Proverbs 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Mwana wange, bw'onokkiriza ebigambo byange, n'ebiragiro byange n'obitereka mu mutima gwo,

2okutu kwo n'okutega kuwulirize amagezi, n'omutima gwo n'oguwunzikira eri okutegeera,

3bw'onoolaajaniranga obugezi, n'okoowooleranga okutegeera,

4amagezi n'oganoonya nga ssente, n'ogawuukuula ng'awuukuula amakula amakusike,

5olwo olitegeera okutya Omukama, oligguka ku kutegeera Katonda.

6Kubanga Omukama y'agaba amagezi, mu kamwa ke mwe muva okutegeera n'okumanya.

7Abatuufu abaterekedde amagezi; ye ngabo y'abo abatambulira mu bulungi,

8ng'akuuma amakubo g'abatuufu, alabirira amakubo g'abatuukirivu.

9Olwo olitegeera obutuukirivu, obutuufu n'obuluŋŋamu, na buli kkubo ddungi.

10Kubanga amagezi galikujja mu mutima, n'okumanya kulisanyusa omwoyo gwo.

11Obulabufu bulikukuuma, n'okutegeera kulikulabirira,

12n'owonyezebwa ekkubo ebbi, abantu ab'enjogera emmambaavu:

13abalekerera obukubo obuluŋŋamu, ne bakwata amakubo ag'enzikiza;

14abasanyukira mu kukola obubi, ne basagambiriza mu bubambaavu bw'ekibi;

15ab'amakubo amabi, n'entambula enkyamu.

16Galikuwonya omukazi omwenzi, n'omukazi malaaya ayogera ebiseemyaseemya,

17aleka eri munne gwe yafuna mu buvubuka bwe, ne yeerabira endagaano ya Katonda we.

18Ennyumba ye etwala mu lumbe, n'obukubo bwe butwala mu mizimu.

19Bonna abayingira gy'ali, tebadda; tebalisanga kkubo lya bulamu.

20Bw'otyo olitambulira mu kkubo ly'abalungi n'okuuma obukubo bw'abatuukirivu.

21Anti abaluŋŋamu balisenga mu nsi, abatambulira mu bulungi be baligisigalamu.

22Naye ababi balikutulwa ku nsi, n'abayisa obubi baligiggyibwako.

← Chapter 1 Jump to: Chapter 3 →