Leviticus 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1“ ‘Oli bw'aweerezanga Omukama ekitone eky'obuwunga, ky'aweereza atoolanga kya buwunga obw'eŋŋano obukuŋŋunte obulungi, n'ayiwako omuzigo n'assaako n'obubaani,

2n'abuleetera batabani ba Aroni, bakabona. Kabona aggyangako olubatu lulamba olw'obuwunga obukuŋŋunte, ko omuzigo n'obubaani, byonna n'abyokera ku mwaliiro ng'ekitundu kyakyo eky'ekijjukizo, ekitone ekiwonge n'omuliro, akawoowo akasanyusa Omukama.

3Ekinaafikkangawo ku kitone eky'obuwunga, kinaabanga kya Aroni ne batabani be, ekitundu ekitukuvu ennyo ekitone ekiwongere Omukama n'omuliro.

4“ ‘Bw'oweerezanga ekitone eky'obutta obufumbiddwa mu kyoto, obutta bubanga bwa buwunga obukuŋŋunte obulungi, nga bufumbiddwa nga bukkeeki obutazimbulukuse, nga mutabuddwaamu omuzigo; oba ng'obugaati obw'oluwewere, obutazimbulukuse, nga busiigiddwako omuzigo.

5“ ‘Bwe kibanga ekitone eky'obutta obusiikire ku lusaniya nga ky'oweerezza, obuwunga bubeerenga bukuŋŋunte bulungi, omutabikiddwa omuzigo, obutazimbulukuse.

6Omugaati ogwo ogumenyangamu obutundu, n'oyiwako omuzigo; ekyo kye kitone eky'obuwunga.

7“ ‘Bw'obanga oweereza kitone kya butta obusiikiddwa ku luggyo, kibeerenga kya buwunga obukuŋŋunte omutabikiddwa omuzigo.

8“ ‘Otwalanga ew'Omukama ekitone eky'obuwunga ekikoleddwa mu ebyo, n'okikwasa kabona, ye n'akiteeka ku mwaliiro.

9Atoolanga ku kitone n'aggyako ekitundu kyakyo eky'ekijjukizo n'akyokera ku mwaliiro, ekiwonge n'omuliro, akawoowo akasanyusa Omukama.

10Kyonna ekiba kisigaddewo ku kitone eky'obuwunga, kya Aroni ne batabani be; ekitundu ekitukuvu ennyo eky'ekitone ekiwongere Omukama n'omuliro.

11“ ‘Buli kitone eky'obuwunga kye muweereza Omukama, temugoyerangamu kizimbulukusa, kubanga ekizimbulukusa oba omubisi gw'enjuki temubyokeranga mu kitone ekiwongere Omukama n'omuliro.

12Muyinza okubiweereza ng'ebibala ebisooka, naye olwo si bya kwokera ku mwaliiro okuweerezebwa ng'akawoowo akasanyusa.

13Buli kitone kyo eky'obuwunga olungangamu omunnyo; tekibulangamu omunnyo ogw'endagaano ya Katonda wo; buli kitone kyo okirungangamu omunnyo.

14“ ‘Bw'oweerezanga Omukama ekitone eky'obuwunga, eky'ebibala byo ebisooka, kivenga ku birimba ebisooka; empeke nga nsekule ezisiikiddwa ku muliro.

15Kuno ogattangako omuzigo n'ossaako n'obubaani; kye kitone eky'obuwunga.

16Olwo kabona anaayokyanga ekitundu kyakyo eky'ekijjukizo ekivudde ku mpeke ensekule ne ku muzigo n'abyokya wamu n'obubaani bwonna; kye kitone ekiwongere Omukama n'omuliro.’ ”

← Chapter 1 Jump to: Chapter 3 →