Proverbs 18

Malagasy 2004 (DIEM PROTESTANTA)

← Chapter 17 Jump to: Chapter 19 →

1Ny tia tena dia tsy mitady afa-tsy ny tombontsoany; fa mampisafoaka azy rehefa mety fanampiana.

2Tsy mahaliana ny adala izay fahaiza-manavaka, fa ny haneho ny heviny hatrany no sitrany.

3Ny haratsiam-panahy dia mahatonga fanesoana; ary ny toetra manala baràka dia arahin-kenatra.

4Ny teny aloaky ny vavan’ny olona dia mety ho lalina toy ny ranomasina sy hamelombelona toy ny ranondriaka, ary mety ho loharanom-pahendrena.

5Tsy tsara ny miandany amin’ny olon-dratsy mba hahatonga ny marina ho resy amin’ny fitsarana.

6Mahatonga fifandirana ny tenin’ny adala, ary miantso kapoka ny zavatra lazainy.

7Fandringanan-tena ny lazain’ny adala ary fandrika ho azy ny teny ataony.

8Toa hani-matsiro ny tenin’ny mpanendrikendrika, ka any anaty kibo no mikorotsaka.

9Izay malaina amin’ny asany dia efa naman’ny mpanimba zavatra.

10Tilikambo mafy ny anaran’ny TOMPO, ka ny olo-marina miezaka ho ao dia voaaro tokoa;

11ho an’ny mpanankarena kosa dia ny fananany no toa tanàna mafy, ary heveriny ho manda avo miaro azy tokoa izany.

12Ny fireharehan’ny olona no mialoha ny faharavàny; fa ny fanetren-tena kosa mialoha ny voninahitra.

13Izay mamaly teny tsy henony akory dia hadalana sy henatra ho azy izany.

14Ny toe-panahy mavitrika dia mandresy ny aretina; fa zovy kosa no hanarina ny toe-panahy kivy?

15Ny fon’ny manan-tsaina maniry hahazo fahalalana, ary ny olon-kendry liana hihaino izany.

16Ny fanomezana dia mamoha varavarana ny mpanolotra ary mampiditra azy eo anatrehan’ny lehibe.

17Amin’ny fitsarana dia izay miteny aloha no toa marina, mandra-piavin’ny ankilany hanohitra ny voalazany.

18Ny fanontsanan-kodiakely mety mampitsahatra fifandirana ary mamaha olana eo amin’ny samy mahery.

19Sarotra kokoa noho ny mananika manda ny manatona rahalahy tafintohina; ary ny fifandirana dia mafy toy ny hidin-dapa.

20Ny vokatry ny tenin’ny olona no hamelomany tena, eny, ny vokatr’izay lazainy no hivelomany;

21ny mahafaty sy mahavelona dia miankina amin’ny teny, ka izay mankamamy miteny no hihinana ny vokany.

22Izay mahita vady mahita fahasambarana; sady mahazo fanambinana avy amin’ny TOMPO izy.

23Mitalaholaho ny mahantra, rehefa miteny; fa mihenjana kosa ny mpanankarena, rehefa mamaly.

24Izay maro namana tsy maintsy ho sahirana, nefa misy sakaiza izay mifikitra noho ny mpiray tampo aza.

← Chapter 17 Jump to: Chapter 19 →