Proverbs 31

Luganda (BIBU1) (BIBULIYA ENTUKUVU)

← Chapter 30 Jump to:

1Ebigambo bya Lemweli kabaka w'e Massa nnyina bye yamuyigiriza:

2Kiki, mutabani? Kiki, mwana w'enda yange? Kiki, mwana w'obweyamo bwange?

3Amaanyi go gonna togamaliranga ku bakazi; endasi zo ku abo abazikiriza ne bakabaka.

4Sikigwanira bakabaka, ggwe Lemweli; si kya bakabaka okunywa omwenge; si kya bakungu okwagala ebitamiiza;

5sikulwa nga banywa ne beerabira etteeka kye liragira, ne bakyusakyusa ensonga z'abanaku.

6Muwe omwenge omuntu anaatera okufa; muwe omwenge ow'omutima ogulimu ennyiike.

7Muleke banywe, beerabire ennaku, nga tebakyajjukira bulumi bwabwe n'akamu.

8Yogeranga ku lw'abatasobola kweyogerera, ne ku lw'ensonga za bonna abaavu.

9Yasamya akamwa ko olamule mu butuufu; lwanirira omunaku n'oyo ali mu bwetaavu.

10Omukazi omuzira anaamusanga ye ani? Wa muwendo okukira amakula gonna.

11Bba amwesiga n'omutima gwe gwonna, talina kya muwendo ky'ajulirira.

12Aleetera bba birungi, si bibi, ennaku zonna ez'obulamu bwe.

13Yeenoonyeza wuulu n'obugoogwa n'aluka n'emikono emimanyirivu.

14Ali ng'amaato amasuubuzi, asomba emmere ye ng'agiggya wala.

15Azuukuka nga bukyakutte, n'awa ab'omu maka ge emmere, n'agabira bazaana be emirimu.

16Yekkaanya ennimiro n'agigula; aggya ku bye yafuna n'emikono gye n'asimba ennimiro y'emizabbibu.

17Yeesiba n'anywera akole n'amaanyi, n'emikono gye mikakafu ku mulimu.

18Amanyi nga by'asuubula bya ttunzi; ekiro ettawaaza ye tezikira.

19Omukono gwe agussa ku katanta, emikono gye ne gikwata akati akalanga ewuzi.

20Ayaniriza abaavu; n'agabira abali mu bwetaavu.

21Mu budde obw'omuzira teyeeraliikirira ba mu nnyumba ye, kubanga bonna ab'omu maka ge bambala ne baggumira.

22Aluka ebibikka ebitanda bye; ayambala engoye mpeweevu eza kakobe.

23Bba wa kitiibwa ku miryango gy'ekibuga bw'atuula wakati mu bakungu b'omu ggwanga.

24Aluka engoye empeweevu n'azitunda, abasuubuzi n'abaguza enneebaggyo.

25Ayambadde amaanyi n'ekitiibwa; ennaku eziri mu maaso azisekerera busekerezi.

26Ayogeza magezi; ebibuuliriro eby'ekisa bye biri ku lulimi lwe.

27Alabirira enneeyisa y'ab'omu maka ge; emmere talya ya bwereere.

28Abaana be basituka ne bamutenda emikisa, ne bba naye n'amutenda nti:

29“Abakazi bangi abakola eby'ettendo, naye ggwe bonna obasinga.”

30Obuganzi bulimbalimba, n'obubalagavu temuli nsa; omukazi atya Omukama yekka y'atendebwa.

31Mumuwe empeera y'emikono gye bye gikoze, n'emirimu gye gimuweese ekitiibwa ku miryango gy'ekibuga.

← Chapter 30 Jump to: