Proverbs 1

Luganda (BIBU1) (BIBULIYA ENTUKUVU)

Jump to: Chapter 2 →

1Engero za Solomoni, mutabani wa Dawudi, Kabaka wa Yisirayeli:

2Olw'okuyigiriza amagezi n'obugunjufu, okutegeera ebigambo n'obutegeevu,

3okufuna okugunjulwa, okumanya, obutuukirivu, obutuufu n'obuluŋŋamu;

4okuyigiriza abato obwegendereza, n'abavubuka okumanya n'ennamula entuufu;

5Ow'amagezi aziwulire, yeeyongere okumanya, n'omutegeevu afune ebibuuliriro,

6okutegeera enfumo n'engero, ebigambo by'abagezi ko n'ebikoco.

7Okutya Omukama amagezi mwe gasookera, naye abasiru amagezi n'okugunjulwa bagaya bigaye.

8Wulira, mwana wange, eŋŋunjula ya kitaawo, etteeka lya nnyoko tolibuukangako;

9kubanga biriba ng'engule ewoomya omutwe gwo, ng'ebibira mu bulago bwo.

10Mwana wange, aboonoonyi bwe bakusikirizanga, tobagonderanga.

11Bwe bakugambanga nti: “Jjangu naffe, twekwekerere okuyiwa omusaayi; tuliimise ataliiko musango awatali nsonga

12tubamire ng'amagombe nga balamu, nga balamba ng'abo abakkirira mu bunnya;

13tujja kwefunira eby'omuwendo byonna, amayumba gaffe tugajjuze omunyago;

14tuwagire, ffenna awamu tunaagatta ensawo,”

15mwana wange, totambulanga nabo; ekigere kyo kitangire obukubo bwabwe;

16kubanga ebigere byabwe biddukira mangu eri ekibi, banguyira eky'okuyiwa omusaayi.

17Akatimba okakasukira bwereere bwe ziba ng'ennyonyi ziraba ziti.

18Bo bennyini omusaayi gwabwe gwe baba beekwekeredde, obulamu bwabwe bwe baba baliimisa.

19Bwe gatyo amakubo g'omulyazaamaanyi bwe gaba, obulyazaamaanyi buzikiriza nnyinibwo.

20Amagezi galangirira ebweru, gateera eddoboozi lyago mu nguudo;

21galeekaanira mu masaŋŋanzira, mu mizigo gy'emiryango gy'ekibuga googera nti:

22“Ababuyabuya munaatuusa wa okwagala obubuyabuya? Abasekerera, munaatuusa wa okusanyukira okusekerera, n'abasiru okukyawa amagezi?

23Singa mufudde ku kukomako kwe mbakomyeko, nandibafukumulidde ebindi ku mutima, nandibamanyisizza ebirowoozo byange.

24Naye kubanga nkoowodde, ne mugaana, ne ngolola omukono gwange, ne wabula ategereza;

25ne mugaya okubuulirira kwange, ne bye mbakomyeko, temubitutte,

26nange nno kyendiva nseka nga muzikirira, ne nkudaala nga muli mu kacwano;

27Okuzikirira kwammwe kulibajjira ng'omuyaga akabenje ne kabavunjaga nga kikuŋŋunta, n'ennaku n'obulemu ne bibajjira.

28“Olwo balinkoowoola, naye sigenda kubaanukula; balinnoonya, naye tebagenda kunzuula.

29Kubanga baakyawa okumanya, tebaalondawo kutya Mukama.

30Kubanga tebaatwala bibuuliriro byange, byonna bye nabakomako baabinyooma,

31balirya ku bibala by'ekkubo lyabwe, balikkuta enkwe zaabwe.

32Kubanga obulalambavu bw'ababuyabuya bwennyini bwe bulibatta, n'okweyibaala kw'abasiru kugenda kubazikiriza.

33Naye ampulira alituula ntende, aliba mu ddembe, awatali kabi k'atya.”

Jump to: Chapter 2 →