Numbers 10

Tswana (BAEBELE e e Boitshepo) 1992

← Chapter 9 Jump to: Chapter 11 →

1Jehofa a bua le Moše, a re:

2“Itirele dinaka di le pedi tsa selefera; o di dire ka selefera se se papetlilweng ka noto; o tlaa dira ka tsone mo go bitseng phuthego, le mo go tsamayeng ga makoko.

3E re ba di letsa, a phuthego yotlhe e phuthegele kwa go wena fa mojakong wa mogope wa bophuthegelo.

4Fa ba letsa lo le longwe fela, foo dikgosana, ditlhogo tsa makgolokgolo a Iseraele, di phuthegele kwa go wena.

5E re lo letsa go opa mokgosi, makoko a a nnang ntlheng ya botlhabatsatsi a a bothologe.

6E re lo letsa mokgosi lwa bobedi, makoko a a nnang ntlheng ya borwa a a bothologe, e re go bothologwa, ba letse mokgosi.

7Mme e re phuthego e phuthwa lo letse fela, lo se ka lwa letsa go opa mokgosi.

8Baperesiti, bomorwa Arone, ke bone ba tlaa letsang dinaka; e nne molao mo go lona ka bosakhutleng go ya le dikokomana tsa lona.

9E tle e re mo lefatsheng la lona, fa lo bolola ntwa lo ya go tlhabana le mmaba yo o lo patikang, foo lo tlaa letsa mokgosi ka dinaka; mme lo tlaa gakologelwa fa pele ga Jehofa Modimo wa lona, mme lo tlaa gololwa mo babeng ba lona.

10Le gone e re mo letsatsing la go itumela ga lona, le mo medirong ya lona e e laotsweng, le mo go rogweng ga dikgwedi tsa lona, lo tlaa letsa dinaka godimo ga ditshupelo tse di fisiwang, le godimo ga ditlhabelo tsa ditshupelo tsa lona tsa kagiso; di tlaa nna segopodiso sa lona fa pele ga Modimo wa lona; ke nna Jehofa Modimo wa lona.”

11Ga dirala ya re ka ngwaga wa bobedi ka kgwedi ya bobedi, ka letsatsi la 20 la kgwedi, leru la tsholediwa la tloga fa godimo ga motlaagana wa tshupo.

12Bana ba Iseraele ba bothologa ka fa metsamaong ya bone ba tswa mo nageng ya Sinai; leru la nna mo nageng ya Parane.

13Ba tloga lwa ntlha ka fa taolong ya ga Jehofa, ka seatla sa ga Moše.

14Sa ntlha ga bothologa mokgele wa bothibelelo jwa bana ba ga Juta, ka fa masomosomong a bone; molaodi wa lesomosomo la gagwe e ne e le Našone morwa Aminatabe.

15Molaodi wa lesomosomo la lotso lwa bana ba ga Isakare e le Nethanele morwa Suare.

16Molaodi wa lesomosomo la lotso lwa bana ba ga Sebulone e le Eliabe morwa Helone.

17Motlaagana wa tlhomololwa; bomorwa Gerešone le bomorwa Merari, ba ba rweleng motlaagana, ba bothologa.

18Mokgele wa bothibelelo jwa ga Rubene wa bothologa ka fa masomosomong a bone. Molaodi wa lesomosomo la gagwe e ne e le Elisure morwa Shedure.

19Molaodi wa lesomosomo la lotso lwa bana ba ga Simeone e ne e le Shelumiele morwa Surišatai.

20Molaodi wa lesomosomo la lotso lwa bana ba ga Gate e le Eliasafe morwa Duele.

21Baknhathe ba bothologa, ba rwele ntlo e e boitshepo, ba bangwe ba tlhoma metlaagana, ba e baakanyetsa go tla ga bone.

22Mokgele wa bothibelelo jwa bana ba ga Eferaime wa bothologa ka fa masomosomong a bone; molaodi wa lesomosomo la gagwe e ne e le Elišame morwa Amihute.

23Molaodi wa lesomosomo la lotso lwa bana ba ga Manase e ne e le Gamaliele morwa Petasure.

24Molaodi wa lesomosomo la lotso lwa bana ba ga Benjamine e ne e le Abitane morwa Giteoni.

25Mokgele wa bothibelelo jwa bana ba ga Dane ba e ne e le bone tshimega ya mabothologo otlhe, wa bothologa ka fa masomosomong a bone; molaodi wa lesomosomo la gagwe e ne e le Ahiesere morwa Amišatai.

26Molaodi wa lesomosomo la lotso lwa bana ba ga Ašere e ne e le Pagiele morwa Okerane.

27Molaodi wa lesomosomo la lotso lwa bana ba ga Nafetali e le Ahira morwa Enane.

28Metsamao ya bana ba Iseraele ka fa masomosomong a bone ya nna jaana; mme ba bothologa.

29Moše a raya Hobabe morwa Reuele wa Momidiane, mogwagadia Moše, a re: “Re etele kwa Jehofa o buileng ka ga gone, a re o tlaa go re naya. Tsamaya le rona, mme re tlaa go direla molemo, gonne Jehofa o boletse molemo ka ga Iseraele.”

30A mo raya a re: “Ga ke tsamaye; ke tlaa itsamaela ke ya kwa lefatsheng la gaetsho, le kwa go bagaetsho.”

31Mme a re: “Ke a go rapela, o se ka wa re tlogela; e tswa o itse ka fa re nang le go thibelela ka teng mo nageng, o tlaa nna mo boemong jwa matlho mo go rona.

32Go tlaa diragala go re fa o tsamaya le rona, ee, go tlaa diragala go re le fa e ka nna molemo ofe o Jehofa o o re direlang, one re tlaa o direla wena.”

33Ba tswelela mosepele wa malatsi a le mararo ba tswa thabeng ya ga Jehofa; mme letlole la kgolagano ya ga Jehofa la ba etelela pele mosepele wa malatsi a le mararo, la ya go ba senkela felo ga boikhutso.

34E rile ba bothologa mo bothibelelong, leru la ga Jehofa la bo le ba okame motshegare.

35Ga dirala e ne e tle e re letlole le bothologa, Moše a re: “A ko o nanoge Jehofa, a baba ba gago ba phatlaladiwe; a ba ba go ilang ba tshabe fa pele ga gago.”

36E re le ikhutsa a re: “A ko o boe Jehofa; o boele mo makgolong a makgolokgolo a Iseraele.”

← Chapter 9 Jump to: Chapter 11 →