Leviticus 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Omukama yagamba Musa nti:

2“Gamba Abayisirayeli nti: ‘Oli bw'ayonoonanga mu butanwa, n'abaako ky'akola ku ebyo ebigaanibwa mu biragiro by'Omukama, anaakolanga ati:

3“ ‘Kabona omusiige bw'akolanga ekibi, n'aleetera atyo abantu okugwa mu musango, olw'ekibi kye ekyo ky'akoze, atoolanga mu ggana ente ennume ento etaliiko kamogo ng'ekitone eri Omukama olw'ekitambiro olw'ekibi.

4Atwalanga ente ennume ento ku mulyango gwa Weema ey'Ensisinkano mu maaso g'Omukama, n'assa omukono ku mutwe gwayo, n'agittira awo mu maaso g'Omukama,

5Kabona omusiige asenanga ku musaayi gwayo n'aguyingiza mu Weema ey'Ensisinkano.

6Annyikanga engalo mu musaayi, n'agumansira emirundi musanvu mu maaso g'Omukama, mu maaso g'olutimbe lw'Ekitukuvu.

7Kabona addiranga ogumu ku musaayi ogwo n'agussa ku mayembe g'omwaliiro ogw'obubaani mu maaso g'Omukama oguli mu Weema ey'Ensisinkano. Omusaayi omulala gwonna ogusigaddewo aguyiwanga awo wansi w'omwaliiro ogw'ekitambiro ekyokye oguli ku mulyango gwa Weema.

8“ ‘Aggyangamu amasavu gonna ag'ente ennume ey'ekitambiro olw'ekibi, agabikkiridde ebyenda na buli kyonna ekisava ekiriko,

9ensigo zombi ko amasavu gaakwo agazibikka eno nga mu ndira, n'olububi lw'oku kibumba; aggyangako amasavu ago nga bw'akola ku nsigo,

10mu ngeri ye emu ng'amasavu bwe gaggyibwa mu nte olw'ekitambiro eky'okussa ekimu. Byonna ebyo kabona anaabyokeranga ku mwaliiro gw'ekitambiro ekyokye.

11Naye eddiba n'ennyama yonna, omutwe n'ebigere ko n'obusa,

12kwe kugamba nti byonna ebisigaddewo ku nte ennume, abifulumyanga ebweru w'olusiisira, mu kifo ekirongoofu awayiibwa evvu ly'amasavu, n'abyokera ku nku n'omuliro; byokerwanga mu kifo awayiibwa evvu ly'amasavu.

13“ ‘Ekibiina kya Yisirayeli kyonna bwe kikolanga ekibi, naye mu butanwa, nga kye bakola tebakitegedde, ne babaako bye bakola ku ebyo ebigaanibwa mu biragiro by'Omukama, banaabanga bazizza omusango.

14Oluvannyuma bwe bategeera ekibi kyabwe, ekibiina kyonna wamu kinaaweerezanga olw'ekitambiro olw'ekibi, ente ennume ento; banaagireetanga mu maaso ga Weema ey'Ensisinkano.

15Olwo abakadde b'ekibiina, banaagissangako emikono ku mutwe mu maaso g'Omukama, ne bagittira mu maaso g'Omukama.

16Awo Kabona omusiige, anaddiranga ku musaayi gwayo n'aguyingiza mu Weema ey'Ensisinkano

17n'annyikamu olugalo, n'amansira mu maaso g'Omukama emirundi musanvu mu maaso g'olutimbe.

18Era ku musaayi ogwo anaggyangako ogumu n'agussa ku mayembe g'omwaliiro oguli mu maaso g'Omukama mu Weema ey'Ensisinkano. Omusaayi ogusigaddewo aguyiwanga wansi awo ku mwaliiro gw'ekitambiro ekyokye oguli ku mulyango gwa Weema ey'Ensisinkano.

19Anaggyangamu amasavu gaamu gonna n'agookera ku mwaliiro.

