Numbers 25

Tswana (BAEBELE e e Boitshepo) 1992

← Chapter 24 Jump to: Chapter 26 →

1Iseraele a nna mo Sitime, mme batho ba simolola go dira boaka le bomorwadia Moabe;

2gonne ba ne ba tle ba laleletse batho ditlhabelong tsa medimo ya bone; mme batho ba ja, ba ikobela medimo ya bone.

3Iseraele a ikopanya le Baale-peore; mme bogale jwa ga Jehofa jwa tukela Iseraele.

4Jehofa a raya Moše, a re: “Tsaya bagolwane botlhe ba batho, o ba pegele Jehofa fa pele ga letsatsi, gore bogale jo bogolo jwa ga Jehofa bo fagope Iseraele.”

5Moše a raya baatlhodi ba Iseraele, a re: “A mongwe le mongwe wa lona a bolaye batho ba gagwe ba ba ikopantseng le Baale-peore.”

6Mme bonang, mongwe wa bana ba Iseraele a tla a lere mo go ba ga gabo mosadi wa Semidiane mo ponong ya ga Moše, le mo ponong ya phuthego yotlhe ya bana ba Iseraele, ba sa ntse ba lela fa mojakong wa mogope wa bophuthegelo.

7E rile Finease, morwa Eleasare, morwa Arone moperesiti a go bona, a nanoga mo gare ga phuthego, a tshola lerumo mo seatleng;

8a latela motho wa Iseraele mo loobong, a ba phololetsa ka bobedi jwa bone, monna wa Iseraele, le mosadi a mo phunya mogodu. Mme sebetso sa emisiwa mo baneng ba Iseraele.

9Ba ba suleng ka sebetso e ne e le 24 000.

10Jehofa a bua le Moše, a re:

11“Finease, morwa Eleasare, morwa Arone moperesiti, o fapositse bogale jwa me mo baneng ba Iseraele, ka a ne a le lefufa ka lefufa la me mo gare ga bone; mme ka se ka ka nyeletsa bana ba Iseraele mo lefufeng la me.

12Ke gone ka moo o bue, o re: ‘Bona, ke mo naya kgolagano ya me ya kagiso.

13E tlaa nna kgolagano e e sa khutleng mo go ene, le mo losikeng lwa gagwe morago ga gagwe, kgolagano ya boperesiti jo bo se nang bokhutlo; ka a ne a le lefufa ka go Modimo wa gagwe, a direla baba ba Iseraele tetlanyo.’ ”

14Leina la monna wa Iseraele yo o bolailweng, yo o bolailweng le mosadi wa Momidiane, e ne e le Simeri morwa Salu, kgosana ya kgotla nngwe ya borraagwe mo go Basimeone.

15Leina la mosadi wa Momidiane yo o bolailweng, e ne e le Kosebi, morwadia Sure; yoo e ne e le tlhogo ya batho ba kgotla nngwe ya borraagwe mo Midiane.

16Jehofa a bua le Moše, a re:

17“Tshwenya Bamidiane, o ba kgemethe,

18gonne ba lo tshwenya ka boferefere jwa bone, jo ba lo fepileng ka jone mo tirong ya Peore, le mo tirong ya ga Kosebi, morwadia kgosana ya Midiane, kgaitsadia bone, yo o bolailweng ka tsatsi la sebetso, mo tirong ya ga Peore.”

← Chapter 24 Jump to: Chapter 26 →