Numbers 25

Lao Bible 2012 (ພຣະຄຳພີສັກສິ)

← Chapter 24 Jump to: Chapter 26 →

1ເມື່ອຊາວອິດສະຣາເອນໄດ້ມາຕັ້ງຄ້າຍພັກຢູ່ທີ່ຊິດຕິມນັ້ນ ພວກຜູ້ຊາຍຊາວອິດສະຣາເອນໄດ້ສົມສູ່ຢູ່ກິນກັບຍິງຊາວໂມອາບ.

2ພວກແມ່ຍິງເຫຼົ່ານີ້ໄດ້ເຊີນພວກເຂົາເຂົ້າຮ່ວມ ບຸນສະຫລອງພິທີຖວາຍບູຊາໃນບ່ອນຂາບໄຫວ້ພະຂອງຊາວໂມອາບ. ພວກເຂົາໄດ້ກິນອາຫານທີ່ໄດ້ບູຊາແລ້ວແລະໄດ້ນົບຮູບພະທັງຫລາຍຂອງພວກເຂົາ

3ຊາວອິດສະຣາເອນກໍໄດ້ຮ່ວມຂາບໄຫວ້ພະບາອານແຫ່ງເປອໍດ້ວຍ. ສະນັ້ນ ພຣະເຈົ້າຢາເວຈຶ່ງໂກດຮ້າຍພວກເຂົາ

4ແລະພຣະເຈົ້າຢາເວໄດ້ກ່າວຕໍ່ໂມເຊວ່າ, “ໃຫ້ຈັບບັນດາຫົວໜ້າຂອງຊາດອິດສະຣາເອນທັງໝົດມາປະຫານຊີວິດຕໍ່ໜ້າຄົນທັງຫລາຍ. ຕໍ່ໜ້າພຣະເຈົ້າຢາເວ ແລະພຣະເຈົ້າຢາເວຈະບໍ່ໂກດຮ້າຍຊາວອິດສະຣາເອນຕໍ່ໄປ.”

5ໂມເຊຈຶ່ງສັ່ງບັນດາເຈົ້າໜ້າທີ່ວ່າ, “ໃຫ້ແຕ່ລະຄົນໃນພວກເຈົ້າ ປະຫານຊີວິດທຸກໆຄົນໃນເຜົ່າຂອງພວກເຈົ້າທີ່ຂາບໄຫວ້ພະບາອານແຫ່ງເປອໍ.”

6ມີຊາວອິດສະຣາເອນຜູ້ໜຶ່ງໄດ້ນຳຍິງຊາວມີດີອານຜູ້ໜຶ່ງ ເຂົ້າໄປໃນເຕັນຂອງຕົນຕໍ່ໜ້າໂມເຊ ແລະຊຸມຊົນທັງໝົດ ໃນຂະນະທີ່ກຳລັງໄວ້ທຸກທີ່ທາງເຂົ້າຫໍເຕັນບ່ອນຊຸມນຸມ.

7ເມື່ອຟີເນຮາ ລູກຊາຍຂອງເອເລອາຊາ ແລະຫລານຊາຍຂອງປະໂຣຫິດອາໂຣນ ໄດ້ເຫັນເຊັ່ນນັ້ນ; ລາວຈຶ່ງຖືຫອກລຸກຂຶ້ນໄປຈາກທີ່ປະຊຸມຕິດຕາມຊາຍແລະຍິງຄູ່ນັ້ນເຂົ້າໄປໃນເຕັນ

8ແລະຊັດຫອກຂອງຕົນໃສ່ ຈົນຊອດເຂົາທັງສອງ. ດ້ວຍເຫດນີ້ ໂຣກລະບາດທີ່ພວມທຳລາຍຊາວອິດສະຣາເອນຢູ່ນັ້ນຈຶ່ງຢຸດຕິລົງ,

9ແຕ່ໂຣກລະບາດນີ້ກໍໄດ້ທຳລາຍປະຊາຊົນອິດສະຣາເອນໄປແລ້ວ 24.000 ຄົນ.

10ພຣະເຈົ້າຢາເວໄດ້ກ່າວຕໍ່ໂມເຊວ່າ,

11“ເພາະສິ່ງທີ່ຟີເນຮາໄດ້ເຮັດນັ້ນ ເຮົາຈຶ່ງບໍ່ໂກດຮ້າຍປະຊາຊົນອິດສະຣາເອນອີກຕໍ່ໄປ. ລາວໄດ້ຈັດການຢ່າງເດັດຂາດ ຕໍ່ຜູ້ທີ່ຂາບໄຫວ້ພະອື່ນໆນອກເໜືອຈາກເຮົາ. ດ້ວຍເຫດນີ້ ເຮົາຈຶ່ງບໍ່ໂກດຮ້າຍແລະທຳລາຍພວກເຂົາ.

12ເພາະສະນັ້ນ ເຈົ້າຈົ່ງບອກລາວວ່າ, ເຮົາຈະຕັ້ງຄຳສັນຍາຢ່າງໜຶ່ງໄວ້ກັບລາວຕະຫລອດໄປ

13ຄືລາວຕະຫລອດທັງເຊື້ອສາຍຂອງລາວຈະໄດ້ເປັນປະໂຣຫິດຮັບໃຊ້ເຮົາສືບໆໄປ ເພາະວ່າລາວໄດ້ຈັດການຢ່າງເດັດຂາດກັບທຸກໆຄົນທີ່ກະບົດຕໍ່ເຮົາ ແລະໄດ້ເຮັດໃຫ້ເຮົາຍົກໂທດປະຊາຊົນອິດສະຣາເອນ ເພາະພວກເຂົາໄດ້ເຮັດບາບ.”

14ຊາຍອິດສະຣາເອນທີ່ຖືກຂ້າຕາຍພ້ອມກັບຍິງມີດີອານນັ້ນຊື່ວ່າ ຊິມຣີ ລູກຊາຍຂອງສາລູ ຫົວໜ້າຄອບຄົວໃນເຜົ່າຊີເມໂອນ.

15ສ່ວນຍິງຊາວມີດີອານນັ້ນຊື່ວ່າ ໂກຊະບີ ລູກສາວຂອງຊູເຣ ຫົວໜ້າຂອງໝວດໜຶ່ງໃນບັນດາຕະກຸນມີດີອານ.

16ພຣະເຈົ້າຢາເວໄດ້ກ່າວຕໍ່ໂມເຊວ່າ,

17“ຈົ່ງບຸກໂຈມຕີຊາວມີດີອານ ແລະທຳລາຍພວກເຂົາໃຫ້ກ້ຽງ.

18ເພາະພວກເຂົາໄດ້ເຮັດຊົ່ວຕໍ່ເຈົ້າທີ່ເມືອງເປອໍ ແລະຍ້ອນໂກຊະບີຜູ້ທີ່ໄດ້ຖືກຂ້າໃນເວລາທີ່ເກີດໂຣກລະບາດນັ້ນ.”

← Chapter 24 Jump to: Chapter 26 →