Proverbs 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1Amagezi tegakoowoola? N'okutegeera tekusitudde eddoboozi?

2Ku ntikko y'obusozi ku kkubo, mu masaŋŋanzira we gayimirira,

3ku miryango egiyingira mu kibuga, ku wankaaki we galeekaanira nti:

4“Mmwe abasajja, mbakoowoola; Mpita mmwe abaana b'abantu.

5Mmwe ababuyabuya muyige obwegendereza; abasiru mufune okutegeera.

6Muwulirize, kubanga bye ŋŋenda okwogerako bikulu; nzija kwasamya akamwa, njogere ebituufu.

7Akamwa kange koogera mazima; emimwa gyange gyekanasa obugwenyufu.

8Ebigambo by'akamwa kange byonna bituufu; mpaamu kikyamu, mpaamu kibi.

9Ku bategeera, byonna biruŋŋamu, ku bamanyi, biba bituufu.

10Mulondeewo enjigiriza yange okusinga ffeeza; okumanya, okusinga zaabu omulondobe.

11Anti amagezi ga muwendo okukira amakula gonna; tewali kye weegomba kya muwendo kigenkana.

12“Nze Amagezi nsula wamu n'okutegeera, nze nnannyini kumanya n'obulabufu.

13Okutya Omukama kwe kukyawa ekibi; nkyawa okwekuza, olunkulu, empisa embi n'akamwa akabambaavu.

14Nze nnannyini kubuulirira n'obwegendereza; nnina okutegeera n'obuyinza.

15Olw'okubeera nze, bakabaka bafuga, n'abakungu balagira ekituufu.

16Olw'okubeera nze, abaami bafuga, n'abakungu abalamula wonna mu nsi.

17“Abanjagala nange mbaagala, abannoonya, bansanga.

18Obugagga n'ekitiibwa biri nange, obugagga obutagooka n'okuba obulungi.

19Ebibala byange bisinga zaabu omukuŋŋunte; bye ndeeta bikira ffeeza omulondobe.

20Ntambulira mu kkubo ery'obutuukirivu; mu bukubo obw'ennamula entuufu,

21nga ngaggawaza abo abanjagala; amawanika gaabwe ne ngajjuza.

22“Omukama yanzaala mu masooka g'emirimu gye; ekibereberye mu bye yatonda eby'edda.

23Yanteekawo okuva edda lyonna, mu kusooka, ku matandika g'ensi.

24Obuziba bwonna nga tebunnabaawo, nze nga nazaalibwa dda, n'ensulo ezijjudde amazzi nga tezinnasooka;

25ensozi nga tezinnatereera we ziri; nze nasooka obusozi okuzaalibwa;

26nga tannakola nsi na ttale lyayo, yadde enfuufu eyasooka ey'oku nsi.

27Naliwo lwe yabangawo olubaale; ne lwe yassaawo enkingi z'eggulu ku nnyanja,

28lwe yawagika ebire waggulu awo, ne lwe yanyweza ensulo z'ennyanga;

29lwe yabibira ennyanja, amazzi galeme kubuuka kkomo lyago, ne lwe yalamba emyaliiro gy'ensi.

30Nali ffundi ku lusegere lwe; nali ssanyu lye buli lunaku, nga neeyagalira awo mu maaso ge obudde bwonna,

31nga neeyagalira wonna mu nsi; nga nsanyukira mu baana b'abantu.

32“Kale nno kati, baana bange, mumpulire; beesiimye abakwata amakubo gange.

33Muwulire enjigiriza yange mubeere bagezi; temugigaya.

34Yeesiimye ampulira, ankuumirira ku nzigi zange buli lunaku, annindirira ku miryango gyange.

35Anti ansanga, aba asanze obulamu, alisanga okuganja ew'Omukama.

36Naye ansubwa alyekolera bubi; bonna abankyawa baagala kufa.”

← Chapter 7 Jump to: Chapter 9 →