Numbers 27

Lao Bible 2012 (ພຣະຄຳພີສັກສິ)

← Chapter 26 Jump to: Chapter 28 →

1ມາຮະລາ, ໂນອາ, ໂຮກະລາ, ມີລະກາ ແລະຕີຣະຊາ ແມ່ນລູກສາວຂອງເຊໂລເຟຮັດ ຜູ້ທີ່ເປັນລູກຊາຍຂອງເຮເຟ ແລະຫລານຊາຍຂອງກີເລອາດ ເຫຼັນຂອງມາກີແລະຫລ້ອນຂອງມານາເຊ ລູກຊາຍຂອງໂຢເຊັບ.

2ພວກເຂົາມາຢືນຢູ່ຊ້ອງໜ້າໂມເຊປະໂຣຫິດເອເລອາຊາ, ບັນດາຜູ້ນຳ ແລະຊຸມຊົນທັງໝົດ ທີ່ທາງເຂົ້າຫໍເຕັນບ່ອນຊຸມນຸມ ແລະຮຽກຮ້ອງສິດທິຂອງພວກຕົນວ່າ,

3“ພໍ່ຂອງພວກເຮົາໄດ້ຕາຍໃນຖິ່ນແຫ້ງແລ້ງກັນດານ ໂດຍບໍ່ມີລູກຊາຍຈັກຄົນ. ເພິ່ນບໍ່ແມ່ນພັກພວກຂອງໂກຣາຜູ້ທີ່ໄດ້ກະບົດຕໍ່ພຣະເຈົ້າຢາເວ ເພິ່ນໄດ້ຕາຍໄປຍ້ອນບາບກຳຂອງເພິ່ນເອງ.

4ເປັນຫຍັງຈຶ່ງເຮັດໃຫ້ນາມຊື່ພໍ່ຂອງພວກເຮົາຕ້ອງດັບສູນໄປຈາກຊາດອິດສະຣາເອນ ເພາະເພິ່ນບໍ່ມີລູກຜູ້ຊາຍພຽງເທົ່ານັ້ນຊັ້ນບໍ? ຂໍໃຫ້ພວກເຮົາມີດິນແດນ ຢູ່ໃນທ່າມກາງຍາດຕິພີ່ນ້ອງຂອງພວກເຮົາດ້ວຍເຖີດ.”

5ໂມເຊໄດ້ນຳເລື່ອງນີ້ໄປຕໍ່ໜ້າພຣະເຈົ້າຢາເວ

6ແລະພຣະເຈົ້າຢາເວກໍໄດ້ບອກເພິ່ນວ່າ,

7“ສິ່ງທີ່ພວກລູກສາວຂອງເຊໂລເຟຮັດຂໍຮ້ອງນັ້ນແມ່ນສິ່ງທີ່ຖືກຕ້ອງ ຈົ່ງໃຫ້ພວກເຂົາມີດິນແດນຢູ່ໃນທ່າມກາງຍາດຕິພີ່ນ້ອງພໍ່ຂອງພວກເຂົາໄດ້. ໃຫ້ສ່ວນມໍຣະດົກຂອງເຊໂລເຟຮັດຕົກທອດມາເຖິງພວກເຂົາ.

8ຈົ່ງບອກປະຊາຊົນອິດສະຣາເອນວ່າ, ເມື່ອຊາຍຜູ້ໜຶ່ງຕາຍໄປໂດຍບໍ່ມີລູກຊາຍ ຈົ່ງໃຫ້ລູກສາວຂອງລາວເປັນຜູ້ສືບທອດມໍຣະດົກແທນ.

9ຖ້າລາວຫາກບໍ່ມີລູກສາວກໍໃຫ້ອ້າຍເອື້ອຍນ້ອງຂອງຕົນສືບທອດມໍຣະດົກແທນ.

10ຖ້າລາວບໍ່ມີອ້າຍຫລືນ້ອງຊາຍ ກໍໃຫ້ອ້າຍຫລືນ້ອງຊາຍຂອງພໍ່ລາວ ສືບທອດມໍຣະດົກຂອງລາວແທນ.

11ແລະຖ້າລາວບໍ່ມີອ້າຍຫລືນ້ອງຊາຍ ຫລືພໍ່ຂອງລາວບໍ່ມີອ້າຍນ້ອງອີກ ກໍໃຫ້ຍາດຕິພີ່ນ້ອງຜູ້ທີ່ໃກ້ຄຽງທີ່ສຸດຂອງລາວສືບທອດມໍຣະດົກແທນ ແລະຖືເອົາເປັນກຳມະສິດຂອງຕົນຕໍ່ໄປ. ຈົ່ງໃຫ້ປະຊາຊົນອິດສະຣາເອນຢຶດຖືຫລັກການນີ້ ເປັນກົດບັນຍັດຕາມທີ່ພຣະເຈົ້າຢາເວໄດ້ສັ່ງເຈົ້າໄວ້.”

