiro.

9Ebyenda n'amagulu abyozanga mu mazzi ate kabona n'abyokera mu mwaliiro okutuusa okusirikka. Kino kitambiro ekyokye, ekiwonge n'omuliro, akawoowo akasanyusa Omukama.

10“ ‘Obanga ekitone eky'ekitambiro ekyokye kivudde mu kisibo, kwe kugamba nti mu ndiga oba mu mbuzi, aweerezanga kirume, ekitaliiko kamogo;

11akittiranga mu maaso g'Omukama ku luuyi lw'omwaliiro olutunuulidde emambuka. Batabani ba Aroni, bakabona, omusaayi gwakyo ne bagumansira ku mwaliiro okugwetoolooza.

12Anaakitemaatemanga ebifi, byo n'omutwe, n'amasavu, kabona n'abissa ku nku ezimaze okukoleezebwa ku mwaliiro.

13Anaayozanga mu mazzi ebyenda n'amagulu, byonna kabona n'abyokera ku mwaliiro okutuusa okusirikka. Ekyo kitambiro ekyokye, ekiwonge n'omuliro, akawoowo akasanyusa Omukama.

14“ ‘Oba ekitone ky'ekitambiro ekyokye ky'aweerezza Omukama kivudde mu binyonyi, aweerezanga jjiba oba enjiibwa ento.

15Kabona anaakireetanga ku mwaliiro n'akinyoola ensingo okukutulako omutwe, n'agwokera ku mwaliiro. Omusaayi gwakyo gukamulwangamu awo mu mbiriizi z'omwaliiro.

16Ekisakiro n'ebyoya abikasukanga ku ludda olw'ebuvanjuba bw'omwaliiro mu kifo evvu ly'amasavu we liyiibwa.

17Akwatanga ebiwaawatiro byakyo ku buli luuyi n'akiryebulamu wabiri, naye ate nga takikutuddeemu. Olwo kabona anaakyokyanga ku nku ezikoleezeddwa ku mwaliiro. Ekyo kitambiro ekyokye, ekiwonge n'omuliro, akawoowo akasanyusa Omukama.’ ”

Jump to: Chapter 2 →