Proverbs 9

Luganda (BIBU1) (BIBULIYA ENTUKUVU)

← Chapter 8 Jump to: Chapter 10 →

1Amagezi geezimbira ennyumba, gasimbye empagi musanvu.

2Gasse ensolo, gatabudde omwenge, gategese n'olujjuliro lwago.

3Gatumye abazaana baago, bakowoole nga bayima ku butemyo bw'ekibuga.

4“Buli mubuyabuya akyame,” bwe gagamba abo abatalina nnamula ntuufu,

5“mujje mweriire emmere yange, munywe n'omwenge gwe mbatabulidde.

6Muleke obubuyabuya bwammwe lwe munaalama, mutambulire mu makubo g'okutegeera.”

7“Agolola omunyoomi, yeewakulira kuvumibwa; akomako omubi, yessaako ebbala.

8“Omunyoomi, tomukomangako, sikulwa ng'akukyawa. Omugezi mukomeko, ajja kukwagala.

9Yigiriza omugezi, ajja kweyongeza amagezi; gunjula omutuukirivu, ajja kwongera okuyiga.

10Okutya Omukama amagezi mwe gasookera; Okumanya oyo Omutuukirivu bwe butegeevu.

11Olw'okubeera nze, ennaku zo ziryeyongera obungi, n'emyaka giryongerwa ku bulamu bwo.

12Bw'oliba omugezi, amagezi go galikugeziwaza; bw'oliba omunyoomi, oliboonaaboona wekka.”

13Omukazi omusiru ayasiikana; temuli mpisa, talina ky'amanyi.

14Atuula mu maaso g'ennyumba ye, ku katebe, ku katemyo k'ekibuga,

15alyoke ayite abayitawo, abeetambulira amakubo gaabwe.

16“Buli mubuyabuya akyame,” bw'atyo bw'agamba abo abatalina nnamula ntuufu,

17“amazzi amabbe gawooma; emmere endiire mu nkiso esanyusa.”

18Baabuwe, tebamanyi nti eyo eriyo mizimu, nti abagenyi be bali ku ntobo y'emagombe.

← Chapter 8 Jump to: Chapter 10 →