Numbers 4

Tswana (BAEBELE e e Boitshepo) 1992

← Chapter 3 Jump to: Chapter 5 →

1Jehofa a bua le Moše le Arone, a re:

2“Dirang palo ya bomorwa Kohathe mo go bomorwa Lefi, ka ditshika tsa bone, ka dikgotla tsa borra ba bone,

3go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50; botlhe ba ba tsenang mo tirelong ba ya go dira tiro ya mogope wa bophuthegelo.

4E ke yone tirelo ya bomorwa Kohathe mo mogopeng wa bophuthegelo, mo dilong tse di boitshepo jo bo itshepileng:

5Fa thibelelo e tloga, Arone a a tsene le bomorwawe, ba pagolole sesiro sa sebipo, ba bipe letlole la tshupo ka sone.

6A ba beye mo go lone sekhurumetso sa matlalo a manyebi, ba e apese letsela la bobududu fela, mme ba tsenye disikaro tsa lone.

7Mo lomating lwa bojelo lwa senkgwe sa tshupelo, a ba ale letsela le le bobududu, ba itse go baya mo go lone dijana, dintshwana, megotswana, dinwelo tse go thelwang ka tsone; le senkgwe sa metlha yotlhe a se nne mo go lone.

8A ba ale mo godimo ga tsone letsela le le bohibidu jo bo letlhololo, ba le apese sekhurumetso sa matlalo a manyebi, ba tsenye disikaro tsa lone.

9“A ba tseye letsela le le bobududu, ba apese setlhomo sa dipone ka lone, le dilampa tsa sone, dipoma tsa sone, dipomelo tsa sone, le dilwana tsa sone tsa lookwane tse ba se direlang ka tsone.

10A ba tsenye sone le dilo tsotlhe tsa sone mo teng ga sekhurumetso sa matlalo a manyebi, ba se beye mo sefateng.

11“Mo sebesong sa gouta a ba ale letsela le le bobududu, ba se apese matlalo a manyebi, ba tsenye disikaro tsa sone.

12A ba tseye dilwana tsotlhe tsa tirelo, tse ba direlang ka tsone mo felong ga boitshepo, ba di tsenye mo letseleng le le bobududu, ba di apese sekhurumetso sa matlalo a manyebi, ba di beye mo sefateng.

13Ba ole molora mo sebesong, ba apese sebeso letsela le le bohibidu jo bo mokgona;

14ba beye mo go sone dilwana tsotlhe tsa sone, tse ba direlang ka tsone fa go sone, diolela molelo, le dikgoge tsa nama, le digopa melora, le megotswana le dilwana tsotlhe tsa sebeso; ba beye sekhurumetso sa matlalo a manyebi mo go sone ba se tsenye disikaro tsa sone.

15E tlaa re Arone le bomorwawe ba sena go wetsa go bipa felo ga boitshepo, le dilwana tsotlhe tse di nnang mo felong ga boitshepo, jaaka fa ba bothibelelo ba bothologa; morago ga mo, a bomorwa Kohathe ba go rwale; mme ba se ka ba ama felo ga boitshepo, ba ka tla ba swa. Dilo tse ke tsone morwalo wa bomorwa Kohathe tsa mogope wa bophuthegelo.

16“Tebelo ya ga Eleasare morwa Arone moperesiti, e nne lookwane lwa dipone, maswalo a a nkgang monate, tshupelo ya boupe ya metlha yotlhe, lookwane lo lo tlolwang, ke gore, tebelo ya motlaagana otlhe fela, le ya dilo tsotlhe tse di mo go one, le felo ga boitshepo, le dilwana tse di nnang gone.”

17Jehofa a bua le Moše le Arone, a re:

18“Lo se ka lwa kgaola lotso lwa ditshika tsa Bakohathe mo go Balefi;

19mme lo ba direle jaana, gore ba tshele, ba se ka ba a swa, mogang ba atamelang kwa dilong tse di boitshepo jo bo itshepileng. A Arone a tsene le bomorwawe, mme ba kaele mongwe le mongwe wa bone tiro ya gagwe le morwalo wa gagwe.

20Ba se ka ba tsena ba ya go bona felo ga boitshepo, le fa e le ka ponyo e le nngwe fela, ba ka tla ba swa.”

21Jehofa a bua le Moše, a re:

22“O bo o dire palo le ya bomorwa Gerešone, ka dikgotla tsa borra ba bone, ka ditshika tsa bone,

23go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, o ba bale: botlhe ba ba tsenang ba ya go lebelela tirelo, go dira tiro ya mogope wa bophuthegelo.

24E ke tiro ya ditshika tsa Bagerešone, mo go direleng le mo go rwaleng merwalo.

