Leviticus 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1“ ‘Oli bw'aweerezanga ekitambiro eky'okussa ekimu, ng'ekitone kye kivudde mu ggana oba mu kisibo, kibeerenga kisajja oba kikazi, Omukama amuweerezanga ekyo ekitaliiko kamogo.

2Omukono anaaguteekanga ku mutwe gw'ekitone kye, n'akittira ku mulyango gwa Weema ey'Ensisinkano. Batabani ba Aroni, bakabona, bamansiranga omusaayi ku mwaliiro okugwetoolooza.

3Ku kitone eky'okussa ekimu aggyangako ekitundu ekiwongere Omukama n'omuliro: amasavu agabikkiridde ebyenda, na buli kyonna ekisava ekiriko,

4ensigo zombi ko amasavu gaakwo agazibikka eno nga mu ndira, n'akabubi k'oku kibumba; aggyangako amasavu ago nga bw'akola ku nsigo.

5Bino byonna batabani ba Aroni babyokeranga ku mwaliiro kungulu ku kitone eky'ekitambiro ekyokye ekiri ku nku ezikoledde, ng'ekitone ekiwonge n'omuliro, akawoowo akasanyusa Omukama.

6“ ‘Oba oli ekitone akiggye mu kisibo olw'ekitambiro eri Omukama eky'okussa ekimu, aleetanga kisajja oba kikazi, naye nga tekiriiko kamogo.

7“ ‘Bw'aweerezanga endiga, agireetanga mu maaso g'Omukama.

8Assanga omukono ku mutwe gw'ekitone kye, n'akittira mu maaso ga Weema ey'Ensisinkano. Olwo batabani ba Aroni bamansiranga omusaayi ku mwaliiro okugwetoolooza.

9Ku kitone eky'ekitambiro eky'okussa ekimu aggyangako ekitundu eky'okwokya ng'ekitambiro eri Omukama: amasavu n'ekikira kyonna ky'asalidde okumpi n'omugongo, n'amasavu agabikkiridde ebyenda, na buli kyonna ekisava ekiriko,

10ensigo zombi ko amasavu gaakwo agazibikka eno nga mu ndira, n'olububi lw'oku kibumba; aggyangako amasavu ago nga bw'akola ku nsigo.

11Kabona abyokeranga ku mwaliiro ng'ekyokulya ekiwongere Omukama n'omuliro.

12“ ‘Oba mbuzi nduusi nga gy'aweerezza, agireetanga mu maaso g'Omukama,

13n'assa omukono gwe ku mutwe gwayo, n'agittira mu maaso ga Weema ey'Ensisinkano. Batabani ba Aroni, bakabona, bamansiranga omusaayi ku mwaliiro okugwetoolooza.

14Bino by'aliggyako ng'ekitundu ekiwongere Omukama n'omuliro: amasavu agabikkiridde ebyenda, na buli kyonna ekisava ekiriko,

15ensigo zombi ko amasavu gaakwo agazibikka eno nga mu ndira, n'olububi lw'oku kibumba; aggyangako amasavu ago nga bw'akola ku nsigo.

16Kabona abyokeranga ku mwaliiro ng'ekyokulya, ekitone ekiwonge n'omuliro, akawoowo akasanyusa. “ ‘Amasavu gonna ga Mukama.

17Etteeka lino lya lubeerera mu mazadde gammwe gonna, yonna gye bali: temulyanga masavu wadde omusaayi.’ ”

← Chapter 2 Jump to: Chapter 4 →