1 Samuel 5

Luganda (LBR) (EKITABO EKITUKUVU, BAIBULI)

← Chapter 4 Jump to: Chapter 6 →

1Abafirisuuti bwe banyaga essanduuko ya Katonda, ne bagiggya Ebenezeri ne bagitwala e Asudodi.

2Abafirisuuti ne baddira essanduuko ya Katonda ne bagitwala mu ssabo lya Dagoni ne bagiteeka ku mabbali ga Dagoni.

3Abasudodi bwe baagolokoka enkya ku makya, laba, nga Dagoni agudde wansi nga yevunise mu maaso g'essanduuko ya Mukama ne bamusitula ne bamuzza mu kifo kye.

4Awo ku lunaku olwokubiri bwe bagolokoka ku makya era ne basanga nga Dagoni agudde wansi nga yevunise mu maaso g'essanduuko ya Mukama; omutwe gwa Dagoni ne bibatu byombi eby'emikono gye nga bikutuseeko nga bigudde ku mulyango; nga ekiwuduwudu kya Dagoni kye kiri awo kyokka.

5Bakabona ba Dagoni ne bonna abaayingira mu Ssabo lye, kyebaava balema okulinnya mu mulyango gwe mu Asudodi n'okutuusa kati.

6Naye omukono gwa Mukama ne guzitoowerera nnyo Abasudodi, n'ebitundu ebiriraanyeewo. N'ababonereza n'abalwaza ebizimba.

7Awo Abasudodi bwe baalaba ebibatuuseko, ne boogera nti, “Essanduuko ya Katonda wa Isiraeri tejja kubeera mu ffe, kubanga atubonerezza nnyo ffe wamu ne Katonda waffe Dagoni.”

8Kyebaava batuma ababaka okukuŋŋaanya abaami bonna ab'Abafirisuuti ne babuuza nti, “Tukole tutya essanduuko ya Katonda wa Isiraeri?” Ne baddamu nti, “Essanduuko ya Katonda wa Isiraeri eweerezebwe e Gaasi.” Awo ne baweereza essanduuko ya Katonda wa Isiraeri.

9Awo olwatuuka bwe bagittusaayo, Mukama n'abonereza n'ab'omukibuga ekyo ne batya nnyo n'abalwaza ebizimba ebyafutuuka ku bonna abato n'abakulu.

10Nabano ne baweereza essanduuko ya Katonda e Ekuloni. Awo olwatuuka, essanduuko ya Katonda bwe yamala okutuuka e Ekuloni, Abaekuloni bonna ne balekana nti, “Batuletedde essanduuko ya Katonda wa Isiraeri okututta ffenna.”

11Awo ne batuma ne bakuŋŋaanya abaami bonna ab'Abafirisuuti ne bagamba nti, “Muzzeeyo essanduuko ya Katonda wa Isiraeri gy'ebeera ereme okututta ffenna;” kubanga entiisa y'okufa yabuna ekibuga kyonna; olw'okubonerezebwa okungi okwali kubatuuseko.

12N'abo abataafa ne balwala ebizimba, okukaaba kw'ekibuga ne kulinnya mu ggulu.

← Chapter 4 Jump to: Chapter 6 →