25A ba rwale matsela a a lepelelang a motlaagana, le mogope wa bophuthegelo, sekhurumetso sa one, le sekhurumetso sa matlalo a manyebi se se kwa godimo ga sone, le sebipo sa mojako wa mogope wa bophuthegelo,

26le dilepelelo tsa lolwapa, le sebipo sa setswalo sa kgoro ya lolwapa, lo lo ka fa motlaaganeng, le fa sebesong, mo tikologong ya sone, le megala ya lone, le dilo tsotlhe tsa tirelo ya bone, ba tlaa dira tsotlhe tse di tlhokegang go direlwa dilo tse.

27Tirelo yotlhe ya bomorwa Bagerešone e tlaa nna mo taolong ya ga Arone le bomorwawe, mo go rwaleng ga bone gotlhe fela, le mo tirelong yotlhe ya bone; mme bone ba ba mo tebelong lo tlaa ba kaela merwalo yotlhe ya bone.

28E ke yone tirelo ya ditshika tsa bomorwa Bagerešone mo mogopeng wa bophuthegelo; tebelo ya bone e nne mo seatleng sa ga Ithamare morwa Arone moperesiti.

29“Ka ga bomorwa Merari, o ba bale ka ditshika tsa bone, ka dikgotla tsa borra ba bone.

30O ba bale go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo o tsenang mo tirelong, a dira tiro ya mogope wa bophuthegelo.

31E ke yone tebelo ya morwalo wa bone, ka fa tirelong yotlhe ya bone mo mogopeng wa bophuthegelo; dimati tsa motlaagana le merapalego ya one, maotwana a one, le ditlhako tsa one;

32le maotwana a lolwapa mo tikologong, ditlhako tsa one, le dimapo tsa one, megala ya one, le dilo tsotlhe tsa one ka tirelo yotlhe ya one; lo bale ka maina dilo tsa tebelo ya morwalo wa bone.

33E ke yone tirelo ya ditshika tsa bomorwa Merari, ka fa tirelong yotlhe ya bone, mo mogopeng wa bophuthegelo, e le mo seatleng sa ga Ithamare morwa Arone moperesiti.”

34Moše le Arone le dikgosana tsa phuthego ba bala bomorwa Bakohathe ka ditshika tsa bone, le ka dikgotla tsa borra ba bone.

35Go simolola ka ba ba dinyaga di 30 go ya kwa bomogoloa bone, kwa go ba ba dinyaga di 50, mongwe le mongwe yo o neng a tsena mo tirelong, a ya go dira mo mogopeng wa bophuthegelo;

36ba ba badilweng mo go bone ka ditshika tsa bone, e ne e le 2 750.

37Ba ke bone ba ba badilweng ba ditshika tsa Bakohathe, botlhe ba ba direlang mo mogopeng wa bophuthegelo, ba Moše le Arone ba ba badileng ka fa taolong ya ga Jehofa ka seatla sa ga Moše.

38Bone ba ba badilweng ba bomorwa Gereše, ka ditshika tsa bone, le ka dikgotla tsa borra ba bone,

39go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo o tsenang mo tirelong, a ya go dira mo mogopeng wa bophuthegelo,

40e bong bone ba ba badilweng mo go bone ka ditshika tsa bone, le ka dikgotla tsa borra ba bone, e ne e le 2 630.

41Ba ke bone ba ba badilweng ba ditshika tsa bomorwa Gerešone, botlhe ba ba neng ba direla mo mogopeng wa bephuthegelo, ba Moše le Arone ba ba badileng ka fa taolong ya ga Jehofa.

42Ba ba badilweng ba ditshika tsa bomorwa Merari, ka ditshika tsa bone, ka dikgotla tsa borra ba bone,

43go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo tsenang mo tirelong a ya go dira mo mogopeng wa bophuthegelo,

44e bong bone ba ba badilweng mo go bone, ka ditshika tsa bone, e ne e le 3 200.

45Ba ke bone ba ba badilweng ba ditshika tsa bomorwa Merari, ba Moše le Arone ba ba badileng ka fa taolong ya ga Jehofa ka seatla sa ga Moše.

46Botlhe ba Balefi ba ba badilweng, ba Moše le Arone le dikgosana tsa Iseraele ba ba badileng, ka ditshika tsa bone, le ka dikgotla tsa borra ba bone,

47go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo o ne a tsena a ya go dira tiro ya tirelo, le tiro ya go rwala mo mogopeng wa bophuthegelo,

48e bong bone ba ba badilweng mo go bone, e ne e le 8 580.

49Ba ne ba balwa ka seatla sa ga Moše ka fa taolong ya ga Jehofa, mongwe le mongwe ka fa tirelong ya gagwe le ka fa morwalong wa gagwe. Ba badilwe jalo ke ene, jaaka Jehofa a laotse Moše.

← Chapter 3 Jump to: Chapter 5 →