Leviticus 9

Luganda (BIBU1) (BIBULIYA ENTUKUVU)

← Chapter 8 Jump to: Chapter 10 →

1Ku lunaku olwomunaana, Musa yayita Aroni ne batabani be n'abakadde ba Yisirayeli, n'agamba Aroni nti:

2“Ddira akayana k'ente, ak'ekitambiro olw'ekibi n'endiga ennume ey'ekitambiro ekyokye, byombi nga tekuli kamogo, obireete mu maaso g'Omukama.

3Abayisirayeli obagambe nti: ‘Muddire embuzi ennume ey'ekitambiro olw'ekibi n'akayana n'akaliga, byombi nga bya mwaka gumu, ebitaliiko kamogo eby'ekitambiro ekyokye,

4ko ente n'endiga ennume olw'ekitambiro eky'okussa ekimu, mubitambire mu maaso g'Omukama, wamu n'ekitone eky'obuwunga ekitabuddwamu omuzigo, kubanga olwa leero Omukama ajja kubalabikira.’ ”

5Byonna Musa bye yabalagira ne babireeta mu maaso ga Weema ey'Ensisinkano. Ekibiina kyonna ne kijja ne kiyimirira mu maaso g'Omukama.

6Musa n'agamba nti: “Kino Omukama kye yalagidde mukole, ekitiibwa kye kiryoke kibalabikire.”

7Ate Musa n'agamba Aroni nti: “Sembera ku mwaliiro oweereze ekitambiro kyo olw'ekibi, n'ekitambiro ekyokye oddaabirize ku lulwo ne ku lw'abantu; weereza ekitambiro ky'ekibiina oddaabirize ku lwabwe ng'Omukama bwe yalagira.”

8Aroni n'asembera ku mwaliiro n'atta akayana ak'ekitambiro olw'ekibi ku lulwe.

9Batabani be ne bamuleetera omusaayi gw'akayana, n'annyikamu olugalo n'akwata ku mayembe g'omwaliiro, ogwasigalamu n'aguyiwa wansi w'omwaliiro.

10Amasavu n'ensigo n'olububi olw'oku kibumba ebyava ku kitambiro olw'ekibi n'abyokera ku mwaliiro, ng'Omukama bwe yali alagidde Musa.

11Byo, ennyama n'eddiba, n'abyokera ebweru w'olusiisira.

12N'atta ekitone eky'ekitambiro ekyokye. Batabani be ne bamuleetera omusaayi gwakyo, n'agumansira ku mwaliiro okugwetoolooza.

13Ne bamuweereza ebifi by'ekitone eky'ekitambiro ekyokye awamu n'omutwe, byonna n'abyokera ku mwaliiro.

14Ebyenda n'ebirenge n'abyoza n'amazzi n'abyokera ku kitambiro ekyokye ku mwaliiro.

15Aroni n'aleeta ekitone ku lw'abantu; n'addira embuzi ennume ey'ekitambiro olw'ebibi by'abantu n'agitta n'agiweereza ng'ekitambiro olw'ekibi mu ngeri ye emu nga bwe yakola ku kisoose.

16N'aleeta ekitone ky'ekitambiro ekyokye, nakyo n'akikola ng'etteeka bwe ligamba.

17Ate n'aleeta ekitone eky'obuwunga, n'aggyako olubatu lulamba n'alwokera ku mwaliiro ng'ayongereza ku kitambiro ekyokye eky'oku makya.

18N'atambira ente n'endiga ennume ng'ekitambiro ky'abantu eky'okussa ekimu; batabani be ne bamuleetera omusaayi, n'agumansira ku mwaliiro okugwetoolooza.

19Naye ebitundu eby'amasavu ku nte ne ku ndiga: ekikira, amasavu gennyini, ensigo n'ekibikka ku kibumba,

20ne babissa ku bifuba Aroni n'abyokera ku mwaliiro.

21Ebifuba n'ebisambi ebya ddyo Aroni n'abiwuuba mu maaso g'Omukama nga Musa bwe yali alagidde.

22Aroni n'agololera emikono ku bantu n'abawa omukisa. Bwe yamala okuweereza ekitambiro olw'ekibi, ekitambiro ekyokye n'ekitambiro eky'okussa ekimu, n'akka.

23Awo Musa ne Aroni ne bayingira mu Weema ey'Ensisinkano. Bwe baafuluma ne bawa abantu omukisa. Ekitiibwa ky'Omukama ne kirabikira abantu bonna.

24Ekyabaawo, omuliro ne guva ew'Omukama, ne gusenkenya ekitambiro ekyokye n'amasavu ebyali ku mwaliiro. Ekibiina bwe kyakiraba, ne baleekaana n'essanyu, ne bagwa wansi ku maaso gaabwe.

← Chapter 8 Jump to: Chapter 10 →