Numbers 18

Tswana (BAEBELE e e Boitshepo) 1992

← Chapter 17 Jump to: Chapter 19 →

1Jehofa a raya Arone a re: “Wena le bomorwao, le ba kgotla ya ga rraago ba na nao, lo tlaa rwala tshiamologo ya felo ga boitshepo; mme wena le bomorwao nao lo tlaa rwala tshiamologo ya boperesiti jwa lona.

2Le bone bomonnao, e bong lotso lwa ga Lefi, lotso lwa ga rraago, o ba atametse nao gore ba kopanngwe nao, mme ba go direle; wena le bomorwao nao lo nne fa pele ga mogope wa tshupo.

3Mme a ba tshegetse tebelo ya gago le tebelo ya Mogope otlhe, fa e se gore ba se ka ba atamela dilwana tsa felo ga boitshepo le sebeso, gore ba se ka ba swa bone le lona.

4Ba kopanngwe nao, ba tshegetse tebelo ya mogope wa bophuthegelo ka ga tirelo yotlhe ya Mogope; moeng a se ka a atamela kwa go lona.

5Tebelo ya felo ga boitshepo lo tlaa e tshegetsa lotlhe, le tebelo ya sebeso, gore go se tlhole go nna bogale mo baneng ba Iseraele.

6Nna, bonang, ke tshotse bomonnaalona, e bong Balefi, mo baneng ba Iseraele, lo ba neilwe, e le mo go neilweng Jehofa, go tla ba dira tirelo ya mogope wa bophuthegelo.

7Wena le bomorwao nao lo tshegeletse sengwe le sengwe sa sebeso boperesiti jwa lona, le se se kwa teng ga sesiro; mme lo tlaa direla; ke lo naya boperesiti e le tirelo ya neo; mme moeng yo o atamelang a bolawe.”

8Jehofa a bua le Arone a re: “Nna, ke go neile tebelo ya ditshupelo tsa me tsa tsholetso, e bong dilo tsotlhe tse di itshepileng tsa bana ba Iseraele, ke di neile wena ka ntlha ya tlolo, le bomorwao, e le tshiamelo ya bone ka bosakhutleng.

9Mo e tlaa nnang ga gago ga dilo tse di boitshepo jo bo itshepileng, mo go siilweng mo molelong ke mo: Seromololo sengwe le sengwe sa bone, e bong tshupelo nngwe le nngwe ya bone ya boupe, le tshupelo nngwe le nngwe ya bone e e fisiwang, le tshupelelo nngwe le nngwe ya bone ya molato, e ba tlaa e nkisetsang, e tlaa nna boitshepo jo bo itshepetseng wena le bomorwao.

10O tlaa ja ga tsone jaaka dilo tse di boitshepo jo bo itshepileng; lonna lotlhe lo tlaa ja ga tsone, go tlaa go itshepela.

11“Sa gago ke se, tshupelo ya tsholetso ya neo ya bone, e bong ditshupelo tsotlhe tsa mofoko tsa bana ba Iseraele; ke di neile wena, le bomorwao, le bomorwadio nao, e le tshiamelo ka bosakhutleng; mongwe le mongwe yo o itshekileng mo ntlong ya gago a je ga tsone.

12“Lookwane lo lontle bogolo, le mefine e mentle bogolo, le mabele, e bong mabutswapele a tse ba di nayang Jehofa, ke di go neile.

13Mabutswapele a loungo lotlhe lo lo mo lefatsheng la bone, a ba a leretseng Jehofa, a tlaa nna a gago; mongwe le mongwe yo o itshekileng mo ntlong ya gago a a di je.

14Sengwe le sengwe se se tshwaetsweng Jehofa mo Iseraele, e nne sa gago.

15Sengwe le sengwe se go itibolwang ka sone, sa nama yotlhe e ba e isetsang Jehofa, sa motho le sa kgomo, e nne sa gago; le fa go ntse jalo motsalwapele wa motho, ruri o mo rekolole; le setsalwapele sa ditshedi, tse di itshekologileng, o se rekolole.

