Proverbs 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Mwana wange, bwe weeyimiriranga munno, obanga owaddeyo akakalu olw'omugwira,

2nga by'oyogedde bikusibye, ebigambo byo byennyini nga bikukwasizza mu mutego,

3kale nno, mwana wange, okolanga oti okwewonya, anti kati oli mu buyinza bwa munno: Genda, yanguwako, omupeekereze ekisonyiwo;

4tokkiriza maaso go kulaba ku tulo, yadde ebikowe byo okuwujjaalako n'akatono.

5Weewonye ng'ennangaazi, nga bwe yeggya mu mikono gy'omuyizzi, oba ng'ekinyonyi mu mikono gy'omutezi.

6Genda eri enkuyege, ggwe omugayaavu, wekkaanye bw'ekola, naawe oyige amagezi.

7Terina aduumira, nnampala oba omwami,

8naye mu kyeya, yeetegekera emmere, mu bw'amakungula ekuŋŋaanya ky'erirya.

9Oneebakiriza kutuusa wa ggwe omugayaavu? Onoozuukuka ddi mu tulo two?

10Weebakamu katono, obba ku tulo, ozinga mikono owummulemu,

11olwo obwavu bujja kukujjira ng'emmomboze, n'okuwamma, ng'omusabiriza.

12Nnantaganyula, omuntu omutali nsa, agenda ayita n'akamwa akoogera ebikyamu;

13atta ku liiso, abagulizaako n'ebigere bye n'awenyaako n'engalo;

14ateekateeka nkwe mu mutima gwe omubambaavu, buli kadde asiikuula nnyombo.

15Oyo okuzikirira kwe kulimugwira mbagirawo; mu kabanga katono alisaanawo; tewaliba kuwona.

16Waliwo ebintu mukaaga Omukama bye yakyawa, musanvu omwoyo gwe bye gwetamwa:

17Amaaso ag'amalala, olulimi olulimba, emikono egiyiwa omusaayi ogutaliiko musango,

18omutima ogulowoolereza entegeka embi, n'ebigere ebyanguyira eri ekibi,

19omujulirwa omulimba afukumula eby'obulimba, n'oyo aleeta ennyombo mu b'oluganda.

20Mwana wange, kwata ebiragiro bya kitaawo, etteeka lya nnyoko tolibuukangako.

21Bulijjo obisibanga mu mutima gwo, bisibe mu bulago bwo.

22Bw'onootambulanga, binaakulambikanga; bw'oneebakanga, binaakukuumanga; bw'onoosisimukanga, binaanyumyanga naawe.

23Kubanga ebiragiro bino ttawaaza, etteeka lino kitangaala, n'okukukomako oli yeefuge, lye kkubo ly'obulamu.

24Bino bya kukuwonya omukazi omugwenyufu, n'akamwa akagonvu ak'omukazi malaaya.

25Obulungi bwe tebukwasanga mutima gwo maddu; entunula ye tekumalangamu mwoyo.

26Ebbeeyi y'omukazi malaaya guba mugaati gumu guti ogw'oluwewere; mukoomusajja omuwendo gw'obulamu bwonna gw'atwala.

27Omuntu ayinza okusenera omuliro mu kikondoolo kye engoye ze ne zitaggya?

28Oba okutambulira ku manda, ebigere bye ne bitasiriira?

29Bw'atyo n'ayingira eri muka munne bw'abeera; teri amukwatako atalibonerezebwa.

30Abantu tebanyooma omubbi, enjala olw'okumuluma bw'abba atte enjala ye?

31Bw'akwatibwa, agatta mirundi musanvu, na byonna by'alina awaka n'abiwaayo.

32Omwenzi si muntu mulabufu; akikola aba yeezikirizza yekka.

33Yeesombera miggo na kusekererwa, obuswavu bwe tebulisangulwawo,

34kubanga obuggya bukoleeza obusungu bwa bba; lw'aliwoolera eggwanga taliba na kisa.

35Talikkiriza kuliyirirwa; enguzi ne bw'eriba nnene etya, talikkiriza.

← Chapter 5 Jump to: Chapter 7 →