Numbers 21

Tswana (BAEBELE e e Boitshepo) 1992

← Chapter 20 Jump to: Chapter 22 →

1Mme Mokanana, kgosi ya Arate yo o neng a agile ntlheng ya borwa, a utlwa go twe Iseraele o tla ka tsela ya Atharime; a tlhabana le Iseraele, a tshwara bangwe ba bone.

2Iseraele a ikanela Jehofa ka ikano, a re: “Fa ruri o tlaa ntsenya tšhaba e mo seatleng, foo metse ya bone ke tlaa e senyetsa ruri.”

3Jehofa a reetsa lentswe la Iseraele, a ba neela Bakanana; ba ba senyetsa ruri le metse ya bone; leina la felo foo la bidiwa ga twe, Horema.

4Ba tloga ba tswa fa thabeng ya Hore ka tsela e e yang Lewatleng le Lehibidu, go potologa lefatshe la Etome; mowa wa batho wa ngodiega thata ka ntlha ya tsela.

5Batho ba kgobotla Modimo le Moše, ba re: “Lo re tlhatloseditseng kwa Egepeto re tla go swela mo nageng? Gonne ga go na dijo, ga go na metsi; mowa wa rona o nkgelwa sebodu ke dijo tse di motlhofo tse.”

6Jehofa a roma dinoga tse di bolayang mo go bone, mme tsa loma batho ba Iseraele ba swa ba le bantsi.

7Batho ba ya kwa go Moše ba re: “Re leofile, ka re buile ka go kgobotla Jehofa le wena; rapela Jehofa gore a tlose dinoga mo go rona.” Moše, a rapelela batho.

8Jehofa a raya Moše, a re: “Itirele noga ya kgotlho o e pege mo mokgorong; go tlaa dirafala gore mongwe le mongwe yo o lomilweng, o tlaa re a e bona a tshele.”

9Moše a dira noga ya kgotlho, a e pega mo mokgorong, ga dirala e ne e re fa noga e lomile motho mongwe, e re a leba noga ya kgotlho a tshele.

10Bana ba Iseraele ba tsamaya, ba ya ba thibelela mo Obothe.

11Ba tloga ba tswa Obothe, ba thibelela kwa Iye-abarime, mo nageng e e fa pele ga Moabe, ntlheng ya botlhabatsatsi.

12Ba tloga ba tswa teng, ba thibelela mo molapong wa Serete.

13Ba tloga ba tswa gone, ba tlhoma kwa moseja ga Arenone o o mo nageng e e tswang mo molelwaneng wa Baamore, gonne Arenone ke molelwane wa Moabe, fa gare ga Moabe le Baamore.

14Ke gone ka fa go builweng ka gone mo lokwalong lwa Dintwa tsa ga Jehofa, ga twe: “Wahebe mo Sufa, le melapo ya Arenone,

15le kinamelo ya melapo e e lebang kwa bonnong jwa Are, e ikamile molelwane wa Moabe.”

16Go tloga foo ba ya kwa Beere; ke sone sediba se Jehofa o buileng le Moše ka ga sone, a re: “Phutha batho, mme ke tlaa ba naya metsi.”

17Foo Iseraele a opela sehela se, a re: “Biloga wena sediba! Lo se opeleleng!

18Sediba se dikgosana di se epileng, se bagolwane ba batho ba se phuntseng ka thobane ya bogosi le ka dikepu tsa bone.” Go tswa nageng eo ba ya kwa Matana;

19go tswa Matana ba ya kwa Nahaliele; go tswa kwa Nahaliele ba ya kwa Bamothe;

20go tswa Bamothe ba ya kwa molapong o o mo nageng ya Moabe go ya kwa tlhoreng ya Pisega, o o okameng sekaka.

21Iseraele a roma barongwa kwa go Sihone kgosi ya Baamore, a re:

22“Mma ke ralale lefatshe la gago; ga re ketla re fapogela mo lotlhagareng kgotsa mo tshimong ya mafine; ga re ketla re nwa metsi a didiba; re tlaa feta ka tsela e kgolo ya kgosi go tsamaya re fapaanya molelwane wa gago.”

23Mme Sihone a gana go leseletsa Iseraele go tlola molelwane wa gagwe. Sihone a phutha batho ba gagwe botlhe, a bololela Iseraele kwa nageng, ba fitlha kwa Jahase, mme a tlhabana le Iseraele.

24Iseraele a mo kgemetha ka bogale jwa tšhaka, a rua lefatshe la gagwe go tswa Arenone go ya Jaboke, e bong kwa go bana ba ga Amone, gonne molelwane wa bana ba ga Amone o ne o le thata.

25Iseraele a thopa metse eo yotlhe, mme Iseraele a thopa metse eo yotlhe, mme Iseraele a aga mo metseng yotlhe ya Baamore, mo Hešebone le mo metseng yotlhe ya teng.

26Gonne Hešebone e ne e le motse wa ga Sihone kgosi ya Baamore, yo o ne a tlhabanye le kgosi ya Moabe ya pele, mme a mo tseetse lefatshe la gagwe lotlhe fela, e bong go ya kwa Arenone.

27Ke gone ka moo, ba ba tlhabang diane ba tle ba re: “Tlang mo Hešebone, a motse wa ga Sihone o agiwe o tlhomamisiwe:

28Gonne go dule molelo mo Hešebone, le kgabo ya molelo mo motseng wa ga Sihone; o laitse Are wa Moabe, barena ba mafelo a godimo a Arenone.

29A bo go latlhega wena Moabe; lo nyeleditswe lona batho ba ga Kemoše: o ntshitse bomorwawe jaaka bafaladi, le bomorwadie o ba neetse mo botshwarong ba ya kwa go Sihone kgosi ya Baamore.

30Re ba hudile, Hešebone o senyegile go ya kwa Dibone, re swafaditse lefatshe go ya kwa Nofa, o o fitlhang kwa Meteba.”

31Jalo Iseraele a aga mo lefatsheng la Baamore.

32Moše a roma a ya go tlhola Jasere, mme ba thopa metse ya gone, ba leleka Baamore ba teng.

33Ba menoga, ba tlhatloga ka tsela ya Bašane; Oge kgosi ya Bašane a ba bololela, ene le batho botlhe ba gagwe, ba tlhabana nabo kwa Eterei.

34Mme Jehofa a raya Moše a re: “O se ka wa mmoifa, gonne ke mo tsentse mo seatleng sa gago, le batho botlhe ba gagwe, le lefatshe la gagwe; o tlaa mo direla jaaka o diretse Sihone kgosi ya Baamore yo o neng a agile mo Hešebone.”

35Jalo ba mo kgemetha, ene le bomorwawe le batho ba gagwe botlhe fela, a ba a tla a se ka a salelwa ke ope; mme ba rua lefatshe la gagwe.

← Chapter 20 Jump to: Chapter 22 →