16Tse di nang le go rekololwa mo go tsone, o simolole go di rekolola di le kgwedi e le nngwe fela mo go tsalweng, ka fa tshekatshekong ya gago, ka madi a dipapetlana tsa selefera di le tlhano, ka fa selekanyong sa felo ga boitshepo.

17Leitibolo la kgomo le leitibolo la nku le leitibolo la podi, o se ka wa a rekolola; a boitshepo; kgatsha madi a one mo sebesong, mme o fise mahura a one e le tshupelo e e dirwang ka molelo, ya monko o o monate mo go Jehofa.

18Nama ya one e nne ya gago, jaaka sehuba se se fokwang, le jaaka serope sa ka fa tsogong le legolo, e nne tsa gago.

19Ditshupelo tsa tsholetso tsotlhe tsa dilo tse di itshepileng, tse bana ba Iseraele ba di isetsang Jehofa, ke di neile wena, le bomorwao le bomorwadio nao; e le tshiamelo ka bosakhutleng; ke kgolagano ya letswai ka bosakhutleng fa pele ga Jehofa, go wena le losika lwa gago nao.”

20Jehofa a raya Arone, a re: “O se ka wa rua boswa bope mo lefatsheng la bone, le gone o se ka wa nna le kabelo epe mo go bone. Ke nna kabelo ya gago, le boswa jwa gago, mo baneng ba Iseraele.

21“Bana ba ga Lefi bone ke ba neile tsotlhe tsa bosome mo Iseraele go nna boswa jwa bone, go emela tirelo e ba e direlang, e bong tirelo ya mogope wa bophuthegelo.

22Go tloga fano a bana ba Iseraele ba se tlhole ba atamela mogope wa bophuthegelo, gore ba se ka ba rwala boleo, mme ba swa.

23Mme Balefi ba dire tirelo ya mogope wa bophuthegelo, ba rwale tshiamologo ya bone; a e nne molao ka bosakhutleng go ya le dikokomana tsotlhe tsa lona, mo baneng ba Iseraele ba se ka ba nna le boswa bope;

24gonne tsa bosome tsa bana ba Iseraele tse ba di isetsang Jehofa tshupelo ya tsholetso, ke di neile Balefi go nna boswa; ke gone ka moo ke ba reileng ka re, mo baneng ba Iseraele ba se ka ba dira le boswa bope.”

25Jehofa a bua le Moše a re:

26“Gape, bua le Balefi, o ba reye o re: E ne e re mogang lo tsayang mo baneng ba Iseraele tsa bosome tse ke di lo neileng di tswa mo go bone gore e nne boswa jwa lona, foo lo tlaa isa ga tsone tshupelo ya tsholetso mo go Jehofa, sa bosome sa tsa bosome.

27Tshupelo ya lona ya tsholetso lo tlaa e balelwa jaaka ekete ke mabele a sebupi sa pholelo, le jaaka botlalo jwa kgatisetso ya bojalwa jwa mofine.

28Le lona lo isetse Jehofa tshupelo ya tsholetso e le ya tsa bosome tsotlhe tsa lona tse lo di amogelang mo baneng ba Iseraele; ga tsone lo neye Arone moperesiti tshupelo ya tsholetso ya ga Jehofa.

29Ga dineo tsa lona tsotlhe lo ise tshupelo nngwe le nngwe ya ga Jehofa ya tsholetso, ga mo go gontle bogolo mo go tsone, e bong mo go itshepileng ga tsone.

30Ke gone o ba reye o re: Mogang lo tsholetsang mo go gontle bogolo, foo go balelwe Balefi jaaka totafalo ya sebupi sa pholelo, le jaaka totafalo ya kgatisetso ya bojalwa jwa mofine.

31Lo tlaa se ja mo felong gongwe le gongwe, lona le ba matlo a lona, gonne ke tuelo ya lona e e emelang tirelo ya lona mo mogopeng wa bophuthegelo.

32Lo tlaa bo lo sa rwale boleo bope ka ga sone, fa lo sena go tsholetsa mo go gontle bogolo ga sone; lo tlaa bo lo sa tlhapatse dilo tse di itshepileng tsa bana ba Iseraele, gore lo se swe.”

← Chapter 17 Jump to: Chapter 19 →