Numbers 28

Lao Bible 2012 (ພຣະຄຳພີສັກສິ)

← Chapter 27 Jump to: Chapter 29 →

1ພຣະເຈົ້າຢາເວໄດ້ບອກໂມເຊ

2ໃຫ້ແນະນຳຊາວອິດສະຣາເອນຖວາຍອາຫານເປັນເຄື່ອງບູຊາດ້ວຍໄຟ ທີ່ຈຳເປັນແລະພໍໃຈພຣະອົງ ຕາມເວລາທີ່ໄດ້ກຳນົດໄວ້ດັ່ງນີ້:

3ອາຫານທີ່ຖວາຍແກ່ພຣະເຈົ້າຢາເວເປັນເຄື່ອງເຜົາບູຊາດ້ວຍໄຟປະຈຳວັນມີ: ລູກແກະເຖິກ ອາຍຸໜຶ່ງປີສອງໂຕ ທີ່ມີສຸຂະພາບດີແລະບໍ່ມີຕຳໜິ.

4ໃຫ້ຖວາຍໂຕທີໜຶ່ງໃນຕອນເຊົ້າ ແລະໂຕທີສອງໃນຕອນແລງ

5ແຕ່ລະໂຕໃຫ້ຖວາຍກັບພືດຜົນເປັນເມັດ ເປັນແປ້ງເຂົ້າສາມກິໂລກຼາມ ປົນກັບນໍ້າມັນໝາກກອກເທດເຄິ່ງລິດ.

6ອັນນີ້ແມ່ນເຄື່ອງຖວາຍປະຈຳວັນ ທີ່ຕ້ອງເຜົາໃຫ້ໝົດຕາມພິທີຖວາຍບູຊາອາຫານເທື່ອທຳອິດທີ່ພູເຂົາຊີນາຍ ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ.

7ສ່ວນເຫຼົ້າອະງຸ່ນໜຶ່ງລິດທີ່ຖວາຍພ້ອມກັບລູກແກະໂຕທີໜຶ່ງນັ້ນ ໃຫ້ຖອກໃນບ່ອນບໍຣິສຸດຖວາຍແກ່ພຣະເຈົ້າຢາເວ.

8ລູກແກະໂຕທີສອງທີ່ຈະຖວາຍໃນຕອນແລງ ໃຫ້ຖວາຍຢ່າງດຽວກັນກັບການຖວາຍໃນຕອນເຊົ້າ ແລະໃຫ້ຖວາຍເຫຼົ້າອະງຸ່ນພ້ອມ. ອັນນີ້ກໍແມ່ນການຖວາຍອາຫານຄືກັນ ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ.

9ໃນວັນຊະບາໂຕ ໃຫ້ຖວາຍແກະເຖິກ ອາຍຸໜຶ່ງປີສອງໂຕທີ່ມີສຸຂະພາບດີ ແລະບໍ່ມີຕຳໜິ ແລະພືດຜົນເປັນເມັດເປັນແປ້ງເຂົ້າສອງກິໂລກຼາມ ປົນກັບນໍ້າມັນໝາກກອກເທດແລະເຫຼົ້າອະງຸ່ນ.

10ສ່ວນການເຜົາສັດຖວາຍບູຊາດ້ວຍໄຟນັ້ນໃຫ້ເຮັດທຸກໆວັນຊະບາໂຕ ຕື່ມໃສ່ເຄື່ອງຖວາຍບູຊາປະຈຳວັນພ້ອມກັບເຫຼົ້າອະງຸ່ນ.

11ໃນວັນທຳອິດຂອງແຕ່ລະເດືອນ ຈົ່ງນຳງົວເຖິກສອງໂຕ, ແບ້ເຖິກໜຶ່ງໂຕ, ລູກແກະເຖິກອາຍຸໜຶ່ງປີເຈັດໂຕ. ເປັນສັດໂຕທີ່ມີສຸຂະພາບດີ ແລະບໍ່ມີຕຳໜິມາຖວາຍບູຊາດ້ວຍໄຟແກ່ພຣະເຈົ້າຢາເວ.