20Nga bwe yakola ku nnume ey'ekitambiro olw'ekibi, bw'alikola ne ku nnume eno. Bw'atyo Kabona anaddaabirizanga olw'ekisobyo kyabwe, era olwo banaasonyiyibwanga.

21Olwo ente ennume yennyini agifulumyanga ebweru w'olusiisira n'agyokya nga bwe yakola ku nnume eyasoose. Kino kye kitambiro olw'ekibi ku lw'ekibiina.

22“ ‘Omukulembeze bw'akolanga ekibi mu butanwa, n'abaako ky'akola ku ebyo ebigaanibwa mu biragiro by'Omukama, newandibadde ng'akikoze nga tamanyi, anaabanga azzizza omusango.

23Bw'amanyisibwanga ekibi kye kye yakola, aleetanga embuzi ennume eteriiko kamogo ng'ekitone kye.

24Assanga omukono ku mutwe gwayo n'agittira mu kifo awattirwa ekitone ky'ekitambiro ekyokye mu maaso g'Omukama; kino kitambiro olw'ekibi.

25Olwo kabona addiranga ku musaayi gw'ekitambiro olw'ekibi, n'aguteeka ku mayembe g'omwaliiro ogw'ekitambiro ekyokye n'olugalo lwe, ate ogusigaddewo n'aguyiwa awo wansi w'omwaliiro.

26Amasavu go agookeranga kungulu ku mwaliiro, nga bw'akola ku kitambiro eky'okussa ekimu. Bw'atyo Kabona anaddaabirizanga olw'ekibi ky'omukulembeze, era olwo anaasonyiyibwanga.

27“ ‘Omu mu kibiina singa anaagwanga mu kibi mu butanwa, n'abaako ky'akola ku ebyo ebigaanibwa mu biragiro by'Omukama, anaabanga azzizza omusango.

28Bw'anaamanyisibwanga ekibi kye, aleetanga mu maaso g'Omukama embuzi enduusi etaliiko kamogo ng'ekitambiro kye olw'ekibi kye kye yakola.

29Ateekanga omukono gwe ku mutwe gw'ekitone ekinaaweerezebwa olw'ekibi, n'agittira mu kifo awattirwa ekitone eky'ekitambiro ekyokye.

30Olwo kabona anaddiranga ku musaayi gw'ekitambiro olw'ekibi, n'aguteeka ku mayembe g'omwaliiro gw'ekitambiro ekyokye n'olugalo lwe, ate ogusigaddewo n'aguyiwa awo wansi w'omwaliiro.

31Amasavu gonna agaggyangako, ng'amasavu bwe gaggyibwa ku kitone ky'ekitambiro eky'okussa ekimu, olwo kabona n'agookera ku mwaliiro ng'ekitambiro, ng'akawoowo akasanyusa Omukama. Bwatyo kabona anaddaabirizanga ku lulwe, era olwo anaasonyiyibwanga.

32“ ‘Bw'abanga aleese ndiga ng'ekitone olw'ekitambiro olw'ekibi aleetanga akaliga kaluusi, akataliiko kamogo.

33“ ‘Assanga omukono ku mutwe gwako n'akattira mu kifo ekitone ky'ekitambiro ekyokye we kittirwa.

34Kabona addiranga ku musaayi gw'ekitone olw'ekibi, n'aguteeka ku mayembe g'omwaliiro ogwokerwako ebitone n'olugalo lwe, ate ogusigaddewo n'aguyiwa awo wansi w'omwaliiro.

35Aggyangako amasavu gonna, nga bwe gaggyibwa ku kaliga k'ekitambiro eky'okussa ekimu, n'agookera ku kitone eky'ekitambiro olw'ekibi ku mwaliiro ng'ekitambiro ekiwongere Omukama n'omuliro. Bw'atyo kabona anaddaabirizanga ku lulwe olw'ekibi kye kye yakola, era olwo anaasonyiyibwanga.

← Chapter 3 Jump to: Chapter 5 →