Proverbs 25

Luganda (BIBU1) (BIBULIYA ENTUKUVU)

← Chapter 24 Jump to: Chapter 26 →

1Na zino nazo ngero za Solomoni; abasajja ba Kezekiya kabaka wa Yuda be baaziwandiika:

2Okukisa ekigambo kitiibwa kya Katonda; ate okukiwenja, kitiibwa kya bakabaka.

3Eggulu nga bwe lyewanise waggulu n'ensi nga bw'ekka eyo ekkuzimu, n'emitima gya bakabaka bwe giteefumiitirizika.

4Ffeeza muggyeeko essengere, olwo nga muvaamu omufukusi wa ffeeza ky'anaakolamu ekibya.

5Ggya akola obubi mu maaso ga kabaka, entebe ye erinywera olw'obutuukirivu.

6Teweejaakanga mu maaso ga kabaka, oba okweteeka abakungu we babeera.

7Ekisinga ye kwe kukugamba nti: “Yambuka wano,” n'ototoowazibwa mu maaso ga mukungu.

8Amaaso go kye galabyeko tokireetanga mangu mu mbuga, kale oluvannyuma olikola otya nga munno akuswazizza?

9Woza ensonga zo ne munno, kyokka tobikkulanga kyama kya mulala.

10Sikulwa ng'akiwulira n'akuvunaana; erinnya ebbi ly'olifuna teririkuvaako.

11Ekigambo ekyogerere we kigwanira, kiri ng'amapeera aga zaabu agatobekeddwamu aga ffeeza;

12Ng'empeta eya zaabu ey'oku matu oba ng'omukuufu ogwa zaabu omulungi, n'omugezi abuulirira awuliriza bw'aba.

13Ng'obunnyogovu bw'omuzira mu budde obw'amakungula, n'omubaka omwesigwa bw'aba ku aba amutumye; azzaamu otwanyi omwoyo gwa mukama we.

14Ng'ebire n'empewo omutali nkuba, n'eyeewaanawaana olw'ebirabo by'atawa bw'aba.

15Mu kugumiikiriza omukungu asendebwasendebwa; olulimi olugonvu lwasa amagumba.

16Bw'ogwikiriza omubisi gw'enjuki, lyako ogukumala, sikulwa ng'oguyitiriza n'ogusesema.

17Ewa munno, leka kuseregganirayo, sikulwa ng'akwetamwa n'akukyawa.

18Embuukuuli, ekitala, akasaale akoogi, ye muntu awa obujulizi obw'obulimba ku munne.

19Erinnyo erivunze, okugulu okulema, ye muntu ateesigwa okumwesiga mu budde obw'akabi.

20Ayimbira ennyimba omutima omunakuwavu, abeera ng'oli aggyamu ekkooti ye mu butiti, obanga ayiwa enkaatu mu luvu.

21Omulabe wo nga muyala, muwe ekyokulya, nga muyonta, muwe ekyokunywa.

22Olwo olituumira ku mutwe gwe amanda agengeredde, n'Omukama alikuweera.

23Ng'embuyaga y'emambuka bw'ereeta enkuba; n'olulimi olugeyi bwe luleeta amaaso ageekapye.

24Waakiri okusulanga waggulu mu kalikonda ka kasolya, okusinga okugatta ennyumba n'omukazi omuyombi.

25Ng'amazzi amannyogovu ku muntu alakasidde, n'amawulire amalungi agava mu nsi ey'ewala bwe gabeera.

26Ng'oluzzi olusiikuuliddwa, oba ensulo eyonoonese, n'omutuukirivu alekera omubi bw'aba.

27Si kirungi kunuuna mubisi gwa njuki mungi, yadde okunoonya ekitiibwa kino na kiri.

28Ng'ekibuga ekyabiziddwa, okutakyali bbugwe, n'omuntu atamanyi kwefuga bw'aba.

← Chapter 24 Jump to: Chapter 26 →