Proverbs 30

Luganda (BIBU1) (BIBULIYA ENTUKUVU)

← Chapter 29 Jump to: Chapter 31 →

1Ebigambo bya Aguri mutabani wa Yake ow'e Massa. Omusajja ono yagamba Yitiyeli, Yitiyeli ne Wukali nti:

2Mu bantu bonna nze sirina kye mmanyi; okutegeera okw'obuntu nze sikulina.

3Saayiga magezi, n'Oyo Omutuukirivu simumanyi.

4Ani yali ayambuse mu ggulu n'akka? Ani yali akuŋŋaanyizza empewo n'agikwatira mu kikonde? Ani yali azingidde amazzi mu munagiro gwe? Ani yali ataddewo enkingi z'ensi? Erinnya lye ye ani, n'erya mutabani we, bw'oba omanyi?

5Buli kigambo kya Katonda, kikakafu; yennyini ye ngabo y'abantu abaddukira gy'ali.

6Ebigambo bye tobikubirangako kirala, sikulwa ng'akuvunaana n'akulaga bw'oli omulimba.

7Bino bibiri bye nkusaba, tobinnyima nga sinnafa:

8Tonsembereza bukuusa na bigambo bya bulimba; tompa bwavu yadde obugagga; mpa kyokka, emmere emmala,

9sikulwa nga mu kuyagaayagana nkwegaana; ne mpoza: “Ate Omukama ye ani?” Oba ate njavuwala, ne nziba, ne nvuma erinnya lya Katonda wange.

10Towaayirizanga muweereza wa mukama we, sikulwa ng'akuvumirira n'obonerezebwa.

11Waliyo nno abavumirira bajjajjaabwe, n'abatasabira mukisa bannyaabwe.

12Waliyo nno abeemanyi obutukuvu, sso ng'obujama tebubanaazibwangako.

13Waliyo nno ab'amaaso ameekuza; abatunuza obunyoomi.

14Waliyo abo amannyo gaabwe nga bitala; amagego gaabwe, bwambe, okukavvula abaavu babamale ku nsi, n'abanaku babamale mu bantu.

15Ekinoso kirina bawala baakyo babiri: bigamba “Mpa, mpa.” Waliwo bisatu ebitakkuta; bina ebitalikugamba nti: “Kimala”:

16Amagombe, olubuto olugumba, ettaka eritakkuta mazzi n'omuliro ogutaligamba nti: “Kimala.”

17Eriiso erinyooma omuzadde omusajja, n'eritafa ku kuyamba muzadde mukazi, binnamuŋŋoona by'omu kiwonvu biriritungulamu, obwana bw'ensega ne bulirya.

18Waliwo bisatu ebinneewuunyisa, bina bye sitegeerera ddala:

19Ekkubo ly'empungu mu bbanga; ekkubo ly'omusota ku lwazi; ekkubo ly'eryato ku nnyanja wakati; n'ekkubo ly'omusajja ali n'omuwala.

20Omukazi omwenzi akola bw'ati: Alya, bw'amala ne yeesiimuula emimwa, ng'agamba nti: “Tewali bubi bwe nkoze.”

21Bisatu bino bye binyeenya ensi; bina by'eteyinza kugumiikiriza:

22Omuddu bw'afuuka kabaka; omusiru akkuse emmere;

23omukazi omukyawe ate n'afumbirwa, n'omuzaana bw'adda mu kifo kya mugole we.

24Ku nsi kuliko ebitonde bina ebitono, sso mu bugezi bye bisinga:

25Enkuyege, eggwanga eritalina maanyi, naye mu kyeya zeeterekera emmere;

26buwakayima, buntu bukateyamba, naye bukola ebisulo byabwo mu njazi;

27enzige, tezirina kabaka, naye zonna zisenguka ng'eggye eritaze okulwana;

28omunya, osobola okugukwata n'engalo, naye gusangibwa ne mu mbiri za bakabaka.

29Bisatu bino ebyeyisa ekikungu: bina ebitambuza ekikungu:

30Empologoma esinga ebisolo byonna amaanyi, mpaawo ky'esanga n'edda ennyuma;

31enkoko empanga egaaga, sseddume w'embuzi ne kabaka ali n'eggye lye.

32Obanga mu busiru weekuza, omala weddamu, ddira omukono gwo okwate ku mumwa.

33Ng'okusunda amata bwe kuggyamu omuzigo, ng'okukaka ennyindo bwe kugireeta omusaayi, n'okusiikuula obusungu bwe kuleeta ennyombo.

← Chapter 29 Jump to: Chapter 31 →