Leviticus 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Omukama yagamba Musa nti:

2“Gamba Abayisirayeli nti: “ ‘Omukazi bw'abanga olubuto n'azaala omwana mulenzi, anaamalanga ennaku musanvu nga si mulongoofu, nga bw'aba mu biseera bye eby'omwezi.

3Akaana ka kutayirirwanga ku lunaku olwomunaana.

4Omukazi anaalindanga ennaku amakumi asatu mu ssatu okutukuzibwako omusaayi. Takwatanga ku kitukuvu na kimu, era tayingiranga mu kifo kitukuvu, okutuusa ennaku ez'okutukuzibwa kwe nga ziwedde.

5“ ‘Bw'azaalanga omuwala, wa kumalanga ennaku kkumi na nnya nga si mulongoofu, nga bw'aba mu biseera bye eby'omwezi. Anaalindanga ennaku nkaaga mu mukaaga okutukuzibwako ekikulukuto ky'omusaayi.

6“ ‘Ennaku z'okutukuzibwa kwe bwe ziggwangako olw'omulenzi oba olw'omuwala, atwaliranga kabona ku mulyango gwa Weema ey'Omukama akaliga ak'omwaka ogumu akalume, olw'ekitambiro ekyokye, n'enjiibwa ento oba ejjiba, olw'ekitambiro olw'ekibi.

7Abiweerezanga mu maaso g'Omukama okuddaabiriza ku lulwe, olwo anaabanga atukuziddwako okukulukuta kw'omusaayi gwe. “ ‘Lino lye tteeka ku oli abeera azadde ow'obulenzi oba ow'obuwala.

8Okugerera ku nfuna ye, bw'aba tasobola kuleeta kaliga, aleetanga amayiba abiri, oba obuyiibwa bubiri; akamu ka kitambiro ekyokye n'akalala ka kitambiro olw'ekibi. Olwo kabona anaddaabirizanga ku lulwe, olwo anaabanga mulongoofu.’ ”

← Chapter 11 Jump to: Chapter 13 →