Numbers 20

Tswana (BAEBELE e e Boitshepo) 1992

← Chapter 19 Jump to: Chapter 21 →

1Ka kgwedi ya ntlha phuthego yotlhe ya bana ba Iseraele, ya fitlha kwa sekakeng sa Tsine, mme batho ba nna mo Kateše; Miriame a swela teng a ba a fitlhwa teng.

2Phuthego ya bo e se na metsi; mme ba phuthegela Moše le Arone.

3Batho ba ganela le Moše, ba bua ba re: “A bo Modimo o ka bo o mmile ra swa jale ka bagarona ba swela fa pele ga Jehofa.

4E bile lo lereditseng phuthego ya ga Jehofa mo nageng e, fa e bo ne ne re swela fano, rona le dikgomo tsa rona?

5Lo re patikile ka ntlha yang go tlhatloga kwa Egepeto go re lere mo felong fano fa go bosula? Ga se felo ga dipeo, le fa e le ga difeige, le fa e le ga mafine, le fa e le digaranata, le gone ga go na metsi a a nowang.”

6Moše le Arone ba tswa fa pele ga phuthego ba ya fa pele ga mojako wa mogope wa bophuthegelo, ba wela fa fatshe ka difatlhogo; mme kgalalelo ya ga Jehofa ya ba bonalela.

7Jehofa a bua le Moše a re:

8“Tsaya thobane o phuthe phuthego, wena le Arone mogoloo, lo bue le lefika fa pele ga matlho a bone, gore le ntshe metsi a lone; mme o tlaa ntshetsa metsi kwa go bone, a tswa mo lefikaeng; jalo o tlaa nosa phuthego le dikgomo tsa bone metsi.”

9Moše a tsaya thobane fa pele ga Jehofa, a e tsaya jaaka a mo laetse.

10Moše le Arone ba phuthela phuthego fa pele ga lefika, mme ene a ba raya, a re: “Utlwang jaana, batsuolodi ke lona, a re tlaa lo ntshetsa metsi mo lefikeng le?”

11Moše a tsholetsa letsogo, a itaya lefika ka thobane ya gagwe gabedi; metsi a tswa a le matona thata, mme phuthego ya nwa, le dikgomo tsa bone.

12Jehofa a raya Moše le Arone a re: “E re ka lo se ka lwa ntumela go intshepisa fa pele ga matlho a bana ba Iseraele, ke gone lo se ketlang lo fitlhisa phuthego e mo lefatsheng le ke le ba neileng.”

13Ke one metsi a Meriba, kwa bana ba Iseraele ba neng ba ganela le Jehofa mme a itshupa a le boitshepo mo go bone.

14Moše a roma barongwa ba tswa mo Kateše ba ya kwa kgosing ya Etome, a re: “Morwa rraago, e bong Iseraele, o bua jaana a re: O a e itse tapisego yotlhe e e re wetseng,

15jaaka borraetsho ba kile ba fologela kwa Egepeto, mme ra aga mo Egepeto ka lobaka lo loleele, Baegepeto ba re direla maswe, rona le borraetsho;

16e rile re goela kwa go Jehofa a utlwa lentswe la rona, a roma moengele a re ntsha mo Egepeto; bona, re mo Kateše motse o o kwano bokhutlong jwa molelwane wa gago.

17Ke a rapela, mma re fete, re ralale lefatshe la gago; ga re ketla re ralala lotlhagare le fa e le tshimo ya mafine, le gone ga re ketla re nwa metsi a didiba; re tlaa feta ka tsela e kgolo ya kgosi fela, ga re ketla re fapogela ka fa ntlheng ya le legolo, le fa e le ka fa go la molema, go tsamaye re fapaanye molelwane wa gago.”

18Etome a mo raya a re: “O se ka wa nthalala, nka tla ka go bololela ka tšhaka.”

19Bana ba Iseraele ba mo raya ba re: “Re tlaa tlhatloga ka tsela e kgolo fela, mme fa re nwa metsi a gago, nna le dikgomo tsa me, foo ke tlaa go naya madi a one; ntesa fela ke ralale ka dinao, ke sa dire sepe se sele.”

20Mme a re: “O se ka wa ralala.” Mme Etome a mmololela ka batho ba le bantsi, le ka letsogo le le thata.

21Jalo Etome a gana go naya Iseraele tsela go ralala molelwane wa gagwe; foo Iseraele a mo fapoga.

22Ba tloga ba tswa mo Kateše; mme bana ba Iseraele, e bong phuthego yotlhe ya fitlha fa thabeng ya Hore.

23Jehofa a bua la Moše le Arone mo thabeng ya Hore, fa molelwaneng wa Etome a re:

24“Arone o tlaa kopanngwa le ba ga gabo, gonne ga a ketla a tsena mo lefatsheng le ke le neileng bana ba Iseraele, ka lo ne lwa tsuololela lefoko la me kwa metsing a Meriba.

25Tsaya Arone le Eleasare morwawe, o ba tlhatlose mo thabeng ya Hore;

26o apole Arone diaparo tsa gagwe, o di apese Eleasare morwawe; Arone o tlaa kopanngwa le ba ga gabo, a bo a swela gone.”

27Moše a dira jaaka Jehofa a laotse; ba palama thaba ya Hore mo ponong ya phuthego yotlhe.

28Moše a apola Arone diaparo tsa gagwe, a di apesa Eleasare morwawe; Arone a swela teng mo godimo ga thaba; Moše le Eleasare ba fologa mo thabeng.

29E rile phuthego yotlhe e bona fa Arone a sule, ba lelela Arone ka malatsi a le 30, e bong makgotla otlhe a Iseraele.

← Chapter 19 Jump to: Chapter 21 →