Proverbs 24

Luganda (BIBU1) (BIBULIYA ENTUKUVU)

← Chapter 23 Jump to: Chapter 25 →

1Abantu ababi tebakukwasanga nsaalwa; teweegombanga kubeera nabo,

2kubanga mu mutima balowoolereza bukambwe; emimwa gyabwe gyogera bya kukola kabi.

3Ennyumba ezimbwa na magezi, n'enywezebwa na kutegeera.

4N'okumanya amaterekero gaamu gajjuzibwa n'eby'obugagga amakula, ebisanyusa.

5Omugezi aba wa maanyi okusinga kirimaanyi, n'omutegeevu, okusinga binywera,

6kubanga okutabaala kyetaagisa ebibuuliriro, n'okuwangula, abawi b'amagezi abangi.

7Amagezi omusiru gamusukkiridde; ku miryango gy'ekibuga tayasamya kamwa ke.

8Eyeetegeka okukolera obubi, bamuyita kalittima.

9Omusiru by'alowooza okukola biba kibi; omunyoomi abantu bamwenyinyala.

10Bw'oterebuka mu kaseera ak'akabenje, amaanyi ng'oba na matono ddala.

11Owonyanga abatwalibwa okuttibwa; tangiranga abakungujja okusanjagibwa.

12Bw'onoogamba nti: “Kino tetwakimanyaako,” oyo ageza emitima talikiwulira? Oyo akuuma obulamu bwo takimanyi? Omuntu talimuweera ng'agerera ku bikolwa bye?

13Olyanga omubisi gw'enjuki, mwana wange, kubanga mulungi, n'ekisassalala kikuwoomera.

14Manya nti n'amagezi bwe gawoomera omwoyo gwo; bw'ogaggukako, olwo wabaawo essuubi, ate essuubi lyo teriba alikomya.

15Toteeganga nnyumba ya mutuukirivu ng'omubi bw'akola; leka kwaya buwummuliro bwe.

16Omutuukirivu ne bw'agwa emirundi omusanvu, asitukawo, naye ababi akabenje kabasuula.

17Omulabe wo bw'agwanga, tosanyukanga; bw'asinzittukanga, tolekanga mutima gwo kujaguza.

18Sikulwa ng'Omukama akiraba n'asanyuka, n'alekera awo okumusunguwalira.

19Omuntu omubi takweraliikirizanga; ababi tebakukwasanga nsaalwa.

20Kubanga omuntu omubi talina ssuubi; akatawaaza k'ababi kalifuuyibwa.

21Mwana wange, tya Omukama ne kabaka; teweetabikanga na bajeemu.

22Kubanga bajja kuzikiriza mangu; ani amanyi abo bombi akabenje ke basobola okuleeta?

23Na bino bigambo by'abagezi: Okubaamu kyekubiira ng'olamula, si kirungi.

24Agamba omubi nti: “Toliiko musango,” abantu balimuvumirira n'amawanga ne gamutamwa.

25Naye abo abaligumusalira, biribagendera bulungi; omukisa omulungi gulibakkako.

26Ayanukula mu butuufu, aba ng'anywegedde ku mimwa.

27Sooka okole egy'ebweru, otegeke ennimiro yo, olwo olyoke ozimbe ennyumba yo.

28Tolumirizanga munno watali nsonga, era tolimbanga na mimwa gyo.

29Togambanga nti: “Nzija kumukola nga bwe yankoze; Nzija kuwoolera eggwanga ku muntu oyo olw'ebikolwa bye.”

30Nayita ku nnimiro y'omugayaavu, mu nnimiro y'emizabbibu ey'omuntu atategeera.

31Yonna yali etuubye amaggwa; wansi ng'emeze kamyu ne bbugwe ow'amayinja ng'ayiise.

32Natunula nti: ne ndowoolereza; nalaba, ne mbaako kye nayiga:

33Weebakamu katono, obba ku tulo, ozinga mikono owummulemu,

34olwo obwavu bujja kukujjira ng'emmomboze, n'okuwamma, ng'omusabiriza.

← Chapter 23 Jump to: Chapter 25 →