Numbers 30

Lao Bible 2012 (ພຣະຄຳພີສັກສິ)

← Chapter 29 Jump to: Chapter 31 →

1ໂມເຊໄດ້ກ່າວແກ່ບັນດາຜູ້ນຳເຜົ່າຕ່າງໆຂອງຊາດອິດສະຣາເອນວ່າ, ນີ້ເປັນຂໍ້ຄຳສັ່ງຂອງພຣະເຈົ້າຢາເວໄດ້ສັ່ງໄວ້ຄື:

2ເມື່ອຊາຍຄົນໜຶ່ງບະບົນໄວ້ວ່າຈະຖວາຍສິ່ງໃດສິ່ງໜຶ່ງໃຫ້ແກ່ພຣະເຈົ້າຢາເວ ຫລືສາບານວ່າຈະລະເວັ້ນຈາກສິ່ງໃດສິ່ງໜຶ່ງ; ລາວຕ້ອງບໍ່ເຮັດຜິດຄຳສັນຍາ, ແຕ່ຈະຕ້ອງເຮັດຕາມທີ່ໄດ້ເວົ້າໄວ້ທຸກປະການ.

3ເມື່ອຍິງສາວຜູ້ໜຶ່ງຍັງຢູ່ໃນເຮືອນພໍ່ຂອງຕົນແລະບະບົນໄວ້ວ່າ ຈະຖວາຍສິ່ງໃດສິ່ງໜຶ່ງແກ່ພຣະເຈົ້າຢາເວ ຫລືສັນຍາວ່າຈະລະເວັ້ນຈາກສິ່ງໜຶ່ງສິ່ງໃດ;

4ນາງຈະຕ້ອງກະທຳຕາມທີ່ຕົນໄດ້ບະບົນ ຫລືໄດ້ສັນຍາໄວ້ນັ້ນທຸກປະການ ເວັ້ນເສຍແຕ່ພໍ່ຂອງນາງຮູ້ເລື່ອງແລະຂັດຂວາງໄວ້.

5ແຕ່ຖ້າພໍ່ຂອງນາງຫາກໄດ້ຮູ້ເລື່ອງ ແລະຫ້າມປາມໄວ້ ນາງກໍບໍ່ຕ້ອງເຮັດຕາມນັ້ນ. ພຣະເຈົ້າຢາເວຈະຍົກຜິດໃຫ້ນາງ ເພາະວ່າພໍ່ຂອງນາງບໍ່ຍອມໃຫ້ນາງຮັກສາຄຳສັນຍານັ້ນ.

6ຖ້າຍິງຜູ້ໜຶ່ງທີ່ບໍ່ທັນໄດ້ແຕ່ງງານຫາກບະບົນໄວ້ໂດຍບໍ່ຕັ້ງໃຈ ຫລືຢ່າງບໍ່ຄິດຖີ່ຖ້ວນ ຫລືສັນຍາວ່າຈະລະເວັ້ນຈາກສິ່ງໃດສິ່ງໜຶ່ງ ແລ້ວນາງກໍແຕ່ງງານໄປ;

7ນາງຕ້ອງເຮັດຕາມທີ່ຕົນໄດ້ສັນຍາໄວ້ທຸກປະການ ເວັ້ນເສຍແຕ່ເມື່ອຜົວຂອງນາງຮູ້ເລື່ອງ ແລະຂັດຂວາງໄວ້.

8ແຕ່ຖ້າຜົວຂອງນາງຫາກຮູ້ເລື່ອງ ແລະໄດ້ຫ້າມປາມໄວ້ ນາງກໍບໍ່ຕ້ອງກະທຳຕາມສັນຍານັ້ນ. ພຣະເຈົ້າຢາເວຈະຍົກຜິດໃຫ້ນາງເອງ.

9ແມ່ໝ້າຍຫລືແມ່ຮ້າງຕ້ອງເຮັດຕາມຄຳບະບົນທີ່ຕົນໄດ້ບະບົນໄວ້ ແລະຮັກສາຄຳສັນຍາທີ່ຕົນໄດ້ກ່າວໄວ້ວ່າຈະລະເວັ້ນຈາກສິ່ງໃດສິ່ງໜຶ່ງ.

10ຖ້າແມ່ຍິງທີ່ແຕ່ງງານແລ້ວຫາກໄດ້ບະບົນ ຫລືສັນຍາໄວ້ວ່າຕົນຈະລະເວັ້ນຈາກສິ່ງໃດສິ່ງໜຶ່ງ

11ນາງຕ້ອງເຮັດຕາມທີ່ຕົນໄດ້ບະບົນຫລືສັນຍາໄວ້ທຸກປະການ ເວັ້ນເສຍແຕ່ເມື່ອຜົວຂອງນາງຮູ້ເລື່ອງແລະຂັດຂວາງໄວ້.

12ແຕ່ຖ້າຜົວຂອງນາງຫາກຮູ້ເລື່ອງ ແລະຫ້າມປາມໄວ້ ນາງກໍບໍ່ຕ້ອງເຮັດຕາມທີ່ໄດ້ບະບົນໄວ້. ພຣະເຈົ້າຢາເວຈະຍົກຜິດໃຫ້ ຍ້ອນວ່າຜົວຂອງນາງບໍ່ຍອມໃຫ້ນາງເຮັດຕາມທີ່ໄດ້ສັນຍາໄວ້ນັ້ນ.

13ຜົວຂອງນາງມີສິດທີ່ຈະຮັບຮອງ ຫລືຍົກເລີກຄຳບະບົນ ຫລືສັນຍາຕ່າງໆທີ່ນາງໄດ້ເຮັດໄວ້.

14ແຕ່ຖ້າຜົວຂອງນາງຫາກບໍ່ໄດ້ຂັດຂວາງໄວ້ໃນມື້ທີ່ລາວຮູ້ນັ້ນ ນາງຕ້ອງເຮັດຕາມທີ່ນາງໄດ້ສັນຍາ ຫລືບະບົນໄວ້ນັ້ນທຸກປະການ. ລາວໄດ້ຮັບຮອງເອົາການບະບົນນັ້ນແລ້ວ ໂດຍບໍ່ໄດ້ຂັດຂວາງໄວ້ໃນມື້ທີ່ຕົນຮູ້ເລື່ອງນັ້ນ.

15ແຕ່ຕໍ່ມາ ຖ້າລາວຫາກຍົກເລີກການບະບົນ ລາວຈະຕ້ອງຮັບຜົນກຳຂອງເມຍ ສຳລັບຄວາມບໍ່ສຳເລັດທີ່ຕົນໄດ້ບະບົນໄວ້.

16ອັນນີ້ແມ່ນກົດຕ່າງໆກ່ຽວກັບການບະບົນຂອງຍິງທີ່ບໍ່ທັນໄດ້ແຕ່ງງານແລະອາໄສຢູ່ນຳພໍ່ແມ່ ຫລືຍິງທີ່ໄດ້ແຕ່ງງານແລ້ວ ຊຶ່ງພຣະເຈົ້າຢາເວໄດ້ມອບໃຫ້ແກ່ໂມເຊ.

← Chapter 29 Jump to: Chapter 31 →