12ສຳລັບເຄື່ອງຖວາຍພືດຜົນເປັນເມັດນັ້ນ ໃຫ້ຖວາຍແປ້ງເຂົ້າປົນກັບນໍ້າມັນໝາກກອກເທດຄື: ງົວເຖິກໂຕໜຶ່ງຕໍ່ແປ້ງເຂົ້າສາມກິໂລກຼາມ; ແກະເຖິກໂຕໜຶ່ງ ຕໍ່ແປ້ງເຂົ້າສອງກິໂລກຼາມ;

13ແລະລູກແກະໂຕໜຶ່ງຕໍ່ແປ້ງເຂົ້າໜຶ່ງກິໂລກຼາມ. ການເຜົາຖວາຍບູຊາເຫຼົ່ານີ້ແມ່ນການຖວາຍຊຶ່ງເປັນກິ່ນຫອມຫວນ ຈຶ່ງເປັນທີ່ພໍໃຈພຣະເຈົ້າຢາເວ.

14ການຖວາຍເຫຼົ້າອະງຸ່ນນັ້ນ ໃຫ້ເຮັດດັ່ງນີ້: ເຫຼົ້າອະງຸ່ນສາມລິດຕໍ່ງົວເຖິກໂຕໜຶ່ງ; ເຫຼົ້າອະງຸ່ນສອງລິດຕໍ່ແກະເຖິກໂຕໜຶ່ງ ແລະເຫຼົ້າອະງຸ່ນໜຶ່ງລິດ ຕໍ່ລູກແກະເຖິກໜຶ່ງໂຕ. ອັນນີ້ແມ່ນລະບຽບສຳລັບການເຜົາຖວາຍບູຊາຂອງວັນທຳອິດໃນແຕ່ລະຕົ້ນເດືອນຕະຫລອດປີ.

15ໃຫ້ຖວາຍແບ້ເຖິກໂຕໜຶ່ງເພື່ອລຶບລ້າງບາບ ຕື່ມໃສ່ເຄື່ອງເຜົາຖວາຍບູຊາປະຈຳວັນພ້ອມກັບເຫຼົ້າອະງຸ່ນຖວາຍແກ່ພຣະເຈົ້າຢາເວ.

16ໃນວັນທີສິບສີ່ຂອງເດືອນທີໜຶ່ງໃຫ້ຖືເປັນວັນປັດສະຄາຂອງພຣະເຈົ້າຢາເວ.

17ໃນວັນທີສິບຫ້າໃຫ້ຈັດເທດສະການຂຶ້ນເປັນເວລາເຈັດວັນ ຊຶ່ງໃນລະຫວ່າງນີ້ໃຫ້ກິນເຂົ້າຈີ່ບໍ່ມີເຊື້ອແປ້ງເທົ່ານັ້ນ.

18ໃນວັນເລີ່ມຕົ້ນຂອງເທດສະການ ໃຫ້ພວກເຈົ້າເຕົ້າໂຮມກັນ ເພື່ອນະມັດສະການ ແລະຢ່າເຮັດວຽກໃດໆທັງສິ້ນ.

19ຈົ່ງເຜົາຖວາຍບູຊາແກ່ພຣະເຈົ້າຢາເວຕາມພິທີຖວາຍອາຫານ ດັ່ງນີ້: ງົວໜຸ່ມສອງໂຕ, ແກະເຖິກໜຶ່ງໂຕ ແລະລູກແກະເຖິກອາຍຸໜຶ່ງປີເຈັດໂຕ. ທັງໝົດນັ້ນໃຫ້ເປັນສັດທີ່ມີສຸຂະພາບດີແລະບໍ່ມີຕຳໜິ.

20ສຳລັບສັດແຕ່ລະໂຕນັ້ນໃຫ້ຖວາຍແປ້ງເຂົ້າປົນກັບນໍ້າມັນໝາກກອກເທດຄື: ແປ້ງເຂົ້າສາມກິໂລກຼາມຕໍ່ງົວເຖິກໂຕໜຶ່ງ ແປ້ງເຂົ້າສອງກິໂລກຼາມຕໍ່ແກະເຖິກໂຕໜຶ່ງ;

21ແປ້ງເຂົ້າໜຶ່ງກິໂລກຼາມຕໍ່ລູກແກະໂຕໜຶ່ງ.

