Numbers 27

Tswana (BAEBELE e e Boitshepo) 1992

← Chapter 26 Jump to: Chapter 28 →

1Foo ga atamela bomorwadia Selofehate, morwa Hefere, morwa Gileate, morwa Makire, morwa Manase, ba ditshika tsa ga Manase morwa Josefe; a ke maina a bomorwadie: Mahele, Noa, Hogela Mileka le Tiresa.

2Ba ema fa pele ga Moše, le fa pele ga Eleasare moperesiti, le fa pele ga dikgosana tsa phuthego fa mojakong wa mogope wa bophuthegelo, ba re:

3“Rraetsho o ne a swela mo nageng, a se mo lesomong la ba ba neng ba phuthegela go ganela le Jehofa mo lesomong la ga Kora, mme a swela mo boleong jwa gagwe ka esi; o ne a se na bana ba basimane.

4Ana leina la rraetsho le tlaa bo le tlosediwang mo losikeng lwa gagwe, ka a ne a se na ngwana wa mosimane? Re neyeng boswa mo go bomorwa rraetsho.”

5Moše a isa mafoko a bone fa pele ga Jehofa.

6Jehofa a bua le Moše, a re:

7“Bomorwadia Selofehate ba bua ka tshiamo; ruri o ba neye boswa jwa thuo mo go bomorwa rraabo, o dire gore boswa jwa ga rraabo bo fetele mo go bone.

8O bue le bana ba Iseraele o re: ‘Fa motho a swa a se na ngwana wa mosimane, foo lo dire gore boswa jwa gagwe bo fetele mo go morwadie.

9Fa a se na ngwana wa mosetsana, foo boswa jwa gagwe lo tlaa bo naya bomorwa rraagwe.

10Fa a se na bomorwa rraagwe, foo boswa jwa gagwe lo bo neye borangwanaagwe.

11Fa rraagwe a se na borangwanaagwe, foo boswa jwa gagwe lo bo neye tsala ya gagwe ya losika lwa gagwe e e gaufi bogolo nae ka go tsalwa, ke ene yo o tlaa bo ruang; e nne molao wa katlholo mo baneng ba Iseraele, jaaka Jehofa a laotse Moše.’ ”

12Jehofa a raya Moše, a re: “Tlhatlogela mo thabeng e ya Abarime, o bone lefatshe le ke le neileng bana ba Iseraele.

13O tlaa re o sena go le bona le wena o tlaa kopanngwa le batho ba gaeno, jaaka Arone mogoloo a ne a kopanngwa,

14gonne lo no lwa tsuololela lefoko la me mo nageng ya Tsine mo kgannyeng ya phuthego, lwa gana go intshepisa fa pele ga matlho a bone fa metsing.” Ao ke metsi a Meriba wa Kateše mo nageng ya Tsine.

15Moše a bua le Jehofa, a re:

16“A Jehofa, Modimo wa mewa ya nama yotlhe, a tlhome motho go nna tlhogo ya phuthego e,

17yo o ka tswang fa pele ga bone a ba a tsena fa pele ga bone; yo o ka ba bolotsang a ba a ba gorosa; gore phuthego ya ga Jehofa e se nne jaaka dinku tse di se nang modisa.”

18Jehofa a raya Moše a re: “Tsaya Jošua morwa Nune, motho yo mowa o mo go ene, o beye seatla sa gago mo go ene;

19o mmeye fa pele ga Eleasare moperesiti, le fa pele ga phuthego yotlhe; o mo laye mo ponong ya bone,

20le tlotlo ya gago o e beye mo go ene, gore phuthego yotlhe ya Iseraele e ineele mo kutlong.

21A a eme fa pele ga Eleasare moperesiti, yo o tla mmoletsang ka katlholo ya Urime fa pele ga Jehofa; a ba bolole ka lefoko la gagwe ba be ba goroge ka lefoko la gagwe, ene le bana ba Iseraele botlhe, e bong phuthego yotlhe fela.”

22Moše a dira jaaka Jehofa a mo laotse, a tsaya Jošua, a mmaya fa pele ga Eleasare moperesiti, le fa pele ga phuthego yotlhe;

23a baya diatla tsa gagwe mo go ene, a mo laya, jaaka Jehofa a buile ka seatla sa ga Moše.

← Chapter 26 Jump to: Chapter 28 →