Proverbs 27

Luganda (BIBU1) (BIBULIYA ENTUKUVU)

← Chapter 26 Jump to: Chapter 28 →

1Teweewaaniranga mu bya nkya, kubanga olunaku bye lunaaleeta tobimanyi.

2Leka omulala akutende, sso si kamwa ko; omuntu omulala, sso si mimwa gyo.

3Ejjinja liba zzito, n'omusenyu guzitowa, naye byombi ekibisinga ye musiru okukusunguwaza.

4Obusungu bukambwe n'obuswandi busaanyaawo, Ani ayinza okugumira obuggya?

5Waakiri okunenyezebwa mu lwatu, okusinga okwagalirwa muli.

6Ebiwundu akwagala by'akussaako biba bya mazima, naye okunywegera kw'akukyaye kubeera kwa bulimba.

7Omukkufu yeetamwa n'ekisassalala ky'enjuki, naye ku muyala n'ebikaawa biwoomerera.

8Ng'ekinyonyi ekibula okuva mu kisu, n'abula okuva mu maka ge bw'aba.

9Omuzigo n'akabaani bisanyusa omutima; n'obulungi bw'ow'omukwano buva mu kubuulirirwa kwesimbu.

10Mukwano gwo ne mukwano gwa kitaawo tobaabuliranga; ku lunaku ng'ogudde mu kacwano, teweeyunanga wa muganda wo; omuliraano ogw'okumpi gukira oluganda olw'ewala.

11Mwana wange, beera mugezi, osanyuse omutima gwange, ndyoke mbeeko bye nnyanukula anvuma.

12Omuntu omwegendereza alaba akabi ne yeewogoma, naye omubuyabuya agenda bugenzi, ne yettattana.

13Ekyambalo ky'omuntu kitwale, ky'asinzeeyo okweyimirira omuyise; kitwale ng'omusingo bwe yeeyimirira omugwira.

14Alamusa munne ku makya n'eddoboozi ery'olwatu, alitwalibwa ng'akolimye.

15Akasolya akatatadde kutonnya mu bw'enkuba n'omukazi omuyombi bifaanagana;

16okumuziyiza oba ng'aziyiza empewo; oba ng'oli afunyira omuzigo mu kikonde kye.

17Ekyuma kiwagalibwa kyuma, n'omuntu y'awagala munne.

18Alabirira omukunyu aligulyako ebibala, n'akuuma mukama we aliweebwa ekitiibwa.

19Ng'amaaso bwe geeraba mu mazzi, n'omutima gw'omuntu bwe gulaga ky'ali.

20Ng'amagombe n'okuzikirira bwe bitakkuta, n'amaaso g'omuntu bwe gatamatira.

21Ogutamu gwa ffeeza, n'akabiga ka zaabu, n'omuntu agezebwa na kuwaanibwa.

22Omusiru ne bw'omusekula mu kinu, n'omusekula ng'eŋŋano n'omusekuzo, tolimwawukanya na busiru bwe.

23Manya bulungi amagana go nga bwe gali, n'ebisibo byo obyekebejje;

24kubanga obugagga tebuba bwa lubeerera, n'engule tebeerawo mazadde na mazadde.

25Essubi bwe liyoolwamu, omuddo omuggya nga gumera, n'omuddo ku nsozi nga gakuŋŋaanyizibwa,

26olwo obwana bw'endiga bulikuwa ekyokwambala, n'embuzi ennume zirikuwa ezigula obutaka;

27oliba n'amata g'embuzi agamala okukuliisa n'amaka go, n'okuliisa bawala bo abakuweereza.

← Chapter 26 Jump to: Chapter 28 →