22ໃຫ້ຖວາຍແບ້ເຖິກໂຕໜຶ່ງອີກເພື່ອລຶບລ້າງບາບ ແລະໃນທຳນອງນີ້ຈຶ່ງເປັນສ່ວນປະກອບພິທີຊຳລະບາບກຳຂອງປະຊາຊົນ.

23ໃຫ້ຖວາຍສິ່ງເຫຼົ່ານີ້ ເພີ່ມຕື່ມໃສ່ການເຜົາຖວາຍບູຊາປະຈຳວັນໃນຕອນເຊົ້າ.

24ໃນທຳນອງດຽວກັນ ຈົ່ງຖວາຍບູຊາດ້ວຍໄຟຕະຫລອດເຈັດວັນ ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ. ຈົ່ງຖວາຍສິ່ງເຫຼົ່ານີ້ ຕື່ມໃສ່ເຄື່ອງເຜົາຖວາຍປະຈຳວັນພ້ອມກັບເຫຼົ້າອະງຸ່ນ.

25ແຕ່ໃນວັນທີເຈັດ ໃຫ້ພວກເຈົ້າເຕົ້າໂຮມກັນເພື່ອນະມັດສະການ ແລະຢ່າເຮັດວຽກປະຈຳວັນໃດໆທັງສິ້ນ.

26ໃນວັນເລີ່ມເທດສະການຂອງລະດູເກັບກ່ຽວ ຄືເມື່ອຖວາຍພືດຜົນເປັນເມັດອັນໃໝ່ໃຫ້ພຣະເຈົ້າຢາເວນັ້ນ ໃຫ້ພວກເຈົ້າເຕົ້າໂຮມກັນເພື່ອນະມັດສະການ ແລະຢ່າເຮັດວຽກໃດໆທັງສິ້ນ.

27ຈົ່ງເຜົາເຄື່ອງຖວາຍບູຊາດ້ວຍໄຟແກ່ອົງພຣະຜູ້ເປັນເຈົ້າ ດັ່ງນີ້: ງົວເຖິກສອງໂຕ, ແກະເຖິກໂຕໜຶ່ງ ແລະລູກແກະອາຍຸໜຶ່ງປີເຈັດໂຕ ກິ່ນຫອມຫວນຈຶ່ງເປັນທີ່ພໍໃຈພຣະເຈົ້າຢາເວ.

28ໃຫ້ຖວາຍພືດຜົນເປັນເມັດເປັນແປ້ງເຂົ້າປົນກັບນໍ້າມັນໝາກກອກເທດຄື: ແປ້ງເຂົ້າສາມກິໂລກຼາມຕໍ່ງົວເຖິກໂຕໜຶ່ງ ແປ້ງເຂົ້າສອງກິໂລກຼາມຕໍ່ແກະເຖິກໂຕໜຶ່ງ,

29ແລະແປ້ງເຂົ້າໜຶ່ງກິໂລກຼາມຕໍ່ລູກແກະໂຕໜຶ່ງ.

30ໃຫ້ຖວາຍແບ້ເຖິກໂຕໜຶ່ງອີກເພື່ອເຮັດພິທີຊຳລະບາບກຳຂອງປະຊາຊົນ.

31ໃຫ້ຖວາຍສິ່ງເຫຼົ່ານີ້ແລະເຫຼົ້າອະງຸ່ນເພີ່ມຕື່ມໃສ່ເຄື່ອງເຜົາຖວາຍບູຊາປະຈຳ ພ້ອມທັງຖວາຍພືດຜົນເປັນເມັດ ສັດທີ່ນຳມາຖວາຍນັ້ນ ຕ້ອງມີສຸຂະພາບດີ ບໍ່ມີຕຳໜິ.

← Chapter 27 Jump to: Chapter 29 →