Proverbs 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Mwana wange, kwata ebigambo byange; ebiragiro byange biterekenga mu nda yo.

2Kwata bye nkulagira, oliba mulamu; bye nkuyigiriza bikuume ng'emmunye y'eriiso lyo.

3Bisibe ku ngalo zo; biwandiike ku kipande ky'omutima gwo.

4Gamba amagezi nti: “Oli mwannyinaze,” n'okutegeera kuyite munywanyi wo,

5bikukuume ku mukazi omwenzi, ku mukazi malaaya ayogera ebiseemyaseemya.

6Anti nayima mu ddirisa ly'ennyumba yange, ne ntunula ebweru wansi nga mpisa mu kadirisa,

7ne ndaba mu bantu ababuyabuya; nekkaanya mu balenzi omuvubuka atategeera,

8ng'akkirira mu luguudo okumpi n'ensonda, n'alaga ku nnyumba y'omukazi,

9akawungeezi nga bugenda buziba, awo ng'enzikiza ey'ekiro ekwata.

10Awo omukazi n'avaawo okumusisinkana; ayambadde nga malaaya, n'enkwe mu mutima gwe.

11Omukazi oyo ayasiikana, taweera, ebigere bye tebinywera mu nyumba,

12wuuno mu nguudo, wuuli mu mbuga, aliimisa mu buli kalikonda.

13Yabaka omulenzi, n'amunywegera; n'amugamba ng'akaze amaaso nti:

14“Nnina ekitambiro eky'okussa ekimu eka, olwa leero lwe nnaatuukiriza kye neetema.

15Kwe kujja okukusisinkana, nkunoonye; nzuuno nkugguseeko.

16Ekitanda kyange nkibisse n'amagodooli; nkibisse n'engoye eza langi eza bafuta ez'omu Misiri.

17Nkifuuyidde ebyakaloosa ebya mirra, ebigaji ne budalasiini.

18Jjangu tunywe omusera gw'omukwano okutuusa ku makya; twesanyuse n'okwagala.

19Anti baze tali ka, yagenze lugendo lwa wala.

20Yatutte n'ensawo ya ssente; alikomawo ng'omwezi gwa ggabogabo.”

21N'amuwugula n'ebigambo bingi ebisendasenda; n'amusikiriza n'okuseemyaseemya kw'emimwa gye.

22Amangu ago n'amugoberera ng'ente gye batwala okutta, ng'engabi egwa mu kitimba,

23okutuusa akasaale lwe kagifumita mu kibumba; oba ng'ekinyonyi ekyanguyira ekitimba, n'atamanya nti obulamu bwe abutunze.

24Kale nno, baana bange, mumpulirize; mutegereze ebigambo by'akamwa kange.

25Tokkiriza mutima gwo kuwunjukira mu makubo ge; oba okuwabira mu bukubo bwe.

26Kubanga bangi b'akwasizza n'abatta; oyo b'asse, bbiina ddene.

27Ennyumba ye lye kkubo ly'emagombe, likkiririra ddala eyo mu nnyumba z'olumbe.

← Chapter 6 Jump to: Chapter 8 →