Leviticus 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Omukama yagamba Musa nti:

2“Lagira Aroni ne batabani be nti: ‘Lino lye tteeka ly'ekitambiro ekyokye: kwe kugamba, ekitone eky'ekitambiro ekyokye kisigalanga ku kyoto ky'oku mwaliiro ekiro kyonna okutuusa enkeera, n'omuliro gw'oku mwaliiro gusigalanga gumema ku mwaliiro.

3“ ‘Kabona ayambalanga ekkanzu ey'olugoye, ne munda empale ey'olugoye, olwo n'addira evvu ly'amasavu ag'ekitambiro ekyokye, omuliro gwe gasiriizizza ku mwaliiro, n'alissa ku mabbali g'omwaliiro.

4Yeeyambulanga ebyambalo ebyasoose, n'ayambala ebyambalo ebirala, evvu ly'amasavu n'alifulumya ebweru w'olusiisira mu kifo ekirongoofu.

5Gwo omuliro gusigalanga gumema ku mwaliiro, teguzikiranga; kabona aguliikirizanga n'enku ku makya buli lunaku nga bw'assaako ekitambiro ekyokye, kungulu n'ayokerako amasavu g'ebitambiro eby'okussa ekimu.

6Omuliro ogwo gumemanga ku mwaliiro obutasalako, teguzikiranga.

7“ ‘Lino lye tteeka ly'ekitone eky'obuwunga: Batabani ba Aroni banaakireetanga mu maaso g'Omukama mu maaso g'omwaliiro:

8Kabona anaatoolangako olubatu lw'obuwunga, n'ateekamu omuzigo n'obubaani, n'abwookera ku mwaliiro ng'ekitundu kyakyo eky'ekijjukizo, ng'akawoowo akasanyusa Omukama.

9Obuwunga obusigadde Aroni ne batabani be babulyanga, naye nga temuli kizimbulukusa; buliirwanga mu kifo ekitukuvu mu luggya lwa Weema ey'Ensisinkano.

10Tebufumbibwanga nga mulimu ekizimbulukusa, kubanga gwe mugabo gwabwe gwe mbawadde ku bimpongeddwa n'omuliro. Okufaanana ng'ekitambiro olw'ekibi n'ekitambiro olw'omusango na kino kitukuvu nnyo.

11Ab'ezzadde lya Aroni abasajja bayinza okukiryako. Guno gwe mugabo gwabwe ogw'olubeerera ku biwongeddwa Omukama n'omuliro mu mazadde gaabwe gonna. Buli kyonna ekikikoonako kifuuka kitukuvu.’ ”

12Omukama yagamba Musa nti:

13“Aroni ne batabani be bino bye baliweereza Omukama ku lunaku buli omu lw'alisiigibwa: baweerezanga ekyekkumi ekya efa eky'obuwunga obukuŋŋunte obulungi ng 'ekitone eky'obuwunga eky'olubeerera; ekitundu kiweerezebwa ku nkya, ekitundu ekirala kawungeezi.

14Busiikibwanga mu lusaniya n'omuzigo. Obuleetanga nga bugoye bulungi, ekitone eky'obuwunga n'okisalaasalamu obutundu, akawoowo akasanyusa Omukama.

15Mutabani we alimusikira nga kabona omusiige y'abufumbanga. Ekitone kya kwokya kisirikke, kino gwe mugabo gw'Omukama ogw'olubeerera.

16Buli kitone kya bakabona eky'obuwunga kya kwokyanga kisirikke; tekiriibwanga.”

17Omukama yagamba Musa nti:

18“Gamba Aroni ne batabani be nti: ‘Lino lye tteeka ery'ekitambiro olw'ekibi: ekitone kya kuttirwanga mu maaso g'Omukama ebitone eby'ekitambiro ekyokye we bittirwa, anti kitukuvu nnyo.

19Kabona akiweereza akiryanga; kiriirwanga mu kifo kitukuvu, mu luggya lwa Weema ey'Ensisinkano.

20Buli kyonna ekirikoona ku nnyama yaakyo kirifuuka kitukuvu. Omusaayi gwakyo bwe gumansukiranga ku kyambalo; ekyambalo kyolezebwanga mu kifo ekitukuvu.

21Entamu ekitambiro mwe kifumbirwa eyasibwanga. Bwe kifumbirwanga mu ntamu ey'ekikomo, ekuutibwanga n'eyozebwa n'amazzi.

22Buli wa bulenzi yenna ow'omu kika kya bakabona ayinza okukiryako. Kitambiro kitukuvu nnyo.

23Naye ekitambiro kyonna olw'ebibi, omusaayi gwakyo oguyingiziddwa mu Weema ey'Ensisinkano okuddaabiriza eri mu kitukuvu, kyo tekiriibwanga, kyokebwanga ku muliro.

← Chapter 5 Jump to: Chapter 7 →