12ພຣະເຈົ້າຢາເວໄດ້ບອກໂມເຊວ່າ, “ຈົ່ງຂຶ້ນໄປເທິງພູອາບາຣິມ ແລະ ຈົ່ງແນມເບິ່ງດິນແດນທີ່ເຮົາຈະມອບໃຫ້ຊາວອິດສະຣາເອນ.

13ຫລັງຈາກທີ່ເຈົ້າໄດ້ເຫັນແລ້ວ ເຈົ້າຈະຕາຍຄືກັນກັບອາໂຣນອ້າຍຂອງເຈົ້າ

14ເພາະເຈົ້າທັງສອງໄດ້ຝ່າຝືນຂໍ້ຄຳສັ່ງຂອງເຮົາທີ່ຖິ່ນແຫ້ງແລ້ງກັນດານຊິນ ຄາວທີ່ຊຸມຊົນອິດສະຣາເອນທັງໝົດໄດ້ຈົ່ມຮ້າຍໃສ່ເຮົາທີ່ເມຣິບານັ້ນ ເຈົ້າປະຕິເສດບໍ່ຍອມຮັບຂໍ້ຄຳສັ່ງຂອງເຮົາຕໍ່ໜ້າພວກເຂົາ.” (ເມຣິບາແມ່ນບໍ່ນໍ້າທີ່ກາເດັດໃນຖິ່ນແຫ້ງແລ້ງກັນດານຊິນ.)

15ໂມເຊໄດ້ກ່າວຕໍ່ພຣະເຈົ້າຢາເວວ່າ,

16“ຂ້າແດ່ພຣະເຈົ້າຢາເວ ພຣະເຈົ້າຂອງຈິດວິນຍານທັງໝົດຂອງມະນຸດ ຂໍພຣະອົງຈົ່ງໄດ້ແຕ່ງຕັ້ງຊາຍຜູ້ໃດຜູ້ໜຶ່ງທີ່ສາມາດນຳພາປະຊາຊົນ

17ແລະສາມາດບັນຊາພວກເຂົາເຂົ້າສູ້ຮົບໄດ້ ເພື່ອວ່າປະຊາຊົນຂອງພຣະເຈົ້າຢາເວຈະບໍ່ເປັນດັ່ງຝູງແກະທີ່ຂາດຜູ້ລ້ຽງ.”

18ດັ່ງນັ້ນ ພຣະເຈົ້າຢາເວໄດ້ກ່າວຕໍ່ໂມເຊວ່າ, “ຈົ່ງໄປເອົາໂຢຊວຍລູກຊາຍຂອງນູນຜູ້ທີ່ມີພຣະວິນຍານ ແລ້ວຈົ່ງວາງມືເທິງຫົວລາວແຕ່ງຕັ້ງລາວ.

19ໃຫ້ລາວຢືນຢູ່ຕໍ່ໜ້າປະໂຣຫິດເອເລອາຊາ ແລະ ຊຸມຊົນທັງໝົດ ແລະໃນທີ່ນັ້ນຈົ່ງປະກາດແຕ່ງຕັ້ງລາວຕໍ່ໜ້າພວກເຂົາໃຫ້ເປັນຜູ້ສືບທອດຕຳແໜ່ງແທນເຈົ້າ.

20ເຈົ້າຈົ່ງມອບສິດແລະອຳນາດບາງສ່ວນຂອງເຈົ້າໃຫ້ແກ່ລາວ ເພື່ອວ່າຊຸມຊົນອິດສະຣາເອນທັງໝົດຈະຍອມເຊື່ອຟັງລາວ.

21ລາວຈະເພິ່ງປະໂຣຫິດເອເລອາຊາ ຜູ້ທີ່ຈະຮຽນຮູ້ຄວາມປະສົງຂອງເຮົາ ໂດຍໃຊ້ອຸຣິມແລະທຸມມິມ ຕໍ່ໜ້າພຣະເຈົ້າຢາເວ ອັນນີ້ຈະແມ່ນວິທີທີ່ເອເລອາຊາ ນຳພາໂຢຊວຍ ແລະຊຸມຊົນອິດສະຣາເອນ ໃນວຽກການທັງໝົດຂອງພວກເຂົາ.”

22ໂມເຊເຮັດຕາມທີ່ພຣະເຈົ້າຢາເວໄດ້ສັ່ງຕົນນັ້ນ. ເພິ່ນໃຫ້ໂຢຊວຍມາຢືນຢູ່ຕໍ່ໜ້າປະໂຣຫິດເອເລອາຊາແລະຊຸມຊົນ.

23ເພິ່ນໄດ້ວາງມືລົງເທິງຫົວໂຢຊວຍ ແລະປະກາດແຕ່ງຕັ້ງລາວໃຫ້ເປັນຜູ້ສືບທອດຕຳແໜ່ງແທນຕົນ ຕາມທີ່ພຣະເຈົ້າຢາເວໄດ້ສັ່ງເພິ່ນໄວ້ທຸກປະການ.

← Chapter 26 Jump to: Chapter 28 →