Numbers 17

Lao Bible 2012 (ພຣະຄຳພີສັກສິ)

← Chapter 16 Jump to: Chapter 18 →

1ພຣະເຈົ້າຢາເວໄດ້ກ່າວກັບໂມເຊວ່າ,

2“ຈົ່ງບອກປະຊາຊົນອິດສະຣາເອນໃຫ້ເອົາໄມ້ຄ້ອນເທົ້າສິບສອງອັນມາໃຫ້ເຈົ້າຄື: ໄມ້ຄ້ອນເທົ້າອັນໜຶ່ງຈາກຜູ້ນຳແຕ່ລະເຜົ່າ. ຈົ່ງຂຽນຊື່ຂອງຜູ້ນຳເຜົ່າໃສ່ໄມ້ຄ້ອນເທົ້າແຕ່ລະອັນ

3ແລະໃຫ້ຂຽນຊື່ອາໂຣນໃສ່ເທິງໄມ້ຄ້ອນເທົ້າຂອງເຜົ່າເລວີ. ຫົວໜ້າແຕ່ລະເຜົ່າຈະມີໄມ້ຄ້ອນເທົ້າອັນໜຶ່ງ.

4ຈົ່ງນຳໄມ້ຄ້ອນເທົ້າເຫຼົ່ານີ້ໄປທີ່ຫໍເຕັນບ່ອນຊຸມນຸມ ແລະວາງລົງຕໍ່ໜ້າຫີບພັນທະສັນຍາບ່ອນທີ່ເຮົາພົບກັບເຈົ້າ.

5ແລ້ວໄມ້ຄ້ອນເທົ້າຂອງໃຜທີ່ເຮົາໄດ້ເລືອກເອົາ ກໍຈະອອກດອກ. ດ້ວຍວິທີນີ້ ເຮົາຈະເຮັດໃຫ້ຊາວອິດສະຣາເອນເຊົາຈົ່ມຮ້າຍໃສ່ພວກເຈົ້າ.”

6ດັ່ງນັ້ນ ໂມເຊຈຶ່ງກ່າວແກ່ຊາວອິດສະຣາເອນ ແລະຜູ້ນຳຂອງພວກເຂົາແຕ່ລະຄົນກໍໄດ້ນຳໄມ້ຄ້ອນເທົ້າອັນໜຶ່ງມາໃຫ້ເຜົ່າລະອັນຄື: ທັງໝົດມີຢູ່ສິບສອງອັນແລະມີໄມ້ຄ້ອນເທົ້າຂອງອາໂຣນຮ່ວມຢູ່ດ້ວຍ.

7ແລ້ວໂມເຊກໍເອົາໄມ້ຄ້ອນເທົ້າເຫຼົ່ານັ້ນໄປໄວ້ໃນຫໍເຕັນ ຕໍ່ໜ້າຫີບພັນທະສັນຍາຂອງພຣະເຈົ້າຢາເວ.

8ວັນຕໍ່ມາ ເມື່ອໂມເຊໄດ້ເຂົ້າໄປໃນຫໍເຕັນ ເພິ່ນຈຶ່ງໄດ້ເຫັນວ່າໄມ້ຄ້ອນເທົ້າຂອງອາໂຣນ ຊຶ່ງເປັນຂອງເຜົ່າເລວີນັ້ນອອກດອກຄື: ດອກຈູມ, ດອກບານ ແລະມີໝາກອາມອນສຸກຄ້າຍໆໝາກບົກຕິດຢູ່ດ້ວຍ

9ໂມເຊໄດ້ເອົາໄມ້ຄ້ອນເທົ້າທັງໝົດອອກຈາກຕໍ່ໜ້າພຣະເຈົ້າຢາເວ ໄປໃຫ້ຊາວອິດສະຣາເອນທັງໝົດເບິ່ງ. ພວກເຂົາໄດ້ເຫັນເຫດການທີ່ເກີດຂຶ້ນ ແລະຫົວໜ້າຂອງແຕ່ລະເຜົ່າ ຈຶ່ງຮັບເອົາໄມ້ຄ້ອນເທົ້າຂອງໃຜລາວຄືນ.

10ແລະພຣະເຈົ້າຢາເວໄດ້ກ່າວຕໍ່ໂມເຊວ່າ, “ຈົ່ງເອົາໄມ້ຄ້ອນເທົ້າຂອງອາໂຣນ ໄປວາງໄວ້ຕໍ່ໜ້າຫີບພັນທະສັນຍາ ເພື່ອຮັກສາໄວ້ເປັນສິ່ງເຕືອນໃຈຊາວອິດສະຣາເອນຜູ້ກະບົດຕໍ່ເຮົາວ່າ ພວກເຂົາຈະເຊົາຈົ່ມຮ້າຍຕໍ່ເຮົາ ເພື່ອພວກເຂົາຈະບໍ່ຕາຍ.”

11ໂມເຊກໍເຮັດຕາມທີ່ພຣະເຈົ້າຢາເວໄດ້ສັ່ງໄວ້ທຸກປະການ.

12ປະຊາຊົນອິດສະຣາເອນໄດ້ເວົ້າກັບໂມເຊວ່າ, “ພວກເຮົາກຳລັງຈະຈິບຫາຍ ພວກເຮົາໝົດກຳລັງເສຍແລ້ວ, ພວກເຮົາທັງໝົດຈະຕາຍ

13ທຸກໆຄົນທີ່ເຂົ້າໄປໃກ້ຫໍເຕັນສັກສິດຂອງພຣະເຈົ້າຢາເວຕ້ອງຕາຍ ພວກເຮົາທັງໝົດຈະບໍ່ຕາຍໝົດບໍ?”

← Chapter 16 Jump to: Chapter 18 →