Proverbs 26

Luganda (BIBU1) (BIBULIYA ENTUKUVU)

← Chapter 25 Jump to: Chapter 27 →

1Ng'omuzira bwe gutasaana mu kyeya, n'enkuba mu budde obw'amakungula, ekitiibwa bwe kityo bwe kitasaanira musiru.

2Ng'enkazaluggya bw'ebuukabuuka n'akataayi bwe keetawula, n'ekikolimo ekitalina nsonga bwe kibulwa gwe kikkako.

3Akaswanyu ka mbalaasi n'olukoba lwa ndogoyi, n'omuggo gwa butuuliro bwa musiru.

4Omusiru tomuddangamu ng'ogerera ku busiru bwe, sikulwa nga naawe omufaanana obusiru.

5Omusiru omuddangamu ng'ogerera ku busiru bwe, sikulwa ng'alowooza nti mugezi.

6Kubeera kwetemako kigere oba kunywa bulabe oli okutuma obubaka omuntu gw'amanyi nti musiru.

7Ng'okugulu kw'omulema okutakyagasa, n'olugero bwe lutyo mu kamwa k'omusiru.

8Ng'oli azingira ejjinja mu nvuumuulo, n'okuwa omusiru ekitiibwa bwe kuba.

9Ng'akati k'amaggwa mu mukono gw'omutamiivu bwe kaba, n'olugero mu kamwa k'abasiru bwe luba.

10Ng'omulasi w'obusaale amala galasa gw'asanze, n'apangisa omusiru gw'amaze gasanga bw'aba.

11Ng'embwa edda ku by'esesemye, n'omusiru bw'ali, adda mu busiru bwe.

12Olabye omuntu eyeerowooza okuba omugezi? Omusiru yandisuubirayo akantu, naye si oyo.

13Omunafu awoza: “Ku kkubo kuliko empologoma; empologoma eri mu luggya!”

14Ng'oluggi bwe lwewuubira ku ppata zaalwo, n'omunafu bwe yeekyusa mu buliri bwe.

15Omunafu omukono agukweka mu kibya, tasobola na kuguzza eri kamwa ke.

16Omunafu yeeraba nti mugezi okusinga abantu omusanvu abaanukula n'obwegendereza.

17Ng'omuntu alwana n'embwa ng'agikutte matu, n'omuyise eyeeyingiza mu nnyombo ezitali zize bw'aba.

18Ng'omulalu akasuka ebitawuliro, n'obusaale obw'akabenje,

19bw'atyo bw'ali n'omuntu alimba munne ate n'awoza: “Mbadde nsaaga busaazi.”

20Awatali nku, omuliro guzikira; bwe wataba wa lugambo, oluyombo lukkakkana.

21Ng'ebisirinza ku manda, n'enku ku muliro, n'omuntu omuyombi bw'akoleeza atyo ennyombo.

22Ebigambo by'ow'olugambo, nnoga ewooma, bikkiririra ddala munda mu lubuto.

23Nga ffeeza atangalijjira ku kibya ky'ebbumba, n'emimwa emigonvu egibisse omutima omubi bwe giba.

24Omukyayi abuzaabuza n'emimwa gye, naye nga munda mu mutima aterese bulimba busa.

25Bw'ayogera nga yeegonza tomwesiga, kubanga mu mutima gwe mulimu ebyenyinyalwa musanvu.

26Omuntu yandikisa obukyayi bwe mu bukujjukujju, naye mu kuteesa mwe bweyerulira.

27Asima obunnya alibugwamu; ayiringisa ejjinja lirimuyiringitirako.

28Olulimi olulimba lukyawa be lulumya, n'akamwa akanyumiikiriza kazaala kuzikirira.

← Chapter 25 Jump to: Chapter 27 →