Proverbs 23

Luganda (BIBU1) (BIBULIYA ENTUKUVU)

← Chapter 22 Jump to: Chapter 24 →

1Bw'otuulanga ku lujjuliro n'omukungu, wekkaanye bulungi ebiri awo mu maaso go.

2Teeka akambe ku mumiro gwo, oba oli muntu muluvu.

3Tolulunkanira mmere ye ya kawoowo, kubanga eyo mmere ya bulimba.

4Teweekooyanga ng'onoonya obugagga; baamu amagezi weefuge.

5Situla amaaso otunuulire obugagga, buliba tebukyaliwo; kubanga bumera ebiwaawaatiro ne bubuuka ng'empungu nga bulaga waggulu.

6Tolyanga mmere ya muntu muganiriza, tolulunkaniranga mmere ye ya kawoowo,

7kubanga ye muntu aba abalirira buli kaseera. Eno akugamba nti: “Lya, nywa,” sso ng'emmeeme tekuliiko.

8Onoosesema akatundu ke waakamira; ebigambo byo ebirungi birikufa busa.

9Toyogereranga mu matu g'abasiru; bagenda kugaya amagezi g'ebigambo byo.

10Tojjululanga bituuti eby'edda; toyingiriranga ttaka lya bamulekwa.

11Kubanga omununuzi waabwe wa maanyi; agenda kuwoza naawe ku lwabwe.

12Ssaako omwoyo ku kuyigirizibwa, n'amatu go gasse ku bigambo omuli okumanya.

13Tolekanga kukoma ku mwana; bw'omukuba n'akaggo tagenda kufa.

14Mubonereze n'akaggo, omuwonye amagombe.

15Mwana wange, omutima gwo bwe guliba omutegeevu; nange omutima gwange gulisanyuka;

16nzenna muli ndisagambiza, emimwa gyo bwe giryogera ebigambo ebituufu.

17Mu mutima aboonoonyi tebakusaalizanga, wabula buli lunaku lumirwa okutya Omukama.

18Kubanga essuubi mu maaso gyeriri, ate essuubi lyo teriribaako alikomya.

19Wulira, mwana wange, obeere mugezi, kuumira omutima gwo mu kkubo ettuufu.

20Teweegattanga n'abo abeekamirira omwenge; oba mu abo abaluvuubanira ennyama.

21Kubanga abatamiivu n'abaluvu baavuwala, anti okubongoota kwambaza omuntu obuziina.

22Owuliranga kitaawo eyakuzaala; tonyoomanga nnyoko ng'akaddiye.

23Amazima ogagulanga, naye togatundanga; funa amagezi, okumanya n'okutegeera.

24Kitaawe w'omwana omutuukirivu aba musanyufu ddala; azaala omwana omugezi amwesiimiramu.

25Kitaawo ne nnyoko basanyuke; omukazi eyakuzaala asanyuke.

26Mwana wange, mpa omutima gwo, amaaso go gasimbe ku makubo gange.

27Omukazi omwenzi, bunnya bwa nnyanga; omukazi malaaya, buya bufunda.

28Mazima aliimisa nga bw'olaba omutemu, ababi ayongera bangi mu bantu.

29Ani alaba ennaku? Ani ali mu buyinike? Ani ataggwa nnyombo? Ani ataggwa kwemulugunya? Ani awulubalidde obwereere? Ani amaaso gwe gamyuse?

30Be bo abeetalirira omwenge, abagenda bayigga emyenge emitabule.

31Totunuulira mwenge nga gumyuse, nga gutemagana bulungi mu kikopo, nga guttulukuka bulungi.

32Oluvannyuma guluma ng'omusota, gubojja ng'embalasaasa.

33Amaaso go galiraba eby'engeri, n'omutima gwo gulyogera ebigambo ebibambaavu.

34Oliba ng'eyeebase wakati ku nnyanja; ng'eyeebase waggulu ku mulongooti.

35Oligamba: “Bankubye, sirumiddwamu; bamputtudde, siwuliddeemu kantu; nnaazuukuka ddi, nziremu ngunoonye buto?”

← Chapter 22 Jump to: Chapter 24 →