Numbers 13

Tswana (BAEBELE e e Boitshepo) 1992

← Chapter 12 Jump to: Chapter 14 →

1Jehofa a bua le Moše, a re:

2“Roma banna ba ye go tlhola lefatshe la Kanana le ke le nayang bana ba Iseraele. A go rongwe monna a le mongwe fela wa lotso longwe le longwe lwa borra ba bone, mongwe le mongwe e le kgosana mo go bone.”

3Moše a ba roma ba tswa mo nageng ya Parane ka fa taolong ya ga Jehofa; botlhe e le batho ba e leng ditlhogo tsa bana ba Iseraele.

4Maina a bone ke a: Wa lotso lwa ga Rubene e ne e le Shamua morwa Sakure;

5wa lotso lwa ga Simeone e le Shafate morwa Hori,

6wa lotso lwa ga Juta e le Kalebe morwa Jefune,

7wa lotso lwa ga Isakare e ne e le Igale morwa Josefe;

8wa lotso lwa ga Eferaime e ne e le Hosea morwa Nune,

9wa lotso lwa ga Benjamine e ne e le Paleti morwa Rafu,

10wa lotso lwa ga Sebulone e ne e le Gadiele morwa Sodi,

11wa lotso lwa ga Josefe, e bong wa lotso lwa ga Manase, e le Gadi morwa Susi,

12wa lotso lwa ga Dane e ne e le Amiele morwa Gemali,

13wa lotso lwa ga Ašere e ne e le Sethure morwa Mikaele,

14wa lotso lwa ga Nafetali e ne e le Nabi morwa Fofasi,

15wa lotso lwa ga Gate e ne e le Guele morwa Maki.

16Ke one maina a banna ba Moše o ne a ba roma ba ya go tlhola lefatshe. Moše a raya Hosea morwa Nune leina a re, Jošua.

17Moše a ba roma ba ya go tlhola lefatshe la Kanana, mme a ba raya a re: “Lo tlhatloge ka tsela e, ya Borwa, mme lo tlhatlogele mo dithabeng.

18Lo bone lefatshe gore le ntse jang; le batho ba ba agileng teng, gore a ba thata, kgotsa ba bokoa, a ba babotlana, kgotsa ba bantsi.

19Le lefatshe le ba agileng mo go lone, gore le ntse jang: a le molemo kgotsa le bosula; le metse e ba agileng mo go yone, gore e ntse jang: a ba agile mo megopeng, kgotsa mo dikagong tse di thata.

20Le lefatshe gore le ntse jang: a le na le monono kgotsa bokodue, a le na le ditlhare kgotsa nnyaa. Mme lo nne pelokgale, lo tle lo tshotse maungo a lefatshe.” Lobaka ya bo e le lobaka lwa mabutswapele a mefine.

21Jalo ba tlhatloga, ba tlhola lefatshe go simolola ka naga ya Tsine go ya kwa Rehobe, go ya botsenong jwa Hamathe.

22Ba tlhatloga ka fa ntlheng ya Borwa, ba tla mo Heberone; bo-Ahimane le Shešai le Talemai, bana ba ga Anake, ba bo ba le gone. (Jaana Heberone o ne a agilwe dinyaga di supa pele ga Soane o o mo Egepeto.)

23Ba fitlha mo molatšaneng wa Ešekole, ba kgaola gona kala e e nang le lerose le lengwe fela la loungo lwa mofine, ba le sikara ka thobane ba le babedi; le gone ba tshola digaranate le difeige.

24Felo foo go ne go bidiwa molatšana wa Ešekole ka ntlha ya lerose le bana ba Iseraele ba le kgaotseng gone.

25Ba hulara kwa go tlholeng lefatshe go sena go feta malatsi a le 40.

26Ba tsamaya ba fitlha kwa go Moše le kwa go Arone, le mo phuthegong yotlhe ya bana ba Iseraele, mo nageng ya Parane, kwa Kateše; ba tla le lefoko kwa go bone, le kwa phuthegong yotlhe, mme ba ba supetsa loungo lwa lefatshe.

27Ba ba kakanyetsa ba re: “Re ile ra fitlha mo lefatsheng le o re romileng kwa go lone; ruri le ela maši le dinotshe; lo ke lone loungo lwa lone.

28Le fa go ntse jalo batho ba ba agileng mo lefatsheng leo ba thata, le metse e thekeleditswe ka dithako, e bile e megolo thata; gape re bonye bana ba ga Anake teng.

29Baamaleke ba agile mo lefatsheng la Borwa; Bahite, Bajebuse le Baamore ba agile mo dithabeng, le Bakanana ba agile fa lewatleng, ba bile ba bapile le noka ya Joretane.”

30Kalebe a kgaodisa batho fa pele ga Moše a re: “A re tlhatlogeng ka bonako re yeng go le rua, gonne re nonofile sentle fela go le fenya.”

31Banna ba ba neng ba tlhatlogile nae ba re: “Ga re a nonofa go ya go tlhabana le batho bao, gonne ba thata bogolo go rona.”

32Lefatshe le ba tswang go le tlhola ba le bolela ka bosula mo baneng ba Iseraele ba re: “Lefatshe le re le raletseng re le tlhola, ke lefatshe le le kometsang banni ba lone; batho botlhe ba re ba bonyeng mo go lone ke batho ba ba godileng thata.

33Le mekaloba re e bonye gone, bana ba ga Anake, ba ba tswang mo go bone mekaloba; mme mo ponong ya rona ka rosi ra bo re ntse jaaka tsiakgope fela, le mo ponong ya bone re ne re ntse jalo.”

← Chapter 12 Jump to: Chapter 14 →