Proverbs 18

Luganda (BIBU1) (BIBULIYA ENTUKUVU)

← Chapter 17 Jump to: Chapter 19 →

1Eyeewagudde anoonya kya kwesanyusa; buli kibuuliriro akinyooma.

2Omusiru tayagala kutegeera, wabula afa ku kulaga ky'alowooza.

3Obugwenyufu bwe bujja nga n'okunyoomebwa kuzze; n'obuswavu bujja n'okuweebuuka.

4Ebigambo ebiva mu kamwa k'omuntu, mazzi mawanvu; ensulo y'amagezi, mugga gwa ttumbiizi.

5Okuzibira omubi si kirungi, oba okulamula n'ofiiriza omutuukirivu.

6Emimwa gy'omusiru gimusuula mu nnyombo, n'akamwa kamuleetera kukubibwa.

7Akamwa k'omusiru kwe kuzikirira kwe; n'emimwa gye gwe mutego ogutta obulamu bwe.

8Ebigambo by'ow'olugambo, nnoga ewooma, bikkiririra ddala munda mu lubuto.

9Omuntu agayaala okukola wa mukago n'oli azikiriza.

10Erinnya ly'Omukama, munaala gwa maanyi; omutuukirivu addukira omwo, akuumibwa.

11Obugagga bw'omugagga kye kigo kye; abwefaanaanyiriza ng'ekisenge ekimukuuma.

12Okuzikirira nga tekunnatuuka, omutima gw'omuntu gwegulumiza; sso nno obwetoowaze bwe bukulembera ekitiibwa.

13Ayanukula nga tannawulira, obwo buba busiru bwe na kuswala.

14Omutima gw'omuntu gumugumya mu bulwadde, naye omutima ogwennyise ani ayinza okugugumira?

15Omutima gw'omutegeevu gufuna okumanya, n'okutu kw'abagezi kunoonya okumanya.

16Ekirabo ky'omuntu kimutemera ekkubo; kimutuusa ne mu bakungu.

17Asooka okuwoza gw'oyita omutuufu, okutuusa omulala lw'ajja n'amulumiriza.

18Akalulu ke kasalawo enkaayana; katawulula bakirimaanyi.

19Ow'oluganda anyiiziddwa, muzibu okusinga ekibuga ekinywevu, n'empaka ziri ng'omuyingo ku kigo.

20Olubuto lw'omuntu lukkuta bibala bya kamwa ke; emimwa gye bye gireeta bye bimukkusa.

21Okufa n'obulamu biri mu buyinza bwa lulimi; abalwagala balya ku bibala ebiruvaamu.

22Azuula omukazi aba azudde kirungi; asanga okuganja ew'Omukama.

23Omwavu awanjaga, naye omugagga ayanukuza bboggo.

24Emikwano egimu gyanditwala mu kuzikirira, sso wabaawo ow'omukwano anywera okukira ow'oluganda.

← Chapter 17 Jump to: Chapter 19 →